Lucas 10

₁Ca co'na' ime dajo, ca' so qara'gaxala' nca'au'alo saua liỹa' setenta, ca ilate', qam dooseta'pe nqai'en, 'aueta'gue da taata'gue so'maxare quiyim queetagui ná'ogue na na'aateripi chaqai ná'maq hua'ñi quiyim que'tegue ma'le so'maxare. ₂Ca 'naac:

—Ỹaatqajam llic 'xoic ana la na nanecsec, qam ná'maq naqataxanyipi se nalogoñi. Ca vichiguiño' 'maxaraic quiyim shilahi ñí'maq lanecsec najo, qaiyi nela' ca no'ueenataxanyipi ñaq naqato' ana la ná'maq lanecsec. ₃Mohi, oquii nagui, selarii, qam 'ñiitari' ca qagreta llaalqaipi, quiichicñigui ca iseripi ỹa'cac na qagreta llaalec. ₄Sqai 'xachii aca qachoxoguii, chaqa ca qadamii lahi', chaqai caua qapelachiri, chaqai sqaica ca quiñiitac remiilec quena nayic. ₅Chaqai no'm 'ue ca 'imec viriu'a, 'auaxañii quinaxañii, 'ñiỹac: “'Uo' ma'le ca la'maxa najo na'a'.” ₆Ca' queca na'a' no'm 'ue ca hueeto'ot da na'maxa, ca dajo niquinaxanaxac na'maxa taalec cajo. Chaqai no'm sqaica, ca rapilaxachii da niquinaxanaxac. ₇Chaqa'ma' ñiỹa'ñi cajo na'a', ca a'guii chaqai ni'chiigui quecanchaqaica 'ue, ma' ca ro'ueenataxantac taiguit quiyim ỹacoñiguit aca nishiuete. Mesqai quiitaguilo naua 'imqa. ₈Ca no'm viriu'a ca na'a' quecá'maq icoñi'chiguita qamiri, ca' a'guii canchaqai qaiqui'ỹaxaneguelo qamiri. ₉Ca machiuec ná'ogue na ralolaxaic quená'maq hueeta'anyi. Chaqai 'ñiỹapega quiyim: “Da lo'ueenataxanaxac ñi qota'a quiyim ỹoiquentac ná'ogue najo, mashic nepalata'alo qamiri.” ₁₀Qam no'm viriu'a ca na'a', ca' qamiri se ỹacoñiguita, ca quiipegue' ca nayic, ca 'ñiỹac: ₁₁“Vire'ta na lamoxoỹaxa quena ñiita'ñi inocaho quenaua qopiaate' ñochigoxosoxouec, qam dajo tai'a quiyim chi nasauaxachiỹalta'. Qam qamiri 'yiiñita quiyim da lo'ueenataxanaxac ñi qota'a nepalata'alo qamiri, ma' ỹoiquentac ná'ogue najo.” ₁₂Ca' shinapegalo qamiri quiyim quecajo na'xa'a ma' qaimit ná'ogue najo, ma' qaỹa'ue ca nouaxanaxaset cajo na'a', ca ỹaatqajam paguec lecaic queca nouaxanaxaset so qomyipi na'ñi na'le yi na'a' Sodoma.

₁₃¡'Xoraiqolqa qamiri ñiita'ñi na na'a' Corazín! Chaqai ¡'xoraiqolqa qamiri ñiita'ñi na na'a' Betsaida! Ma' quet quiyim hua'ñi yi na'a' Tiro chaqai yi Sidón quiyim qaỹo'ueete' naua no'ueenataxanaxaco se qaiuanapegalo 'nejem dá'maq qaỹo'uet caqamiri, shi'gue quet quesom ỹalate' naua no'ueenataxaco chaqai nachaxaneta quiyim ỹañiñi naua nasouaxaqui' noho chaqai nemeetalta' quena lo. ₁₄Qam queca pa'aatec na'xa'a ma' qaimit ná'ogue najo, ca' qamiri coñiguit ca ỹaatqajam lodegaxat nouaxanaxashichii, sqai 'nejem ma'le yi Tiro chaqai yi Sidón. ₁₅Qam qamiri ma' ñiita'ñi yi na'a' Capernaum, ¿'ñiitapega quiyim qananojshiguim qamiri, qaroviraqchi'ot na piguim? 'E', qamiri qaropilaxachiñi ma'le, ca viriỹa'ña ca lapooqo' na lqui'i na leuaxaiquipi.

