Judas 1

₁Ỹim Judas, ỹim la'ac so Jesucristo, chaqai ỹaqaỹa so Jacobo. Shiriñi anajo ilaata quená'maq loỹaxanqateripi chaqai ỹoỹoote'oga ñi qota'olec quiyim ỹauaaque lalamaxareteripi, ná'maq qaicochiitapega ma' na'deetau'a so Jesucristo. ₂Sahotaque quiyim coñiguit cá'maq chalego nqouagaxahi, ra'maxahi chaqai ca ne'xorenataxanaxa chicqo'ot ñi qota'a.

₃Qamiri ỹaqaỹarolqa, ỹaatqajam 'xoic da shinta quiyim shiriñi dajo caqamiri queda qarca'laxa hueeto'oto qomi'. Qam nagui, ca' seuana quiyim ỹouen shiriñi dajo caqamiri quiyim ñi'xoresentouguilo quiyim se neme loguilgoto daua qanapaxaguinataxaco dauá'maq mashic qoỹaanem ná'ogue ná'maq lalamaxareteripi ñi qota'a. ₄Ma' mashic 'uo' na qomyipi queetou'gue da lachoxonataxanaxac caqamiri. Quená'maq shi'co' qaỹa'xateta'guit quenaua naneresañi la'qaatqa ñi qota'a quiyim tai'a dá'maq ỹaatqajam 'chichiguiñi nouaxanaxaset. Najo qomyipi ỹaatqajam hualoxonyipi, ma' icoñiguit da lqouagaxa ñi qota'olec, ca' iualaxain, queugui nqai'en da se no'uen lamaanaxanqachic na loshicmaxa, chaqai sqai huelec ñi qota'a ñí'maq qaiñiita qomi' lalamaxarete', chaqai so qara'gaxala' Jesucristo.

₅'Eno'm mashic shi'gue 'yiiñii qamiri, qam sahotaque ño'uenaxanaxanguelo qamiri da 'neeto' na'le ñi qara'gaxala', ma' ñi'maxare naqata'a na'le quiyi Egipto so llaalqaipi so Israel, qam na'chaqai, ca' qaiyiita ileu nqai'en só'maq sqai huelec ñi'maxare. ₆Chaqai só'maq nelaatqaipi quiñi qota'a piguim laseripi quená'maq se ỹaqamaxat ca loma', ta'ta'a quiyim ỹalat cá'maq lalamaxaret la'a', ca' ñi qota'a coñi', nauaanta'guit nqai'en cá'maq pa'aatec na'xa'a ma' qaimit ná'ogue najo, coñirañi quiyí'maq qaica 'nejem napalaxa. ₇Qai'neeta so qomyipi na'ñi yi Sodoma chaqai yi Gomorra chaqai saua na'aate' sqoỹoqapigui, ca 'nejem só'maq nelaatqaipi piguim laseripi ma' nañaanguit da se no'uen lamaanaxanqachic na loshicmaxa, ca' que'uegue dá'maq leualaxainataxanaxac dá'maq se nachiñiguit quet dá'maq ỹaatqajam no'ueenataxac ca qom. Ca' qainaxañigui so'maxare ca norec sqaica lqodoc, ca' dajo naqataxac 'ec no'ueenaugui ná'ogue na qomyipi nagui.

₈Quedá'ogue dajo, qam qaiyiita najo qomyipi queeta'pegue' na le'guemataxac, ca na'axat na loshicmaxa, ca se icoñiguit da lelaataxanaxac ñi qara'gaxala', chaqai ishiuentac ná'maq nelaatqaipi piguim laseripi. ₉Qam só'maq lashi na nelaatqaipi piguim laseripi, leenaxat Miguel, co'na' reloquita'pegue' so na'ỹaapec, ro'ootaxanteguelec so loshicmaxa so Moisés, se ishit quiyim inaxalec ca nouaxanaxaset ỹahota'ahi naua la'qaatqa. Ta'ta'a quiyim 'naac: “Ñí'maq qara'gaxala' nelaxa qami' ma'le.” ₁₀Qam najo ỹalliripi ỹaatqajam se no'uen ná'maq ỹa'xatetac, queeta'pegueu'a dá'maq no'uen ma' se ỹa'den. Qam dá'maq no'ueenataxac ỹachigoxotaugui dá'maq chi la'ajnaxanaxac dá'maq ỹa'den, 'nejem ná'maq ỹa'den na iseripi, qam qaica ca la'deenataxanaxac, ca' ro'ueenataxantapega, qam chi nqa'viinteguelta'.

