Lucas 17

₁So Jesús 'naaco' queso lapaxaguinatqaipi:

—Aỹim ỹaatqajam sa'deenta quiyim sqoue ca 'em quena qom 'ue ca lasauaxaset; qam ¡'xoic le'xoric ca qom quiyim 'ue nqai'en ca lasauaxaset ca liỹa! ₂Ca no'm 'ue ca sham chicqochigui ca lasauaxaset ca 'óna quenajo collo'olqaipioqui', ca'maxare paguec la'maxa quiyim qaicoñira'gue na lqosot ca qa' lodegaxat nopoxoiqataxanaxat, ime, ca' qainaxañigui aca huaaxai. ₃Ca' rovichiỹari'o'.

No'm ca rqaỹa'e' ỹo'uet ca se ỹa'maxañi caqami', ca' taxahita ca'maxare. Ca no'm netogochigui na lauel, ỹadalaxat ca no'ueenataxac, ca' mesqo quirapeguem, 'xoriñi'. ₄'Eno'm chaqai ỹovi' siete ỹo'uet ca se ỹa'maxañi queca na'xa'a, chaqai siete rapilau'a qami' quiyim 'naapega qami', 'naac: “Nagui tot sopilalec 'ue ca so'uet se ỹa'maxañi caqami'”, ca' qami' paguec la'maxa quiyim sqo quirapeguem chaqai 'xoriñisac ca'maxare.

₅Ca' so lelaatqaipi 'nerapego' so Jesús, 'neraco':

—Qami' qara'gaxala', noquigaqchirishiguim ma'le ca qarpi'ỹaxac.

₆Ca' so qara'gaxala' 'naapegalo' saua'maxare, 'naaco':

—Qamiri quiyim 'ue ca rpi'ỹaxaguii quiyim lecaato'lli' ana la ana leenaxat mostaza, ca' 'ñiỹapega ada qo'paq late'ogue', 'ñiỹac: “Oquire'e na ñi'sa'ñi, ime, ca' nqo'ñiri'ingui aso huaaxai”, ca' ada qo'paq na'xaỹaxane'talo qamiri.

₇No'm 'ue ca 'óna caqamiri 'ue ca lelaatec, quiyim ca'maxare chicqa'oga na no'ueenaxa quiyim ỹomat lasaugaxanaxac, loqo'm reloqota'a ca qaloi'ipi, ¿peeta'a qami' shichi' 'ñirapega: “Nenoxoñiro, nqa'amiriñi, qui'i'”? ₈'E', ta'ta'a quiyim 'ñirapega: “'Maxachiriñi ca noq, chaqai quelollira'pegue' aỹim, toco' ma' ime sque'e chaqai ñi'et. Ca' qaigueme shichi' qui'i' chaqai ni'chi' qami'.” ₉Ca' ¿peeta'a shichi' quiyim 'ỹaañitem ca na'aachicyaxaqui' ca relaachiqui' quiyim mashic ỹomat cá'maq lachirelec? 'E'. ₁₀Ca' da 'neeta ma'le caqamiri ma' ỹovita quiyim ime dá'ogue da qailarelgoto qamiri quiñi qota'olec, ca' 'ñiỹac: “Qomi' ma' qomi' nelaatqa, ỹaatqajam qaica ca shinaxague, ma' ná'maq so'ueetqatac chaqainaata ná'maq chi qailaroxolec.”

₁₁Ca co'na' mashic eec so Jesús taigue da Jerusalén, quiichiguilo' yaua 'lauari huauguilo yi Samaria chaqai yi Galilea. ₁₂Ca co'na' ỹovita só'maq hua'ñi na na'aaterolqai', ca' qaỹanaqta'guit so'maxare queso diez qomyipi mashic rishiita na loshicmaxa, qam qoỹoqo'ta yi hueete'e queso'maxare. ₁₃Ca' ỹaualqagui, 'naaco':

—Jesús, qami' napaxaguinataxanaq, qare'xoriñi'.

₁₄Ca' so Jesús co'na' iuana so qomyipi, ca' 'naapego':

—Quiipegue', nachaxañiu'a cá'maq letaxaỹaxanqajanqaipi na qomyipi quena' qaretaxaỹa'pegue' ñi qota'a.

Ca' co'na' queeta'gue so nayic so qomyipi, ca chaqa'ma' imeuec. ₁₅Ca so 'óna queso qomyipi co'na' iuana quiyim mashic imeuec na loshicmaxa, ca' pil, ỹaantacot da na'aachicyaxac ñi qota'olec, ỹaatqajam ỹaualqatari'. ₁₆Ca ỹa'yi'iñi naua le'cootal queca reloqota'ñi so Jesús, ỹaatqajam ỹoviraqta'guit na latap na 'laua, ca' ỹaantacot da na'aachic so'maxare. Qam sojo ỹale, so'maxare le'ec yi Samaria. ₁₇Ca' so Jesús 'naaco':

—¿Mesqai diezo' ca imeuec nqohin na loshicmaxa? ¿Hueesa'gue caua liỹa' nueve? ₁₈Yijo chicqa'a ca liỹa 'laua, ¿chaqaiyiito' yi'maxare 'oonoqui' rapil ỹaanot da na'aachicyaxac ñi qota'olec?