₁₆Qam ca na'xaỹaxanalo qamiri, ca' chaqaỹim na'xaỹaxana. Qam ca se ỹacoñiguita qamiri, ca' chaqaỹim se ỹacoñiguit. Qam ca se ỹacoñiguit aỹim, ca' chaqaiñi ñí'maq yila' ñi se ỹacoñiguit.

₁₇Ca' so setenta napaxaguinatqaipi co'na' novi' ỹaatqajam 'xoic da netoonaxac. Ca ra'qaataxantac, 'naaco':

—Qami' qara'gaxala', vire'ta na ne'ec lecmaxaiquipi ỹaatqajam na'xaỹaxanalo qomi' quena' sodaqa'a da qadeenaxachi'.

₁₈Ca' so Jesús 'naaco':

—Ajá'a, ỹim seuanchi'ñigui na'le so na'ỹaapec na' najñi, chicqo'tot na piguim, 'ec na nqai'legaxa. ₁₉Aỹim saanema qamiri da nquesaxanaxa, qaiyi co'viigui na nanaiquipi chaqai na pa'lotoxoiquipi, chaqai quiyim naviguii ná'ogue na lquesaxanaxa so pa'guenaxantac, chaqai sqaica ca que'maqachite' qamiri. ₂₀Qam se netooñigue quiyim na ne'ec lecmaxaic na'xaỹaxanalo qamiri, qaidaata quiyim yi qadeenaxachii naneretañi queda piguim.

₂₁Ca' so Espíritu Santo ỹo'uet quiyim 'xoic da netoonaxac so Jesús, ca 'naaco':

—Qami' ita'a, semaqachiñi', qami' la'gaxala' na neeto'ot na piguim chaqai na 'laua, ma' 'xochiriño' naua'que nauajo quena 'deenaxanqachaqaiquipi chaqai na 'xaỹaxanqachaqaiquipi, ca chaxañitem ná'maq 'ec ñaaqaipioqui'. Ajá'a, qami' ita'a, ma' chaqaida da vi'saque.

₂₂Ca' 'naapego' so qomyipi, 'naaco':

—Ñi ita'a nañaañim ná'ogue na na'deenataxanaxac. Ma' qaica ca ỹa'den negue' najo llaalec, chaqaiñiita ñí'maq leta'a. Chaqai qaica ca ỹa'den negue' ñí'maq leta'a, qainaata ná'maq llaalec, chaqai quecauajo cauá'maq ñi'maxare ỹahotaque ỹa'deenaxanaxanque.

₂₃Ca ra'ỹauguilo saua lapaxaguinatqa, ca qaisauate' 'naapegalo:

—Ỹaatqajam chalego la'maxa cá'maq iuanchigui ná'maq qamiri 'ajñitac. ₂₄Ma' qamiri shiñiỹapegaxaua' quiyim 'xoic so letaxaỹaxaquiripi ñi qota'a chaqai so nashillipi ỹahotaque iuana dajo dá'maq qamiri huañiỹa, qam se iuanta; chaqai ỹahotaque quiyim 'xaỹa dajo nagui 'xaitapega, qam sqa 'xaita.

₂₅Ca' so napaxaguinataxanaq quena nelaataxanaxaquipi nachajñi, quepegue' so Jesús, ỹahotaque quiyim retaxaỹa'pegue'. Ca' chi i'guen, inat, 'naaco':

—Qami' napaxaguinataxanaq, ¿negue' ca shinta'co' quiyim sovira'a secoñiguit ca nca'laxa sqaica lqodoc?

₂₆Ca' so Jesús 'naaco':

—¿Negue' ná'maq naneretañi quena naqataxaquipi chicqo'ot so Moisés? ¿Negue' ca 'ñiisa'co' quena' taqairelec?

₂₇Ca so napaxaguinataxanaq quena nelaataxanaxaquipi 'naaco':

—“Ỹaatqajam rauochitegue ñi ra'gaxalachi' qota'olec, ỹaatqajam machiro'ot añi re'taxanata'e' chaqai da nachaalataxaqui', chaqai da rquesaxanaxa'e', chaqai dá'ogue da ra'deenataxanaxaqui'; chaqai rauochitegue ca liỹa qom, 'nejem qami' nauochiralta'.”