₁₁¡'Xoraiqolqa naua'maxare! Ma' queesa'uegue da no'ueenataxac so Caín. Ma' ỹahosaque ca lauegaxanaxague' cana plata, ca' ỹo'merac, 'nejme' so Balaam. Chaqai na'lerañi 'nejme' so Coré, ma' qaỹalauat, sauaxat da npa'guenaxac. ₁₂Ỹaatqajam nayiloxo lahite' quena' ỹalequesauguilo qamiri quenaua rqui'ỹaxagohi quena' nouañitagui na qanoxohi. Quena' raỹaacosalec da lqui'ỹaxague' chaqai da ne'taxague', qaica ca na'xairaque, se ỹa'maxata'que naua la'qaatqa. Chaqai na'maxare 'ec cá'maq na'gaxala' chi netelteguelta', qam 'nejem ca naueguelec sqai chicqaugui ca huaxaỹaq, chi qaỹaỹoxonaxateta quena nonot, chaqai 'ec aca qo'paq qaca aca la quiyim ỹovita ca laloqo', ỹaatqajam ỹasootam, ca' ỹovita qanaqat. ₁₃Na'maxare 'nejem ca quesaxan lo'paxa aca huaaxai niñimlaxantecshiguim na lanatqaipi se no'uen 'ec ro'i, chalego la'aaxa nayiloxo lahi'. Chaqai na'maxare 'ec aca huaqajñi ỹit ca llicyaxac, ca' 'ue da nouaxanaxaset quiyim hueetaugui nqohin na qaica nqai 'nejem chaqai sqaica lqodoc napalaxa.

₁₄Qai'neeta so Enoc só'maq hueetougui só'maq pa'aatec na' siete nqo'neuec nqohin so llaalqaipi so Adán, so'maxare ỹa'xat dajo na'le na' ra'qaataxan nqohin quiñi qota'a, co'na' 'naac: “Seuañi'chiguit ñi qara'gaxala' nauequeta'pegue' ná'maq canchaqa ỹoto'o' mil ná'maq lalamqateripi, ₁₅quiyim imit ná'ogue na qomyipi, ca' ỹa'ue ca nouaxanaxaset ná'ogue ná'maq hualoxonyipi quená'ogue ná'maq se no'uen ỹo'ueetetac, chaqai quená'ogue na la'qaatec chalego la'aaxa qohinapega ñi'maxare quená'maq hualoxonyipi chaqai na sauaqhuaiquipi.” ₁₆Na'maxare ỹaatqajam taxaỹaxaiquipi, chaqai queeteguelec na liỹaripi, chaqai qaidaata ỹahotaque quiyim qainaata ỹa'maqachiguiñi. Chaqai ỹaatqajam lo'yaxanqa naua la'qaatqa, chaqai neneequesenaxahi' naua la'qaatqa quiyim retaxaỹa ca liỹa qom, sha'apiguito' 'ue cá'maq naquitetaque queca'maxare.

₁₇Qam qamiri ỹaqaỹarolqa, no'viñita'co' quiyim shi'gue quesom saua lelaatqa so qara'gaxala' Jesucristo, ₁₈na' 'nerac caqamiri: “Quecaua pa'aaterec na'xata', ca 'ue ma'le ca qom chaqai i'naari' dá'maq na'qaatec qoyiuelec, ca chaqai queeta'pegue' ná'maq la'deenataxanaxaquipi se no'uen.” ₁₉Ca' chaqaina ná'maq ỹo'uet quiyim shicchigui na qomyipi, ca chaqai que'uegue ná'maq ỹo'ueetetac na loshicmaxa, chaqai na'maxare sqai neetagui so ne'Espíritu ñi qota'a.

₂₀Qalaxam qamiri ñauochaxaua' ỹaqaỹa', ỹaatqajam quiijlec dá'maq no'uen napaxaguinataxaguii viilec na'le. Nqouagaxaiñii queda lquesaxanaxa so Espíritu Santo. ₂₁Chaqai sqai 'xañiuec da le'xorenataxanaxa ñi qota'a. Chaqai nauaañita'guit ca na'xa'a quiyim so qara'gaxala' Jesucristo quedá'maq lqouagaxa, ca' ỹaanema qomi' ma'le ca nca'laxa sqaica lqodoc.

₂₂Ca no'm 'ue ca sqailligueme' huelec, ca ỹaatqajam 'xachita da leloxoỹaxac. ₂₃Nca'laxachiuec, coñiỹa'pegue' quiyi taatañigui ca norec sham ỹavic. Chaqai 'xoriñii ná'maq liỹaripi, qam richilliỹaño', raqaiquia'guita naua loho, ma' qai'neeta ỹovirauguilo dá'maq se no'uen no'ueenataxac na'maxare.

_24-25Ñí'maq qota'olec qaiñiita chaqai qaica 'nejem da la'deenaxanaxa, ñí'maq qarca'laxaqui, 'ue da lquesaxanaxa quiyim cochiỹalo qamiri, qaiyi qaica ca huaañi. Qaca aca lete nqai'ne' qamiri, ca 'xoic ca netoonaxaguii nqai'en, ma' nachaalataxana'alo qamiri yí'maq chalego lauaq hueete'e ñi'maxare. Ca' ñi'maxare chaqai 'neetari' se neme da lauaq, da lecaic, da lquesaxanaxa, chaqai quiyim 'ue nqai 'negue nqohin ñi'maxare, chicqochigui so qara'gaxala' Jesucristo, chicqotañi nallaaqo', chaqai nagui, chaqai sqaica lqodoc. Ajá'a, ca' chaqaida 'neeta dajo.