₁₉Ca' 'naapega so ỹale, 'naaco':

—Ñirishiguim ma'le. Ime, ca' qui'. Mashic qami' remi'rec, ma' qami' vi'relec.

₂₀Ca' so fariseoipi inatetac so Jesús lagui novi' cá'maq lo'ueenataxanaxac ñi qota'a ma' ỹoiquentac ná'ogue najo. Ca' so'maxare saat, 'naaco':

—Ca loviraxac da lo'ueenataxanaxac ñi qota'a ma' ỹoiquentac najo, ca'maxare se re'xogui. ₂₁Chaqai se qohinac: “'Ena hueeta'ñi”, loqo'm “'Eda hueeta'gue”; ma' da lo'ueenataxanaxac ñi qota'a mashic hueetanguilo qamiri.

₂₂Ca' 'naapega so lapaxaguinatqaipi, 'naaco':

—'Vio' ma'le caua na'xata' quiyim qamiri viitaque huañiỹa 'eno'chaqai 'oonoqui' quecaua na'xata' najo ỹale llaalec ma' liỹa novi', qam sqai huañiỹa. ₂₃Ca' quiyi ma'le, ca' qohiñiỹapegaxaua': “Najo hueete'e”, loqo'm “'Iyi hueeta'ñi.” Qam mesqo quii, chaqai se coỹari'tegue. ₂₄Ma' 'nejem quiyim qaiuana ca lauaq ca nqai'legaxa quena' nqai'lliguiñi quená'ogue na piguim, ca' chaqaida 'neeta ma'le ca loviraxac najo ỹale llaalec ma' ỹovirelec quiyim ca na'xa'a quiyim rapil. ₂₅Qam 'au quiyim 'xoic ma'le ca le'xoric, chaqai se qaicoñiguit quena qomyipi hueetauguilo nauajo na'xata'. ₂₆Ca 'nejem ma'le da 'neete' saua ñaxari hueetauguilo nallaaqo' so Noé, ca' chaqaida 'neeta ma'le caua na'xata' ma' rapil najo ỹale llaalec. ₂₇So qomyipi que'eetac, chaqai ne'teetac, shiltecta' chaqai ỹaantapeguec ana llaallipi quiyim 'on, chi ỹovireta'a so na'xa'a co'na' so Noé inoxonougui aso lo'ueenata qom lahi' huaxaỹaqse. Ca' naco' so ỹaxat, ca' nomachichiguiñi sá'ogue so qomyipi. ₂₈Ca' chaqaida 'neete' saua ñaxari hueetauguilo so Lot: so qomyipi que'eetac, chaqai ne'teetac, chaqai chi nemeentecta', chaqai danaxantac, chaqai ỹo'ueeteta'pe naua la'aate'. ₂₉Qam co'na' so Lot ca'e yi na'a' Sodoma, ca' naco' so norec ỹalliqui'chiguit na quiquiaxaic, chicqo'ot na piguim, ca' ỹalauat sá'ogue so qomyipi. ₃₀Ca chaqaida 'neeta ma' ỹovi' ca na'xa'a quiyim liỹa nachaxan najo ỹale llaalec.

₃₁Ca' quecajo na'xa'a, no'm 'ue ca hueetalec na lelaq ca lauo', chaqai 'ue ca hueetaugui louenec ca lauo', se renotec quiyim queu'a; chaqai no'm 'ue ca hueeta'oga ca no'ueenaxa, mesqo pila'a ca la'a'. ₃₂Totaxan 'laxachiỹo' da 'neeta na'le aso loua so Lot. ₃₃Ma' ca ỹahotaque nca'laxatec da nachaalataxac, ca' na'laxatañi; qam ca na'laxatañi da nachaalataxac, ca' chaqaica cá'maq nca'laxatec.

₃₄Ca' ỹim shiñiỹapegaxaua' quecajo pe 'vio' ma'le caua napaata'anta', qam 'oonoqui' ma'le ca qaỹauec quecaua'maxare, qam ca liỹa qano'ueenaqtañi. ₃₅Chaqai 'vio' ma'le caua dos 'aalo ra'daxanta'pe, huaqata'ta', ca' 'oono'lli' ma'le aca qaỹauec, chaqai aca liỹa qano'ueenaqtañi. ₃₆Chaqai 'vio' ma'le caua dos ỹale' hueesalec na no'ueenaxa, ca' 'oonoqui' ma'le ca qaỹauec, qam ca liỹa qano'ueenaqtañi.

₃₇Ca co'na' qara'qaachigui dajo, ca' qainat so'maxare, qohinaco':

—Qami' qara'gaxala', ¿canchaqai hua'gue ma'le dajo?

Ca' so'maxare 'naaco':

—Cá'maq hueeta'gue ma'le ca leuaxaic, ca chaqaica ca hua'ñi ca lapooqo' na ratecsanyipi.