Mateo 16

₁So fariseoipi chaqai so saduceoipi eec ra'ajnaxana so Jesús chaqai quiyim sha'apiguito' 'ue ca chicqochigui nqai'en ca lasauaxaset. Ca' qaỹashiila so'maxare quiyim ỹo'uet ca netanec se qaiuanapega chicqo'ot nqai'en na piguim. ₂Qam so'maxare 'naaco':

—Quena' lavit, ca' qamiri 'ñiỹac: “Ỹaatqajam no'uen na'xa'a nete'e, ma' toc da lliguiñi añi ra'aasa.” ₃Chaqai quiyi nete'etam, ca' qamiri 'ñiỹac: “Ỹaatqajam se no'uen na na'xa'a, ma' ỹaatqajam toc na piguim chaqai napalligui.” ¡Qamiri 'ñiitapega qamiri llaalqa ñi qota'olec! Ỹaatqajam 'yiiñii 'xachii dá'maq leloxoỹaxac na piguim. Qam sqa 'yiiñiguita nauá'maq netanqa nagui quenaua na'xata' seuqatauguilo. ₄Najo qomyipi hualoxonaq chaqai mashic ca'e ñi qota'olec, na'maxare rashiilaxantaque quiyim qaỹo'uet ca netanec se qaiuanapega. Qam se qoỹaanem ca liỹa netanec, qaisoota so netanec na'le queso Jonás.

Ime, ca' no'ueenaqchichiguiñi so qomyipi, ca' eec.

₅Ca co'na' saua lapaxaguinatqa so Jesús ỹovirereta queda laseego aso latogot late'ogue', ca couare'e i'xate' ca pan. ₆Ca' so Jesús 'naaco' quesaua'maxare:

—Ñaqai 'ajñii, rovichii'o' aná'maq pe'taxachigui na pan hueetaugui na fariseoipi chaqai na saduceoipi.

₇Ca' saua lapaxaguinatqa retaxaỹata', 'neraco':

—Dajo 'naac, ma' sqaica ca ñi'xataq pan.

₈Ca' so Jesús retan, ca 'naaco' quesaua'maxare:

—¿Chi'negue ma' 'ñiỹac quiyim qaica ca pan caqamiri? ¡Ỹaatqajam cocho'qui' da rpi'ỹaxaguii qamiri! ₉¿Qaiyiita saqa' 'yiiñii, chaqai couahi'e dajo quesaua cinco paañi' na' semeendec queso cinco mil qomyipi, ca' ỹote' saua canastos rapooñicshii na'le? ₁₀Chaqai ¿vire'ta se no'viñigue quesaua siete paañi' na' semeendec queso cuatro mil qomyipi, ca ỹote' saua canastos queso rapooñicshiguii na'le? ₁₁¿Negue' cá'maq 'neeto' ma' se retañii quiyim se sa'xatetac ca pan na' setaqa, na' shinac quiyim rovichii'a ana pe'taxachigui na pan hueetaugui na fariseoipi chaqai na saduceoipi?

₁₂Co'na'le, ca' ỹa'deene' quiyim so Jesús sqai 'naac quiyim qaỹoueta'a aná'maq re'qoochigui pe'taxachigui na pan, ta'ta'a quedá'maq lapaxaguinataxanaxac na fariseoipi chaqai na saduceoipi.

₁₃Ca co'na' so Jesús ỹovijta'a yi 'laua Cesarea yí'maq leloxoiqateguesec so Filipo. Ca' inate' saua lapaxaguinatqa, 'naaco':

—Quenajo ỹale llaalec ¿negue' cá'maq 'naaco' quen nagui na qomyipi?

₁₄Ca saua'maxare 'neraco':

—'Ue quen na 'naac qami' Juan nachilaxanataxanaq, chaqai 'ue na 'neetapega qami' Elías, chaqai 'ue na 'neetapega qami' Jeremías, loqo'm canchaqaica liỹa letaxaỹaxaqui ñi qota'a queso 'auaxaic qomyipi.

₁₅Ca' so Jesús 'naaco' quesaua'maxare:

—Qam qamiri, ¿negue' cá'maq 'ñiitapega negue' aỹim?

