So Jesús ỹa'xat da leloxoỹaxac cá'maq ỹalat aca loua
1Ca co'na' ime ỹa'xatetac dajo so Jesús, ca' ca'e yi Galilea, ca ỹovita yi 'laua huaugui yi Judea, yí'maq pa'ỹa'gue da lqodoigue caso lachiugue Jordán. 2Ca' ỹaatqajam 'xoic so qomyipi quegue so'maxare, chaqai ỹomatec sá'ogue so ralolaxaiquipi.
3Co'na'le, ca 'vio' saua fariseo nqo'nera'a so Jesús, ma' ỹahosaque ỹachi'iñi. Ca renataxane', 'neraco':
—¿Peeta'a ỹa'maqachiguiñi queca qom quiyim ỹalat aca loua quiyim 'ue canchaqaica lasauaxaset?
4Ca' so Jesús 'naaco' quesaua'maxare:
—¿Sqai taxahilco' quen naua naneresañi la'qaatqa ñi qota'olec quiñí'maq ỹo'ueete'o' na' ñaqai 'avichiguiñi co'na' “ỹo'uet so ỹale chaqai na' ỹo'uet aso 'aalo”? 5Qai'neeta 'naaco': “Vichiguiño' ca ỹale ỹalat ma'le ca leta'a chaqai aca late'e, ca' la'aayaxaua aca loua. Ca' quecaua dos ỹovireta'a quiyim 'neesari' ca 'oonoqui' qom.” 6Ca' totqai dos, ta'ta'a quiyim 'oonoqui'. Vichiguiño' ca qom se ishit ỹosoguilo cauá'maq mashic ỹo'naxanta' ñi qota'olec.
7Co'na'le, ca' qainato' so Jesús:
—Qam ¿chi'neco' so Moisés ma' relaataxanlec quiyim qoỹaanem aca noua aca lomalate quiyim qaỹalat, ime, ca' qaỹo'daauec?
8Ca' so Jesús 'naaco' quesaua'maxare:
—Ma' chaqaida dá'maq la'ñaxague' naua re'taxanatahi. Vichiguiño' so Moisés ỹa'maxarenta quiyim 'ue ca nalachiguit aca loua. Qam quecá'maq 'avichiguiñi mesqai 'neeta dajo. 9Ca' ỹim shinac caqamiri: cá'maq ỹalat aca loua, no'm sqai sougui da dequenaxac aca'maxare, cá'maq ỹale, no'm ỹoỹoota'a aca loua, ca 'ue da lasauaxaset. Chaqai cá'maq ỹale no'm loua aca 'aalo nalate, ca'maxare qai'neeta 'ue da lasauaxaset.
10Co'na'le, ca' saua lapaxaguinatqa 'neraco':
—No'm chaqaida dajo dá'maq 'neeta ca ỹale caca loua, ca 'maxaraic quiyim sqai 'on ca ỹale.
11Ca' so Jesús 'naaco' quesaua'maxare:
—Mesqai ná'ogue ishit ỹa'den dajo, qainaata ná'maq qoỹaanem quiñi qota'olec quiyim ỹa'den. 12Ma' ỹoreta'oguit ná'maq no'ueenataxac quiyim sqai 'on ca qom. Ma' 'ue ná'maq naca'ogue' se co'o, chaqai 'ue na chi qaỹo'uet queca qom quiyim se co'o, chaqai na liỹa, ca' sqai 'on ma' imelec da lo'ueenataxanaxac ñi qota'a neeta'gue da piguim. Ca' vichiguiño' cá'maq ishit ỹo'uet dá'maq sa'xatetac, ca 'maxaraic quiyim ỹo'uet.
So Jesús ỹaanem da no'uen llicyaxac so ñaaqaipioqui'
13Co'na'le, ca 'vio' saua ñaaqolqai' qanaueguereu'a so Jesús quiyim ỹashil-lgoto chaqai nqouagaxainlgoto. Qam saua lapaxaguinatqa quepaqteta'pe saua nauecqataxana'. 14Qam so Jesús 'naaco':
—'Xañiỹac na ñaaqaipioqui' ñaqai nacpegue' aỹim. Se quepaqchita'piguit. Ma' ná'maq hueetagui dá'maq lo'ueenataxanaxac ñí'maq neeta'gue da piguim, neneequesenaxai, 'nejem ná'maq 'neetari' na ñaaqaipioqui'.
15Ca' ỹashil-lec so ñaaqaipioqui'. Ca na' ime, ca' ca'e yí'maq hueete'e so Jesús.
