So Jesús ỹoviraqtetapega so fariseoipi chaqai so rapaxaguinataxanta'pegue na naqataxaquipi
1Co'na'le, ca' so Jesús 'naaco' queso qomyipi chaqai quesaua lapaxaguinatqa:
2—Naua napaxaguinataxana' quena naqataxaquipi chaqai na fariseoipi chaqaina ná'maq qoỹanagui quiyim ỹa'xate' naua leloxoỹaxaco na naqataxaquipi chicqo'ot so Moisés. 3Ca' vichiguiño' ỹaatqajam na'xaỹaxañii'talo qamiri chaqai 'viichii ná'ogue ná'maq ỹapaxaguinque qamiri. Qam sqai quii'uegue dá'maq 'neetari', ma' na'maxare 'ue quen dá'maq ỹa'xat, qam ỹoqa'a quen dá'maq ỹo'uet. 4Ma' iỹoxolec ca liỹa quiyim i'xat cana' tot qaica ishit i'xat. Ca ỹahotaque qai'xat quena qom, qam na'maxare se rotaanaxanau'a da nesallaxa cada 'oono'lli' lpalaaqate. 5Ca' quená'ogue ná'maq ỹo'uet, ỹahotaque qaỹa'ajantac quena qomyipi. Ma' ỹaatqajam nqo'ta quiyim 'ue ca hueetalec na latap chaqai quenaua lqai'laqate' quiyaua naneresañi la'qaatqa ñi qota'a, leca'gue nqohin ca nerec, chaqai quiyim ỹañiñi naua noho paguec ladocqa' naua lauollaxa' quena liỹa qom. 6Chaqai nqo'ta ná'maq paguec loyac qa'xanqa' quena' 'ue na nqui'ỹaxac, chaqai na paguec lemaqachic qa'xanqa' cana lapoxoqui na judioipi, 7chaqai qaỹa'maxate'tegue quiyim qaiquin quena qom quena nayic, chaqai quiyim qaỹamata'gue napaxaguinataxanaq.
8Qam qamiri sqai viitaque quiyim qaỹamata'que qamiri napaxaguinataxana' quena qomyipi. Ma' qamiá'ogue qamiri nqaỹaripi, chaqai qaỹimeta napaxaguinatqorii. 9Chaqai sqaica ca machiỹa'gue qataa'i quena 'laua, ma' 'oonoqui' ñí'maq qataa'i, ca' chaqaiñi ñí'maq neeta'gue da piguim. 10Chaqai mesqai viitaque qaỹamata'que qamiri nashil, ma' chaqaỹimeta ỹim rashii. 11Cá'maq quelola na liỹaripi, ca' chaqaica cá'maq paguec lecaic ma'le caqamiri. 12Ma' cá'maq ỹacona da napacqajnaxac caqamiri, ca' ta'anquira nqohin. Qam cá'maq neneequesen, ca' paguec lecaic nqohin.
13¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Ma' pohigui ñi lasom da lo'ueenataxanaxac ñi qota'a queda piguim, qaiyi se inoxono na liỹaripi. Chaqai qamiri qai'neeta sqai noxoñiuo, chaqai sqai 'xañiỹac ná'maq ỹahotaque inoxono.
14¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Qam quena' ime huootaxañiỹa'gue na la'a' na pa'ỹellipi, ca' chi nañoqotaxac, ca' ladocaic nqai'en da nqouagaxainaxac. Ca' quedajo, ca' paguec lecaic ma'le ca nouaxanaxashichii.
15¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Qamiri quiilec na 'laua chaqai ana huaaxai, qaiyi huelec nqai'ñii na qomyipi cá'maq viilec. Ca' quiyim shichii ca qom, ca' 'viichii quiyim ca qom paguec ma'le ca nouaxanaxaset quiyim qainaxañigui ca ncopatqo' na hualoxonyipi, sqai 'nejme' qamiri.
