Mateo 15

₁Ca' qanqo'neu'a so Jesús quesaua fariseo chaqai saua napaxaguinataxana' quena naqataxaquipi chicqora'gue da na'a' lodegaxat Jerusalén. Ca renataxane':

₂—¿Chi'neco' nauá'maq rapaxaguinataxahi' ma' sqai querelec dá'maq no'ueenataxac só'maq 'auaxaic qareta'allipi? Ma' se ipacqajñigui da leloxoỹaxac quiyim quiỹo' naua lqai'laqate' quena' saqa' que'e.

₃Ca' so Jesús inate'o' saua'maxare, 'naaco':

—¿Chi'neco' qamiri qai'neeta sqai na'xaỹaxañiỹalo naua qota'a lelaataxanaxaco, ma' pacqajñiỹauec naua no'ueenataxagohi? ₄Ma' ñi qota'olec 'naac: “Se napaquiralec ca qataa'i' chaqai aca qachii'i'”, chaqai “Cá'maq se no'uen ca ỹa'xat queca leta'a loqo'm caca late'e, ca' qaỹalauat.” ₅Qam qamiri 'ñiỹac ca qom ishit 'naac queca leta'a loqo'm caca late'e: “Se seshit sotauañi', ma' ná'ogue ná'maq 'ue caỹim shi'gue saanot ñi qota'olec.” ₆Ca' canchaqaica quiyim 'naac dajo, ca' tot ishit ỹotauan ca leta'a loqo'm aca late'e. Ca' chaqaida 'neeta caqamiri quiyim qaica ca 'negue nqai'ñii dá'maq lelaataxanaxac ñi qota'olec, ma' pacqajñiỹauec dá'maq chi no'ueenataxaguii. ₇Ca' ¡qamiri 'ñiitapega quiyim ỹaatqajam qamiri llaalqa ñi qota'olec! Ca dá'maq 'ñiitari' ỹaatqajam taachigui dá'maq ỹiriño' na'le so letaxaỹaxanqajnec ñi qota'a leenaxat Isaías, co'na' 'naac:

₁₀Co'na'le, ca' so Jesús roỹaxanougui so qomyipi, ca 'naaco':

—Na'xaỹaxañiỹa da ỹa'qaatec, ca' 'yiiñita ma'le: ₁₁Ná'ogue ná'maq ỹa'ic na qom se napio'xot da nachaalataxac. Ta'ta'a ná'maq la'qaatqaipi chicqotapougui na lap, chaqaina ná'maq ishit napio'xot da nachaalataxac.

₁₂Ca' saua lapaxaguinatqa so Jesús noquiicra'a so'maxare, ca 'neraco':

—¿'Yiiñi' quiyim so fariseoipi ỹaatqajam ro'o na' 'xaỹa da ra'qaachiqui'?

₁₃Qam so Jesús 'naaco' quesaua'maxare:

—Canchaqaca nanecse quiyim sqa ỹanñi ñi ita'a qota'olec neeta'gue da piguim, ca' qanaqat liỹaashi'me' na lpa'a'. ₁₄'Xañiỹac, ma' na'maxare se neuanñi chaqai ỹashaxantac ná'maq liỹa se nauanñi. Chaqai no'm cá'maq se nauanñi ỹauequetegueri' cá'maq liỹa se nauanñi, ca' caua'que tari'ñigui aca ni'ỹa ma'le.

₁₅Ca' so Pedro 'naaco' queso Jesús:

—Choxochitema qomi' cá'maq leloxoỹaxac dá'maq raloqojnaxanaxagui'i'.

₁₆Ca' so Jesús 'naaco':

—Ca' ¿qamiri qai'neeta sqa 'yiiñiỹo' cá'maq 'neeta dajo? ₁₇¿Sqa 'yiiñiỹo' quiyim ná'ogue ná'maq taatougui na qodap ta'ña añi qaracom, ime, ca' lotqai nenoxonec quena qaroshicmaxa? ₁₈Qam ná'maq chicqaugui ñi qodap chicqa'ña añi qare'taxanata. Ca' dajo dá'maq ishit napio'qochit ca nachaalataxac ca qom. ₁₉Ma' añi le'taxanata chicqa'ña ná'maq se no'uen na'deenataxanaxac, 'neetasa': qaỹalauat ca liỹa qom, lapaatapi'ñi' aca se loua, nedequentac, da nocataxac, da na'maachic, chaqai quiyim qainaqatac ca liỹa. ₂₀Ca' nauajo nauá'maq napio'qochite' ca nachaalataxac ca qom. Qam dá'maq quiyim nqui'ỹaxac, ca' se qaipacqajñigui da leloxoỹaxac quiyim qaiquiỹo' naua nqai'laqate', da'maxare se napio'xot ca nachaalataxac ca qom.

