Malaquías 1

₁Ca dajo dá'maq la'qaatco' na'le ñi qara'gaxala' qota'olec na' 'naapega so qomyipi quiyi Israel, ỹa'xat nqai'en so letaxaỹaxaqui leenaxat Malaquías.

₆Ñi qara'gaxala' sqaica lqalanec 'neetasa' da la'qaatec queso netaxaỹaxanqajanqaipi: Na ñaalqaipi imaqachin na leta'allipi, chaqai na ñaaqainatqaipi se napacalec ca ỹa'xat na na'coororipi. Qam no'm ỹim qata'ahi, ¿chi'negue ma' napaguiiteguelec quena' 'ue dá'maq sa'xat? No'm ỹim na'coori, ca ¿chi'negue ma' se na'xaỹaxañiua'? Qamiri se rqo'chiiua', qam qaiyiita 'ñiỹac: ¿Negue' cá'maq 'neeto' quiyim se qarqo'ta qami'? ₇Qamiri nodohiuo na pan sqa taiguit qanodouo, qam qaiyiita nataxañii: ¿Negue' cá'maq 'neeta quiyim so'ooqochitaq qami'? Qamiri yo'ooqochichii quena 'neetapigui qavillii quiyim ada ncopatoxonaxalate caỹim qaica ca 'negue nqohin, ₈chaqai 'ec 'maxaraic nqai'ñii quiyim 'ỹaañiỹot aỹim ca rachitaxanataxanaxachii isecỹac quiyim qai'laq, 'iiraic loqo'm ralolaxaic.

¡Mohi, quiipegue' na nashillipi, dohiuo ca rachitaxanataxanaxachii! Ca' ¡'ajñii, tegue' chi nqo'te'ta cá'maq ramii 'nejem ná'maq nodohiuo! ₉Ca' qamiri shiilahi nagui ñi qota'olec quiyim nqouagoxoric. Qam no'm chaqaidaata 'neetari' nqai'ñii ca rachitaxanataxanaxachii, ca 'neeto' 'neetapigui qavillii quiyim ỹa'maqachigui lauel ñi qota'olec huaqui'chiguita qamiri. Ñi qara'gaxala' sqaica lqalanec 'neetasa' da la'qaatec: ₁₀¡Saxanchi' 'ue cá, caqamiri ishit ỹapoguilo naua lasomi' ñi no'ueenaxanaxaqui, qaiyi totqai liỹa qaicopata'a ca norec cañi ncopatoxonaxalate, qam qaica ca 'negue! Ma' tot ñitoonta'guelo qamiri, chaqai tot secoñiguit ná'maq rachitaxanataxanaxachii. ₁₁Quená'ogue na qomyipi quena 'laua imaqachintac aỹim; chaqai quenaua'que naua lahil na 'laua qaicopata'a na nichiinaxanaxat quiyim qayimaqachin chaqai qaỹa'ue na nachitaxanataxanaxat, qam chalego la'maxa. ₁₂Qam qamiri yo'ooqochichii, ma' 'neetapigui qavillii quiyim ishit qanaqaica'a ada iqui'ỹaxalate ncopatoxonaxalate, chaqai quiyim qanaqaica'a ná'maq na'ic hueetalec ada'maxare. ₁₃Ca' qamiri 'ñiỹac: ¡Qomi' mashic qarco'teuec quedá'ogue dajo! Ca chaqa'ma' se rqo'chiiua'. Chaqai 'neetapigui qavillii quiyim 'ue ca ñitoonaxac quena' nodohiuo ca rachitaxanataxanaxachii, qam rocataxachii, loqo'm aca huaca 'iirai, loqo'm ralolaxai. ₁₄¡Se no'uen da naatalec da nachaalataxac cá'maq choxonataxanaxai, cá'maq 'naac quiyim ỹaanot aỹim ca isecỹac no'ueenta, ỹachigoxotaugui na laloipi. Ime, ca' ỹaanot aỹim ca 'ue ca la'aqset! Ỹim ná'maq sapacauec quená'ogue na nashillipi, chaqai aỹim nqolonaxat quená'ogue na ỹoreta'oguit qomyipi.

Dajo dá'maq 'naac ñi qara'gaxala' sqaica lqalanec.