So Jesús retaqata'pegue' so ne'nec nesallaxanec
16Ca 'uo' so ne'nec quepegue' so Jesús, ca renataxan, 'naaco':
—Qami' huagaxaraic napaxaguinataxanaq, ¿nega'ỹo' cá'maq so'uet ỹa'maqachiguiñi, ca' 'ue ca ica'laxa sqaica lqodoc?
17Ca' so Jesús 'naaco':
—¿Chi'negue ma' machirahic huagaxaraic? Qaica quet cá'maq liỹa, 'oonoqui' ñí'maq huagaxaraic, ca ñi'maxare chaqaiñi ñi qota'olec. Qam no'm vi'saque vichirau'a da nca'laxa, ca' ỹaatqajam na'xaỹaxañitalo naua lelaataxanaxaco ñi'maxare.
18Ca' so ne'nec 'naaco':
—¿Nega'ỹo' cá'maq 'neete' caua'maxare?
Ca' so Jesús 'naaco':
—Sqai lauataxañi'; sqai dalaxachi' roua'e'; sqo cachi'; se na'majñirelec ca liỹa; 19se napaquiseguelec ca qataa'i' chaqai aca qachii'i'; rauochitegue ca liỹa qom, 'nejem qami' nauochiralta'.
20Ca só'maq ne'nec 'naaco':
—Ná'ogue najo ỹaatqajam ña'xaỹaxane'ta ipaquichigui nqaishin, sachigoxotetañi na' ñaq aỹim noctoqui'. ¿Negue' cá'maq liỹa saqa'leca caỹim?
21Ca' so Jesús 'naaco':
—No'm vi'saque quiyim ỹaatqajam naloochiguiñi da no'ueenataxaqui', ca' miiñi' ná'ogue na hueeto'ot qami', ca' 'ỹaañirougui na 'xoraiquipi, qaiyi ỹaatqajam 'ue ca resallaxa'e' hueeta'gue da piguim. Ca ma' ime, ca naquitegue aỹim.
22Qam co'na' so ne'nec 'xaỹa dajo, ca' eec rachicotam, ma' ỹaatqajam nesallaxanec so'maxare.
23Co'na'le, ca' so Jesús 'naaco' quesaua lapaxaguinatqa:
—Ỹaatqajam llic da shinac caqamiri, quiyim 'xoic lqalaic quiyim ca nesallaxanec inoxona'a da lo'ueenataxanaxac ñi qota'a neeta'gue da piguim. 24Sopilalec sa'xat caqamiri, quiyim 'xoic lqalaic caca nauaanaxanaxa late'e quiyim queetougui nqohin ca a'na lauac. Qam paguec lqalaic ca nesallaxanec quiyim ỹahotaque inoxona'a da lo'ueenataxanaxac ñi qota'a ma' ỹoiquentac ná'ogue najo.
25Ca co'na' 'xaita dajo saua lapaxaguinatqa, ca' 'xoic da le'laqa'. Ca' chi nenatetecta':
—Ca' ¿negue' queto' cá'maq ishit nca'leuec nqohin ma'le?
26Ca' so Jesús ỹamatauguilo saua'maxare, ca 'naaco':
—Na qomyipi se ishit ỹo'uet dajo. Qam ñi qota'olec ishit ỹo'uet dá'ogue.
27Ca' so Pedro 'naaco':
—Qami' qara'gaxala', na' ñanaguinaxague qami' ño'ueenaxatqachiguiñi cá'ogue ca qarouenqaipi. ¿Nega'ỹo' cá'maq seconaxaguit ma'le?
28Ca' so Jesús 'naaco' quesaua'maxare:
—Ỹaatqajam llic da shinac caqamiri, quecajo na'xa'a ma' ná'ogue qano'viishiguim dalaxaic nqohin, ma' najo ỹale llaalec nqa'xanñigui aca 'ue lauaq qa'xanaxaqui quiyim nashi, ca' qamiri ma' quiita'pegue' aỹim, ca' qamiri qai'neeta nqa'xañiñiguilo caua doce nashi nqa'xanaxaqui', ca michii na llaalqaipi saua doce llaalqa so Israel. 29Chaqai ná'ogue ná'maq no'ueenaqchichiriñi caua la'aate', loqo'm caua lqaỹa' chaqai caua lqaỹa' 'aalo, loqo'm ca leta'a, loqo'm aca late'e, loqo'm aca loua, loqo'm ca llaalqaipi, loqo'm caua na'lauari, quiyim ỹapacqajnauec quegue aỹim, ca' cien cá'maq ỹapacauec icoñiguit ma'le. Chaqai icoñiguit ma'le da nca'laxa sqaica lqodoc. 30Qam ỹaatqajam 'xoic quená'maq nagui 'auaxaiquipi co'uaataxanta nqohin ma'le, chaqai 'xoic ná'maq co'uaataxanta nagui 'auetaho nqohin ma'le.
