Lucas 19

₁Ca co'na' so Jesús queetaugui yi na'a' Jericó. ₂Ca' queso na'a' na'ñi so ỹale nesallaxanec, leenaxat Zaqueo. So'maxare la'gaxala' ná'maq ỹacona'piguit ana nishiuete so nashi na'ñi yi Roma. ₃Ca' so'maxare ỹahotaque ỹauana so Jesús. Qam se iuana, ma' 'xoic na qom, chaqai se ladocoqui'. ₄Ca' ni'guinshiguim 'aua'gue da taata'gue so'maxare, ma' ỹahotaque quiyim ỹauana. Ime, ca' quishi'megue aso qo'paq leenaxat sicómoro na'ñigui so nayic quiyí'maq sham que'tegue so Jesús. ₅Ca' so Jesús co'na' ỹovita so'maxare, ca ra'ỹaashi'megue. Ca 'naapego':

—Zaqueo, chaqa'ma' renochirec, ma' ỹim sahotaque quiyim shicpegue' ca ra'aachi' quena na'xa'a.

₆Ca' so Zaqueo ỹaatqajam chaqa'ma' renotec, ca' ỹa'maqachigui lauel, ca ỹauegueu'a ca la'a' so Jesús. ₇Ca co'na' qaỹauanchigui dajo, ca chaqa'ma' 'ue na qaỹa'xat, qohinaco': “So Jesús quepegue' yi la'a' so sauaqhuaic.” ₈Ca' so Zaqueo nachajñi, ca 'naaco' queso qara'gaxala', 'naac:

—Qami' ỹa'gaxala', aỹim ma'le sasectaqchigui na lavinñi na isallaxa. Ime, ca' saanem na 'xoraiquipi. Chaqai no'm 'ue ca socacha ca louenec chi sayinta, ca sopilaqtem, qam cuatro nqaishine'.

₉Ca' so Jesús 'naaco':

—Nagui quena na'xa'a, ca novira'o' da nca'laxa najo na'a', ma' dajo ỹale qai'neeta llaalec so Abraham. ₁₀Ma' najo ỹale llaalec, na'maxare anac quiyim idaantaque chaqai quiyim nca'laxatec ná'maq ỹo'meetac qomyipi.

₁₁Ca co'na' so qomyipi ñaq na'xaỹaxantapega so Jesús queda ỹa'xatetac, ca so'maxare ỹa'uo' ca raloqojnaxana, ma' mashic tot qoỹoqaque yi Jerusalén. Ma' so qomyipi pe'taxantaque quiyim mashic ỹovita ca laloqo' quiyim ñi qota'a ỹoiquentac ná'ogue najo. ₁₂Ca' so'maxare 'naaco':