₂₁Ca' so Jesús ca'e yí'maq hueete'e, ca' quepegue' yi 'laua huaugui yi Tiro chaqai yi Sidón. ₂₂Ca' aso 'aalo lase yi Canaán neetalec yijo 'laua, so'maxare ỹaualqata'guit nacpegue' so Jesús, 'naaco':

—¡Qami' ỹa'gaxala', qami' llaalec so nashi David, yi'xoriñi'! Ma' ayi ỹaale 'ue ñi le'ec lecmaxaic, ca' chalego da le'xoric nqai'en.

₂₃Qam so Jesús sqa saata aso'maxare. Ca' saua lapaxaguinatqa ne'xoresente' queso'maxare, 'nerac:

—Vite cá'maq ỹahotaque, ma' na'maxare coỹaretaho coqomi' ỹaualqata'guit.

₂₄Ca' so Jesús 'naaco':

—Ñi qota'olec yilata qainaata na llaalqaipi so Israel, ma' 'neetari' aca qagreta ỹo'meetajlec.

₂₅Qam aso 'aalo noquiigo, ca ỹa'yi'iñi naua le'cootal quiyí'maq hueete'e so Jesús. Ca 'naaco':

—¡Qami' ỹa'gaxala', yotauañi'!

₂₆Ca' so Jesús 'naaco':

—Se ỹa'maxañi quiyim qarouootaxana'gue ca pan loq na ñaalqaipi, ca' qoỹaanougui na pioqripi.

₂₇Qam aso'maxare 'naaco':

—Ajá'a, llic, qami' ỹa'gaxala', qam vire'ta na pioqripi ỹa'ic quen na lete chicqalec na lqui'ỹaxala' ná'maq na'co'.

₂₈Co'na'le, ca 'naaco' so Jesús:

—¡Qami' 'aalo, ỹaatqajam chalego lecaic da rpi'ỹaxaqui'! Ca' nagui, ca ỹaatqajam ipaquichigui cá'maq vi'saque.

Ca co'na' qohinac dajo, ca chaqa'ma' imeuec aso llaale.

₂₉Ca' so Jesús ca'e yí'maq hueete'e, ca' queeto'ot na lahi aso latogot late'ogue' quiyi Galilea. Co'na' ime, ca taashi'megue aso quemaralec ladocai. Ca na' ỹovijshiguim, ca' nqa'xanñi quiyi'maxare. ₃₀Ca' 'xoic so qomyipi ỹovira'a só'maq neeta'ñi so'maxare. Qanodou'a na chisaq, qai'laq, sqaicaua la'qaatqa, qaica lqai'laxat, chaqai 'xoic na liỹa ralolaxaic qailla'ñi yi reloqota'ñi so Jesús. Ca so'maxare imeuec nqai'en. ₃₁Vire'ta quiyim na qomyipi 'ue na le'laxa quena' iuana retaqa ná'maq qaicaua naua la'qaatqa, ná'maq qaica na lqai'laxat naloochiriñi naua lqai'laqate', ná'maq chisaq qauaata, chaqai ná'maq qai'laq liỹa neuanñi. Ca' quiyi, ca' qaimaqachintac ñi qota'a ñí'maq huelec ná'maq llaalqaipi so Israel.

₃₂Co'na'le, ca' so Jesús roỹaxanalo saua lapaxaguinatqa. Ca 'naaco':

—Ỹaatqajam 'ue da i'xorenataxanaxa quena qomyipi, ma' mashic ỹovite' tres na'xata' quiyim hueete'e najo, qam qaica cá'maq ỹa'ic. Ca' se sa'maxaren quiyim pil, se que'e, 'neeto' 'ue ca ileueta quena nayic.

₃₃Co'na'le, ca' saua lapaxaguinatqa 'neraco':

—Qam ¿nega'ỹo' quet cá'maq shinqata'gue quiyim sahoqai ca loq na 'xoic qomyipi? Ma' ná'maq seuqatalec sqaica ca qom naalec.

₃₄Ca' so Jesús renataxano':

—¿Ỹote' caua paañi' ñaqa 'vii caqamiri?

Ca saua'maxare 'neraco':

—Siete, chaqai yaua sqo vite' nalliñirolqai'.

₃₅Ca so'maxare 'naapega so qomyipi quiyim nqa'xanñi quena 'laua. ₃₆Ca' so Jesús iconalo saua siete paañi' chaqai saua nalliñi', ca ỹaanot da na'aachic ñi qota'olec. Ca na' ime, ca' ỹasectaxachiguilo, ca' ỹaanouguilo saua lapaxaguinatqa. Ca' saua'maxare, ca imeendec queso qomyipi. ₃₇Ca sá'ogue que'e chaqai quema'. Ca na' ime, ca' qalapoon só'maq ni'ỹoxot. Ca no'qaate' saua siete canastos quesó'maq lahillipi ni'ỹoxot. ₃₈Ca só'maq que'e 'uo' ca ỹovi' cuatro mil ỹalliripi, qam se qanaloqochin so 'aallipi chaqai so ñaaqaipioqui'. ₃₉Co'na' ime, ca' so Jesús ỹopilaxat so qomyipi, ca renojñigui aso qom lahi' huaxaỹaqse, ca taita'a yi 'laua leenaxat Magdala.