Lucas 13

₁Ca' chaqaisaua sauajo na'xata', ca 'vio' saua novite', ca' ra'qaataxansapeguem so Jesús queso nashi Pilato 'vio' saua ỹalauate' qomi' nera'ñi yi Galilea. Ime, ca' ỹalecqajñiguit na leuoripi só'maq leuoripi ca lalauatec iseripi, ỹahosaque ỹavigaxate' quiyim lachitaxanataxanqate'. ₂Ca' so Jesús 'naaco':

—¿Qamiri pe'taxañitaque quiyim sojo qomyipi qohine'tegue dajo paguec sauaqhuaiquipi quiyá'ogue yi liỹaripi na'ñi yi Galilea? ₃Ỹim shinac 'e'. No'm qamiri se retacochahi, qamiá'ogue 'ñiita ma'le caua'maxare. ₄Loqo'm 'ñiitapega quesaua dieciocho qaipataqarañi co'na' 'guiñi aso naue na'ñi yi Siloé, ¿peeta'a 'ñiitapega paguec sauaqhuaiquipi quená'ogue na neeta'ñi yi Jerusalén? ₅Ca' shinapegalo qamiri 'e'. Ma' qamiri qai'neeta no'm se retacochahi, ca' qamiá'ogue 'ñiita ma'le caua'maxare.

₆Ca' so Jesús ỹa'uo' aso raloqojnaxana, 'naaco':

—'Uo' so ỹale 'uo' aso lanecse higo, ỹantalec yi na'laua. Ca' eec ra'ajnaxana, qam sqaca aca ỹanata la. ₇Ime, ca' 'naapega só'maq neloxoỹaq queso 'laua, 'naaco': “'Ajñi', mashic tres ñaxari yapilta'quena, qam sqaca aca sanata cacá'maq ñi'guena'a la. Ca 'maxaraic huaxañirelec ada'maxare, ¿negue' quet cá'maq 'negue quiyim neetalec yi 'laua?” ₈Qam só'maq neloxoỹaq quiyi 'laua 'naaco': “Qami' ña'co', ñaqai 'xañirac quenajo ñaaxa ada'maxare, ñaq ñi'ỹot chaqai semeetot. ₉Ca' queda, ca' sqoue 'ue aca la. Qam no'm se ishit 'ue aca la, ca' qaỹouaxanlec ma'le.”

₁₀Ca 'uo' so na'xa'a co'mataxaqui, ca' so Jesús rapaxaguinataxantac, hueetaugui aso lapoxoqui na judioipi. ₁₁Ca' ỹalequetaho' aso 'aalo mashic ỹovi' dieciocho ñaxari queso le'ne'. 'Uo' so le'ec lecmaxaic qoyimigui nqai'en, ca' aso'maxare se ishit nalamaxajñi. ₁₂Ca co'na' so Jesús idaana'a, ca roỹaxana, ca' 'naapego':

—Qami' 'aalo, nagui mashic souec qami' quena ralolaxa'e'.

₁₃Ca' ỹashil-lec queda lqai'laxat aso'maxare, ca chaqa'ma' nalamaxajñi, ca' imaqachintac ñi qota'olec. ₁₄Qam só'maq nashi cañí'maq napoxoqui ỹaatqajam ro'o, ma' so Jesús ỹomatec queso na'xa'a co'mataxaqui. Ca' 'naapego' so qomyipi, 'naaco':

—'Vii naua seis na'xata' quiyim ỹa'maqachiguiñi qaro'ueenataxanguilo. Ca chaqainaua quet naua huauguilo quiyim qaromachiuec, qam mesqaiyi yi na'xa'a co'mataxaqui.

₁₅Ca' so qara'gaxala' saat, 'naaco':

—Qamiri mashic 'ñiitapega quiyim qamiri 'maxaraqa, ¿peeta'a sqaica canchaqaica caqamiri ỹosouec ca lalo ñii'lola, loqo'm aca lalo 'ashina queca na'xa'a co'mataxaqui quiyim ỹauegaxasom, ne'taxan queca huaxaỹaq? ₁₆Qam cadajo 'aalo ma' llaale so Abraham, ca' so na'ỹaapec coñiretari' ada'maxare quedajo nalolaxa nagui mashic ỹovi' dieciocho ñaxari, ca' ¿se ỹa'maxaño' quiyim qaỹosouec quedajo ralolaxa queca na'xa'a co'mataxaqui?

₁₇Ca co'na' 'naac dajo so Jesús, ca' sá'ogue so npa'guenaxauaripi ỹaatqajam 'xoic da layiloxo. Qam sá'ogue so liỹa qomyipi ỹaatqajam 'ue da netoonaxac na' iuanchigui da lecaic da ỹo'uet so Jesús.

₁₈Lotqai 'naaco':

—¿Nega'ỹo' ca 'nejem nqaishin da lo'ueenataxanaxac ñi qota'a quiyim ỹoiquentac ná'ogue najo? ¿Chaqai nega'ỹo' ca saloqojnaxana? ₁₉Da'maxare 'nejem aca la ana mostaza quiyim ca qom ỹanlec ca na'laua, ime, ca' ñaxat, vire'ta quiyim 'nejem aca qo'paq late'ogue'. Ime, ca' anac ana qo'oollipi, ca' ỹo'uet na lco'vichaxaquiripi ỹanauguilo naua lasote.

