Mateo 1

₁Anajo chaqana aná'maq naneraxalate só'maq 'auaxaic leta'allipi so Jesucristo, só'maq chigoxougui so nashi David chaqai so Abraham.

₂So Abraham chaqaiso so leta'a so Isaac, ca' so Isaac llaalec so Jacob, ca' so Jacob llaalec so Judá chaqai so lqaỹaripi. ₃Ca' so Judá llaalec so Fares chaqai so Zara, ca' aso late'e' saua'maxare leenaxat Tamar. Ca' so Fares llaalec so Esrom, só'maq leta'a so Aram. ₄Ca' so Aram llaalec so Aminadab. Ca' so Aminadab llaalec so Naasón, só'maq leta'a so Salmón. ₅Ca' so Salmón chaqai aso Rahab llaalegue' so Booz, chaqai so Booz chaqai aso Rut, ca' llaalegue' so Obed, só'maq leta'a so Isaí. ₆Ca' so Isaí llaalec so nashi David. Ca' so David co'na' o'ñiguit aso shi'co' quen loua so Urías, ca saua'maxare llaalegue' so Salomón.

₇Ca' so Salomón llaalec so Roboam, só'maq leta'a so Abías. Ca' so Abías llaalec so Asa. ₈Ca' so Asa llaalec so Josafat, só'maq leta'a so Joram. Ca' so Joram llaalec so Uzías. ₉Ca' so Uzías, ca' llaalec so Jotam. Ca' so Jotam llaalec so Acaz, só'maq leta'a so Ezequías. ₁₀Ca' so Ezequías, ca' llaalec so Manasés. Ca' so Manasés llaalec so Amón, só'maq leta'a so Josías. ₁₁Ca' so Josías, ca' llaalec so Jeconías chaqai saua lqaỹa' quecá'maq vigui na' noxonec so Israel llaalqaipi, ca' qaỹauega yi Babilonia quiyim ncoñiitecseripi.

₁₂Ca co'na' ime dajo, ca' so Jeconías, ca' llaalec so Salatiel, só'maq leta'a so Zorobabel. ₁₃Ca' so Zorobabel, ca' llaalec so Abiud. Ca' so Abiud, ca' llaalec so Eliaquim, só'maq leta'a so Azor. ₁₄Ca' so Azor, ca' llaalec so Sadoc. Ca' so Sadoc, ca' llaalec so Aquim, só'maq leta'a so Eliud. ₁₅Ca' so Eliud, ca' llaalec so Eleazar. Ca' so Eleazar, ca' llaalec so Matán, só'maq leta'a so Jacob. ₁₆Ca' so Jacob, ca' llaalec so José, só'maq loua aso María. Ca aso'maxare late'e so Jesús, só'maq leenaxat nashi nca'laxaqui.

₁₇Ca quiyim ima'ta' sojo neta'allipi, ca' ỹovi' catorce chicqochi'ñi queso Abraham, ca' ỹovita so nashi David. Ca' ỹovi' catorce só'maq liỹa neta'allipi chicqochi'ñi so David, ca' chi ỹovireta'a so na'xa'a na' qaỹaueguegue da Babilonia so llaalqaipi so Israel. Ca lotqai ỹovi' catorce so liỹa neta'allipi, ca' chi ỹovireta'a so na'xa'a na' ne'qaañi so nashi nca'laxaqui.

₁₈Da 'neeta da ne'xaỹoqsoxoc so Jesucristo 'neetasa': Aso late'e María co'na' mashic letaxaỹaxaua so José quiyim loua. Chaqai na' saqa' noua', qa' aso'maxare 'man, chicqochigui da lquesaxanaxa so Espíritu Santo. ₁₉So José, só'maq ỹa'maqatañi quiyim loua, ỹaatqajam no'uen ỹale. So'maxare se iuagaxatec ỹa'xat dá'maq 'neetari' aso María. Ta'ta'a quiyim ỹahotaque ỹaxanñi aso'maxare, qam qaica ca liỹa ỹa'den nqai'en quena qom. ₂₀Ca co'na' ra'deenataxantac quecá'maq 'neeta'gue dajo, ca' re'guemacho' so lelaatec ñi qara'gaxala' piguim le'ec. Ca' qohinapego':

—José, ma' qami' chicqoiraugui so nashi David, se ro'chi'i' quiyim coñita añi María quiyim roua'e'. Ma' yí'maq ne'qaañi ma'le llaalec añi'maxare chicqo'ot so Espíritu Santo. ₂₁Ca ma' ne'qaañi yi llaalec, ca ñitegue leenaxat Jesús. Leenaxato' ma'le dajo, ma' nca'laxatec ma'le na lalamaxaret lauo' quena lasauaxaset.

₂₂Ná'ogue najo 'uo' na'le, qaiyi ipaquichigui da la'qaatec ñi qara'gaxala' na' retaqaugui so letaxaỹaxanqajnec, 'naacsa':

₂₄Ca co'na' so José nelouec, ca ỹo'uet 'ne'tegue dá'maq 'naaco' na'le ca lelaatec ñi qara'gaxala' piguim le'ec. Ca icona aso María quiyim loua. ₂₅Qam se naqajta' quiyim 'neetasa'lo caua noua'. Ta'to'o' na' ime co'o, ca ỹanegue leenaxat Jesús nqai'en so llaalec.