Jonás 3

₁Ca' ñi qara'gaxala' lotqai liỹa 'naapega so Jonás:

₂—Mo'e', quirepegue' yi chalego lecaic na'a' Nínive, ca' 'xachi'o' dá'maq shinapega ma'le qami'.

_3-4Ca' so Jonás eec, quepegue' yi Nínive, ma' chi qailata quiñi qara'gaxala'. Yi na'a' Nínive chalego lecaguiñi. Ca' quiyim qoyigougui, ca ỹovi' tres na'xata', ca' qaigueme qaỹoviraxatec. Ca' so Jonás queugui yi'maxare quesá'ogue so 'óna na'xa'a, ra'qaataxanta'pegue', neteneguelo naua la'qaatqa. 'Naaco' quen:

—¡Quenauajo cuarenta na'xata', ca' qanopoxoỹaxajñi na Nínive!

₅Ca ná'maq na'ñi yijo na'a', na collo'olqaipioqui' chaqai na leta'allípi, ỹaatqajam huelec ñi qota'olec. Ca' nqopaaqachit chaqai ỹañiñi naua noho nachicoxoqui', ma' ỹaatqajam 'ue da lachicoxo. ₆Ca co'na' ỹovira'a quiyim ỹa'den so nashi quiyi Nínive. Qai'neeta so'maxare ne'laxashiguim caso nqa'xanaxaqui quiyim nashi, ca' naqate' saua loho nashi loho, ca' ỹañiñi saua noho nachicoxoqui', ca' nqa'xanñi quena 'laua. ₇Co'na' ime, ca' so nashi chaqai so lotauaripi ỹa'deenaxanaxantegue da laqataxague' quiyim ná'ogue na qomyipi neeta'ñi yi na'a' quiyim qaica que'e, chaqai se qaiqui'ỹaxan, chaqai se qane'taxan na iseripi nedaxaquiripi chaqai na qagretaipi. ₈Ta'ta'a quiyim ñiiñi na nooỹac nachicoxoqui re'qoota nqai'ñii da rachicoxohi, chaqai ná'ogue nqouagaxainot ñi qota'olec machii'ot ná'ogue na rquesaxanaxahi, chaqai ná'ogue ỹaxanñi na loic se no'uen, chaqai quiyim se ra'maqataxan dá'maq ỹo'ueetetaco' quen chi ỹovireta'a nagui. ₉Sha'apiguito' ñi qota'olec nemanñi da lauel coqomi'. Ca' se qaralauat.

₁₀Ca' ñi qota'a iuana dá'maq 'neetari' yi qomyipi quiyi Nínive quiyim ỹaxañiñi naua loico se no'viiñi. Ca' ñi'maxare se ipaguigui nqai'en da la'qaatec quiyim 'naac nopoxoỹaxajñi yi Nínive.