—'Uo' so ỹale chicqaugui ná'maq ỹaatqajam 'maxaraiquipi. Ca so'maxare eec, quepegue' ca liỹa 'laua qoỹoqo'ta quiyim qoỹano nashi. Ca' ma' ime, ca rapil. ₁₃Ca co'na' ipalata'a eec, ca roỹaxanalo saua diez lelaatqa. Ca ỹaanem añi 'oono'lli' que'óna quesauá'maq diez nichiróla, qam cañi 'oono'lli' 'xoic lecaic. Ca' 'naapegalo': “'Ueenataxañiguiỹo' anajo nam, nimiiñitac, toco' ma' liỹa ñovi', yapil.” ₁₄Qam so qomyipi chi la'a' sojo 'laua ỹaatqajam ro'ỹa so'maxare. Ca' qaỹa'vio' saua qailate' coỹaresalec so'maxare quiyim qohinac: “Qomi' se sa'maxarenaq quiyim qarashi najo ỹale.” ₁₅Qam qaiyiita qoỹano quiyim nashi so'maxare. Ime, ca' rapila so la'a'. Ca co'na' mashic novi', ca roỹaxane'ogalo saua lelaatqa quesauá'maq ỹaanema aso lam, ma' ỹahotaque quiyim ỹa'den ỹote' aca lauegue que'óna. ₁₆Ca' so 'auaxaic noviro, 'naaco': “Qami' ỹa'gaxala', ana qadami' ỹovi' diez ayi dalaxai lauegue.” ₁₇Ca' so nashi 'naaco': “Ajá'a, maq no'uen, ỹa'maqachiguiñi, ỹaatqajam qami' no'uen nelaatec. Ma' qami' na'maxachite' quecá'maq sqa lo, ca' nagui qami' sanagui quiyim qami' nashi, reloxoiqachicshiqui' ca diez na'aateripi.” ₁₈Lotqai nac só'maq co'uaataxantaho, ca 'naaco': “Qami' ỹa'gaxala', ana qadami' ỹovi' cinco yaua laueque dalaxai.” ₁₉Ca' qai'neeta qohinapega so'maxare: “Qami' qai'neeta qami' sanagui nagui quiyim qami' nashi, ra'irelgoto caua cinco na'aate'.” ₂₀Lotqai anaco' só'maq pa'aatec, ca 'naaco': “Qami' ỹa'gaxala', 'ana ana qadami'. Ana'maxare chi sa'maxat, sellaalec ca colligue', ₂₁ma' ỹim 'ue da ỹoqolonaxa caqami', ma' ỹaatqajam qami' pagaxalaic quiyim coñita cá'maq se ralamaxachi' chaqai quiyim naqachi' cá'maq hua'ñi ca se qadanaxanqachi'.” ₂₂Ca só'maq nashi 'naaco': “Qami' nelaatec se no'uen, quedá'maq chi ra'qaachiqui', ca' chaqaida da sachigoxochichigui ca nouaxanaxashichi' quiyim sa'ue. Qami' mashic 'yiiñi' quiyim ỹim pagaxalaic quiyim secona cá'maq se ỹalamaxaret, chaqai ñaqat ana la cá'maq sqai ỹanecsec. ₂₃Qam ¿chi'neco' sqai 'ỹaañirouguio' añí'maq lahi' ana nam, qaiyi sacoñiguit aca lauegue ana ỹam ma' ỹovita quiyim yapila na ỹa'a'?” ₂₄Ca' 'naapega ná'maq hueete'e yi'maxare, 'naaco': “Ñaqa coñiỹa ada chiróla hueeto'ot da'maxare. Ime, ca' 'ỹaañim dá'maq hueeto'oto daua diez.” ₂₅Ca só'maq qomyipi 'naaco': “Qami' qara'gaxala', qam da'maxare mashic hueeto'oto daua diez chiróla.” ₂₆Ca só'maq nashi 'naaco': “Aỹim shinapegalo qamiri quecá'maq 'ue ca hueeto'ot, ca' ca'maxare ỹapacauec nqohin ca qoỹaanem; ca cá'maq qaica ca hueeto'ot, vire'ta quiyim qarouootaxana'gue cá'maq qaica ca nishaaque hueeto'ot. ₂₇Qam ná'maq ñpa'guenaxauaripi ná'maq se ỹa'maxaren quiyim aỹim nashi, ca' naviguiu'a aỹim, ca' lauachii ma'le quena seloqota'ñi.”

₂₈Ca co'na' ime ỹa'xat dajo so Jesús, ca' eec taỹa'gue da Jerusalén. ₂₉Qam co'na' mashic ipalatau'alo yaua na'aaterolqai' Betfagé chaqai yi Betania, sqoỹoqaque yi qoỹoqoshi'megue 'laua leenaxat loma' ana qo'paq olivo. Ca' hua'ñi, ca ilate' saua dos lapaxaguinatqa. ₃₀Ca 'naapegalo':

—Quiipegueto naua na'aaterolqai' sqoỹoqapigui quenajo. Ca ma' viriho, huañijlec ma'le ca 'ashin qaicoñiretari'. Ca'maxare saqa' ỹauanapega qoyinalec. Ca' sohiuec ma'le, ca' naviguiiri' quenajo. ₃₁Qam no'm 'ue ca inate' qamiri, 'naac: “¿Chi'negue ma' sohiuec?”, ca' 'ñiỹac: “Ñi qara'gaxala' ỹouen ñi'maxare.”