₂₈Ca' so Jesús 'naaco':

—Ajá'a, ỹaatqajam ỹa'maqachiguiñi da 'ñirac, ca no'm 'viichi' dajo, ca rca'llirec.

₂₉Qam so napaxaguinataxanaq ỹahotaque quiyim iuejlec da lenataxanaxac, ca 'naapego' so Jesús:

—¿Negue' cá'maq iỹa shinta malam?

₃₀Ca' so Jesús 'naaco':

—'Uo' so ỹale chicqotashi'ma yi Jerusalén, queeta'gue so nayic tai'a yi Jericó. Ca' qai'laxateta qanouo' quesaua cuataxaqa. Ỹaatqajam qaicona sá'ogue so hueeto'ot, vire'talo saua loho qaiconalo, chaqai qaỹouaxantac, ca qoyique'e co'na' mashic 'ec ileu. ₃₁Ỹaatqajam chaqaiso' so na'xa'a, ca' que'teco' so nayic so 'óna quená'maq letaxaỹaxanqajnec na qomyipi quena' qaretaxaỹa'pegue' ñi qota'a. Qam co'na' idaana'a, ca ỹa'iitauec. ₃₂Lotqai qai'neeta que'tegueyi so lotaua na netaxaỹaxanqajanqaipi. Qam co'na' ỹovita yi hua'ñi so ỹale, ca idaana'a, qam yí ỹa'iitalec. ₃₃Qam naco' so ỹale na'ñi yi Samaria, qai'neeta queeta'gue so nayic. Qam co'na' iuane'ta so ỹale, ca ỹaatqajam 'xoic da le'xorenataxanaxa. ₃₄Ca quepegue' so ỹale, ca nataren queso aceite chaqai so lataxa. Ime, ca' ỹa'ue so laxa'. Ca co'na' ime, ca inaxalec so lañaxala', ca ỹauego queso nanatqa'. Ca' quiyi, ca reloxoỹa'a. ₃₅Ca' queso liỹa na'xa'a, co'na' mashic reloqouec quiyim liỹa eec so Samaria le'ec, ca' naviquishiguim saua dos lishiuetenaxanqate, ca ỹaanem só'maq la'a' yi nanatqa'. Ca 'naapega: “Loqoira'a ma'le najo ỹale. Ca no'm 'ue aca ỹa'ỹaauec la'uale, ca' seshiueten ma' yapil.” ₃₆Ca' nagui, ca' senachi', ¿negue' cá quesaua tres piichira'a quiyim re'oq quiyim ỹaatqajam 'neeta'gue ca liỹa qom sojo ỹale qanouo' quesaua cuataxaqa?

₃₇Ca só'maq napaxaguinataxanaq 'naaco':

—Só'maq 'ue da le'xorenataxanaxa queso'maxare.

Ca' so Jesús 'naaco':

—Mo'e', qui', 'viichi' dajo qai'neeta.

₃₈Ime, lotqai eec so Jesús, ca co'na' ỹovita yi na'a', ca 'uo' aso 'aalo leenaxat Marta, ỹauegueu'a yi la'a'. ₃₉Qam aso Marta 'uo' aso lqaỹa leenaxat María. Ca' so'maxare nqa'xanñi, ne'toto naua lichil so Jesús, ca na'xaỹaxantapega ná'ogue na ỹa'xatetac so'maxare. ₄₀Qam aso Marta ỹaatqajam qaica ca ledaaqa', ma' quelolta'pegue' ná'ogue na ledaxaseteripi. Ca' quepegue' so Jesús, ca 'naapega, 'naaco':

—Qami' ỹa'gaxala', ¿ỹaatqajam qaico' ca huapigui qavilli' ma' ñi ỹaqaỹa yodaqajantec quená'ogue na idaxaseteripi? 'Ñirapega añi'maxare, qaiyi yotauan.

₄₁Qam so Jesús 'naaco':

—Marta, Marta, ỹaatqajam remi'relec, chaqai ỹachicoqochit qami' ná'maq 'xoic redaxashichi'. ₄₂Qalaxam 'oonoqui' dá'maq ỹapacauec quiyim qaỹouen. Añi María ỹaatqajam paguec loyac dá'maq nca'atau'a, ca da'maxare qaica ca ishit rouootaxana'gue.