₁₆Co'na'le, ca' so Simón Pedro 'naaco':

—Qami' ná'maq qami' nashi nca'laxaqui, qami' ná'maq qami' llaalec ñi qota'olec ñí'maq se ileu.

₁₇Ca' so Jesús 'naaco':

—Qami' Shimoñi', qami' llaalec so Jonás, ỹaatqajam chalego da ra'maxa'e', ma' sqai qom ca ra'deenaxanaxañitegue dajo, qaiñiita ñi ita'a neeta'gue da piguim. ₁₈Ca' ỹim shinac caqami' Pedro ma' qami' qa'. Ca' quenajo qa' so'xonejlec ma'le aca ỹo'ueenaxanaxaqui. Ca' vire'ta da nelauaxa se ishit ỹosogui ma'le aca'maxare. ₁₉Ca' ỹim saanem qami' ma'le aca nauatqate da no'ueenataxanaxac queda piguim. Ca cá'maq 'maxariñite' ma'le quena 'laua, ca ca'maxare qai'neeta qaỹa'maxarenta queda piguim. Chaqai cá'maq sqa 'maxariñi', qai'neeta se qaỹa'maxaren ma'le queda piguim.

₂₀Co'na'le, ca' so Jesús qatalo saua lapaxaguinatqa quiyim se ra'qaataxane' quiyim so'maxare chaqaiso só'maq nashi nca'laxaqui.

₂₁Quiyi co'na'le, ca' so Jesús ichoxotetac dá'maq 'neeta ma'le queso lapaxaguinatqaipi, quiyim so'maxare taigue ma'le da Jerusalén. Ca' so qo'xoiquipi, chaqai so la'gaxala' na letaxaỹaxanqajnec na qomyipi quiyim qaretaxaỹa'pegue' ñi qota'a, chaqai ná'maq rapaxaguinataxanta'pegue na naqataxaquipi chicqo'ot so Moisés, 'xoic ma'le nqohin da le'xoric. Chaqai 'naac quiyim qaỹalauat ma'le. Qam ma' ỹore'ueque caua tres na'xata', ca ma'le, ca' liỹa nca'leuec nqohin.

₂₂Co'na'le, ca' so Pedro ỹauegue'oguiyi so Jesús, ỹoỹootetec. Ca 'naaco':

—¡Ñi qota'olec qaica ma' ỹovira'guit quet nqai'en qami' dajo, qami' ỹa'gaxala'!

₂₃Qam so Jesús naqalgoxoñi, ca 'naaco' queso Pedro:

—¡Qami' na'ỹaapec, oquire'e aỹim! Ma' yo'taxachi'sac. Da ra'deenataxanaxaqui' sqai 'nejem da la'deenataxanaxac ñi qota'olec, ta'ta'a quiyim chaqai qom la'deenataxanaxac.

₂₄Co'na'le, ca' so Jesús 'naaco' quesaua lapaxaguinatqa:

—No'm 'ue ca ỹahotaque quegue aỹim, ca' ncouaalta', ca' quegue aỹim, 'eno'm na'laxatañi dá'maq chi nachaalataxac. ₂₅Ma' cá'maq ỹahotaque nca'laxatec dá'maq chi nachaalataxac, ca ca'maxare na'laxatañi. Qam cá'maq na'laxatañi da nachaalataxac sougui aỹim, ca' chaqaica cá'maq ỹanata da nachaalataxac. ₂₆Ma' ¿negue' quet ca 'negue queca qom quiyim laueguec ná'ogue na hueetalec na 'laua, qam na'laxatañi dá'maq chi nachaalataxac? loqo'm ¿ỹote' quet aca ishiueten ca qom quiyim rapilaxat dá'maq chi nachaalataxac? ₂₇Ma' najo ỹale llaalec ma' novi', ca' naquetaugui da lauaq ñi leta'a chaqai liỹaatac na lelaatqaipi piguim laseripi. Ca' ma'le, ca ishiueten quiñi 'óna quecá'maq lo'ueenatec. ₂₈Ỹaatqajam llic da shinac caqamiri, 'vii ma'le caua caqamiri lliguitaho nagui quiyim saqa' ileue', chi ỹovireta'a quiyim iuanta najo ỹale llaalec naquetaugui da lo'ueenataxanaxac quiyim nashi.