₃₂Ca' saua lapaxaguinatqa que', ca' ipaquichigui dá'ogue dá'maq 'naac so Jesús. ₃₃Ca co'na' ỹosoosapeguec so 'ashin, ca' 'nerac sauá'maq lalo' so 'ashin. Ca renataxane':

—¿Chi'negue ma' sohitapeguec na 'ashin?

₃₄Ca' saua'maxare 'neraco':

—Qaỹouen ñi'maxare quiñi qara'gaxala'.

₃₅Ca' qaỹauega so'maxare so Jesús. Ime, ca qaillaalgoto saua nepooto' so 'ashin, ca' qarenotaxanaxanlec so Jesús so'maxare. ₃₆Ca co'na' queeta so Jesús, ca qaipiguiñi'ñigui so llic na napoxoquiripi. ₃₇Ca co'na' qaipalata'a so ca'megue quesó'maq qoỹoqoshi'megue 'laua leenaxat loma' ana qo'paq olivo, ca' sá'ogue só'maq huelec so'maxare chaqai queeta'pegue', ca ỹaualqatagui queda netoonaxac. Chaqai qaro'ueenaxantalec ñi qota'olec quená'ogue ná'maq se qaiuanapega, qam qaiuanchigui quiyim ỹo'uet so'maxare. ₃₈Ca' qohinac:

—¡Ỹaatqajam no'uen da llicyaxac na qarashi, ma' naquetaugui da leenaxat ñi qara'gaxala'! ¡'Uo' ma'le ca na'maxa quena piguim chaqai quedá'maq lecaic ñi qota'olec!

₃₉Ca' na fariseoipi ỹalequetaho queso qomyipi 'naaco':

—Qami' napaxaguinataxanaq, cochaqai', i'maqata nqai'ñi' ná'maq coỹareta'pegue' qami'.

₄₀Qam so Jesús 'naaco':

—Shinapegalo qamiri no'm nauajo i'machiñi, ca na qaripi ỹaualaq.

₄₁Ca co'na' ipalatau'a yi na'a' lodegaxat Jerusalén, ca co'na' iuana yi'maxare, ca' so'maxare noỹenlec. ₄₂Ca 'naac:

—¡Quetaxan 'yiiñi'o' quenajo na'xa'a'e', quecá'maq ishit ỹaañiraxarom ca na'maxa! Qam nagui dajo nañoxotetañi, ca sqai huañita. ₄₃Ma' ma'le novitalo qami' caua na'xata' se no'viiñi quiyim naua npa'guenaxauachi' no'xonshiguim ca lquepaqataxanaxat, ca chicqote'ogalo na lo'goxonaxat ro'o'e'. ₄₄Ca' nenaxañi qami' quena 'laua. Ime, ca' qaỹalauat ná'maq neetalec na ra'aachi', chaqai sqaica ca qano'ueenaqtañi caqami', vire'ta quiyim ca qa' hueetalec ca liỹa; ma' qami' sqa 'yiiñichiguit ca laloqo' quiyim novita qami' ñi qota'olec.

₄₅Ca' so Jesús inoxonougui aso no'ueenaxanaxaqui late'ogue' na'ñi yi Jerusalén. Ime, ca' chaqa'ma' ỹo'daauec sá'ogue só'maq nemeenaxanyipi chaqai ná'maq nemeenaxauaripi quiyi'maxare. ₄₆Ca' 'naapegalo':

—Naua nerecse' la'qaatqa ñi qota'a, 'nerac: “Ná'maq ỹa'a', la'a' ca qouagaxainaxac”; qam qamiri 'viichii quiyim nqañoqotqa' na cuataxairipi.

₄₇Ca saua'que saua na'xata' so Jesús rapaxaguinataxantac caso no'ueenaxanaxaqui late'ogue'. Qam na lashillipi na netaxaỹaxanqajanqaipi quena' qaretaxaỹa'pegue' ñi qota'a, chaqai ná'maq rapaxaguinataxanta'pegue na naqataxaquipi, chaqai qai'neeta na lashillipi na qomyipi, idaantaque ca la'maqa' quiyim ỹalauate' so Jesús. ₄₈Qam se qaỹanata cá'maq qohine'tegue, ma' sá'ogue só'maq qomyipi ỹaatqajam i'maqatam, na'xaỹaxantapega.