Josué 1

₁Ca co'na' mashic ileu so Moisés só'maq lelaatec ñi qara'gaxala', ca' ñi qara'gaxala' retaxaỹa'pegue' so Josué só'maq llaalec so Nun só'maq chaqai'en lotaua so Moisés, 'naaco':

₂—Ma' mashic tot qaica so ilaatec Moisés, ca' qami' chaqaqami' ná'maq ỹapaca'ta nqai'ñi' ana lachiugue Jordán, riỹa'isa'ta ná'ogue na llaalqaipi so Israel, qaiyi quiipegue' yí'maq 'laua saanema qamiri. ₃Sepacqajanchigui dá'maq ỹa'qaatec na'le queso Moisés na' shinac ỹim saanema qamiri ná'ogue ná'maq 'laua mashic co'viilec. ₄Ca' ỹim saanema qamiri ma'le yi 'laua chicqochi'ñi yi 'laua qaica qom, chaqai ana quemaralec qa' ladocai quiyi Líbano, ỹovira'oga aso chalego lecaic lachiugue Eufrates, liỹa'ogue' yá'ogue yi na'laua na hitita laseripi, chaqai ỹovira'oga aso huaaxai, leenaxat Mediterráneo. ₅Qaica ca ishit quiyim loxonec qami' quiyim ñaq rca'lli'sauec, ca ỹim iỹaatac qami' ma'le dá'maq shinta'gue na'le queso Moisés. Se salachi'sac chaqai qaica ma' shique'e quet qami'. ₆Qam ỹaatqajam na'ñaxachi', se ileuapigui qavilli', ma' qami' naloqojñirec ma'le yi 'laua, 'ỹaañitem na qomyipi, ma' yi'maxare sachaxantapeguem na'le so 'auaxaic leta'allipi quiyim saanem. ₇Qam chaqaidaata sahotaque quiyim na'ñaxachi' chaqai se illivigui na qavilli', chaqai ỹaatqajam pacqajñichiriguilo na ỹaqataxaco ỹaanema qami' na'le so ilaatec Moisés. Ỹaatqajam pacqajñichiriguilo naua'maxare, qaiyi 'ue ca 'negue cá'maq canchaqaica coñita. ₈Pilaxachisa'gue dá'maq 'naac ana lere hueetalec na laqataxaquipi ñi qota'olec. 'Yiiñisapegalo quiyi na'xa'a chaqai quiyi pe, qaiyi se neme 'viichi'sac dá'maq 'neeta da naqataxac. Ca cá'ogue cá'maq 'viichi' ma'le cá'ogue ỹa'maqachiguiñi. ₉Ỹim ná'maq selachi' quiyim na'ñaxachi' chaqai se ileuapigui qavilli'. Se ro'chi'i' chaqai se reualliriñi, ma' ỹim ra'gaxalachi' qota'olec caqami', ca ỹim ñauequeta'pegue' qami' quecanchaqa 'itegue.

₁₀Co'na'le, ca' so Josué ila' so lashillipi so qomyipi:

₁₁—Quiiguilo naua'que naua ra'aachiri ma'le, ca ná'ogue 'ñiỹapega quiyim ỹa'maxatetañi ca nouene', ma' quenauajo tres na'xata', ca sapagaxata aso lachiugue Jordán, qaiyi senqalec yí'maq 'laua ỹachaxantapeguema qomi' ñi qara'gaxala' qota'olec quiyim ỹaanema qomi'.