₂₀Qai'neeta 'naaco' so Jesús:

—¿Nega'ỹo' ca saloqojnaxana quiyim 'nejem nqaishin da lo'ueenataxanaxac ñi qota'a quiyim ỹoiquentac ná'ogue najo? ₂₁Da'maxare 'nejem aca lpe'taqate ca pan quiyim aca 'aalo icona. Ime, ca' inaxañigui ca lodegaxat laqaulatec, ca' aca'maxare pe'taxachigui cá'ogue cá'maq naqaulatec.

₂₂So Jesús ñaqai taata'gue da Jerusalén, ca' taỹalec so na'aateripi chaqai naua na'aaterolqai', ca' rapaxaguinataxantac. ₂₃Ca 'uo' so renataxan, 'naaco':

—Qami' qara'gaxala', ¿sqo vite' cauá'maq nca'lerec?

Ca' so'maxare 'naaco':

₂₄—Nquipichiỹa'pegue' quiyim noxoñiho quiñi cocho'qui' lasom, ma' ỹim shinac quiyim ỹaatqajam 'xoic ma'le ca ỹahotaque inoxono, qam se ishit. ₂₅Ma' ime, ca' cajo lauo' ca 'imec ne'laxashiguim, ỹapogui ca lasom ca 'imec, ca' qamiri pa'aitauec, ca' ỹaxañitapegueu'a ca lasom, 'ñiỹac: “Qami' qara'gaxala', huachire'ogalo qomi'.” Qam ca'maxare saat, ca' 'naac: “Taque', se sa'den ca chigoxoita'gue qamiri.” ₂₆Ca' quiyi, ca qamiri 'ñiỹac: “Qomi' qami' qarqui'ỹaxaua, chaqai qane'taxaua quen, chaqai qami' paxaguinataxañisac quena' senqata'ñi yi qara'a'.” ₂₇Qam ca'maxare 'naapegalo qamiri, 'naac: “Ỹim shinapegalo qamiri quiyim aỹim se sa'den ca chigoxoita'gue. Oquiỹe'e najo qamiá'ogue qamiri, ma' qamiri 'viichitac da se ỹa'maxañi.” ₂₈Ca' quiyi hua'ñi, ca' nohiñitac chaqai quishquintecta' naua rovii quena qavillii, ma' daañiỹau'a ca Abraham, Isaac, Jacob, chaqai ná'ogue na letaxaỹaxaquiripi ñi qota'a, qoyinta'ñi ca lo'ueenataxanqa' ñi'maxare, qam qamiri, ca' qaro'yiỹauec. ₂₉Ma' nac ma'le na qom chicqa'gue da rapiguim chaqai da 'guiñi chaqai da lqodoigue chaqai da lauashiguim, ca' nqa'xanñi quiyim que'e queca lo'ueenataxanqa' ñi qota'olec. ₃₀Ca' queca ma'le 'uo' quena nagui co'uaataxantaho, ca' 'ue ca 'auetaho; chaqai 'uo' ná'maq nagui 'auetaho, ca' co'uaataxantaho ma'le.

₃₁Ca' chaqaiso so na'xa'a, ca novirero saua chicqoraugui na fariseoipi. Ca' qara'qaataxanem so'maxare, qohinac:

—Oquire'e najo, ma' ñi nashi Herodes ỹahotaque ralauachi'.

₃₂Qam so'maxare 'naaco':

—Mohi, 'qaataxañim ma'le cataq co'ỹaxaraic: “Nagui chaqai nete'e so'da'oguiyi na ne'ec lecmaxaiquipi, chaqai somatec na ralolaxaic, ca' nete'e liỹa, ca' yime.” ₃₃Qalaxam no'uen quiyim shic lecocho'qui' quena na'xa'a chaqai nete'e chaqai ca liỹa na'xa'a, ma' se ỹa'maxañi quiyim qaỹalauat ca letaxaỹaxaqui ñi qota'a pa'aatauec quiyi Jerusalén.

₃₄¡'Xoraiqolqa qamiri ñiita'ñi na Jerusalén, ma' qamiri lauachiỹac na la'qaataxanqajanqaipi ñi qota'a, chaqai naxahitalec quena qa' ná'maq nelaatalo qamiri ñi qota'olec! ¡Ỹoto'o' quiyim sahotaque llapoonta' na qachaalaxai'pi, shine'tegue quiyim 'ec aca huaqa'e quena' lapoonta' na llaalqaipioqui', illo'oto naua laua', qam sqa 'maxariñii! ₃₅'Ajñii qamiri, ma'le naua ra'aachiri co'tejelgoto; chaqai aỹim shinapegalo qamiri quiyim tot liỹa huañiua', toco' ma' 'ñiỹac: “Ỹaatqajam chalego loyac da llicyaxac ná'maq nelaatalo qomi' ñi qara'gaxala'.”