16¡Ỹaatqajam 'xoraiqolqa qamiri na'gaxalate' qai'la'! Ma' 'ñiỹac: “No'm 'ue ca ỹaanec ca la'qaatec queca liỹa, roỹaxantaque ca lo'maxaset chicqochigui añi no'ueenaxanaxaqui late'ogue' na'ñi yi Jerusalén no'm se ipaguigui, ca' ca'maxare ishit se ipaquichigui nqai'en ca la'qaatec. Qam quiyim 'ue ca ỹaan la'qaatec roỹaxantaque ca lo'maxaset chicqochigui na 'oro lalamaxaret añi no'ueenaxanaxaqui no'm se ipaguigui, ca' ca'maxare se ishit se ipaguigui nqai'en ca la'qaatec.” 17¡Ỹaatqajam qaico' ca 'yiiñii chaqai qamiri qai'la'! ¿Negue' cá'maq ỹapacauec: ca 'oro, loqo'm ñi no'ueenaxanaxaqui ñí'maq chicqochigui quiyim lalamaxaret ñi qota'olec cajo 'oro? 18Chaqai qamiri qai'neeta 'ñiỹac: “No'm 'ue ca ỹaan ca la'qaatec quiyim roỹaxantaque ca lo'maxaset chicqochigui ada ncopatoxonaxalate no'm se ipaguigui, ca' ca'maxare ishit se ipaguigui nqai'en ca la'qaatec. Qam no'm ỹaanec ca la'qaatec roỹaxantaque ca lo'maxaset chicqochigui ana hueetalec aca ncopatoxonaxalate no'm se ipaguigui, ca' ca'maxare se ishit se ipaguigui nqai'en ca la'qaatec.” 19¡Ỹaatqajam qaico' ca 'yiiñii chaqai qamiri qai'la'! ¿Negue' cá'maq ỹapacauec: aca nachitaxanataxanqate, loqo'm aca ncopatoxonaxalate cá'maq chicqochigui quiyim lalamaxarete ñi qota'olec cajo nachitaxanataxanqate? 20Ma' cá'maq ỹaanec ca la'qaatec ỹiqueteguelec ada ncopatoxonaxalate qaiyi ipaquichigui, qam ca'maxare sqadaata ada ncopatoxonaxalate ỹiqueteguelec, ma' qai'neeta ná'ogue ná'maq hueetalec aca'maxare. 21Chaqai cá'maq ỹaanec ca la'qaatec ỹiqueteguelec añi no'ueenaxanaxaqui qaiyi ipaquichigui, ca' ca'maxare sqacaata aca no'ueenaxanaxaqui ỹiqueteguelec, qai'neeta ñi qota'olec, ma' ñi'maxare neetaugui cajo 'imec. 22Chaqai qai'neeta cá'maq ỹaanec ca la'qaatec, ỹiquetegueshiguim quena piguim, ca ỹiqueteguelec yi nqa'xanqa' ñi qota'olec, chaqai qai'neeta ñí'maq qota'olec ma' nqa'xantalec.
23¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Qamiri 'ỹaañim ñi qota'olec ana 'oono'lli' laue ca diez cana nalequetenaxanqate leenaxat menta, chaqai ana anís, chaqai ana comino, qam se na'xaỹaxañiỹalo nauá'maq ỹapaquerauec nelaataxanaxaco quena naqataxaquipi: da 'maqataxac, chaqai da ne'xorenataxanaxa, chaqai da npi'ỹaxac. Ca' chaqaida dá'maq 'viichii quet, qam sqai 'xañiñi quiyim 'viichitac ná'maq liỹa. 24¡Qamiri na'gaxalate' qai'la', piishiñii aca chitole, qam qañiỹañi aca nauaanaxanaxa late'e!
25¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Ma' quiỹohi na pa'aauec cana 'taxaqui chaqai na peguet, qam quena pa'aauo, ca no'qaachigui quena rocataxachii chaqai na rqo'itaxanqachiguii. 26¡Qami' fariseo qai'laq: ma' 'au quet quiỹo'e' na pa'aauo cana 'taxaqui chaqai quena peguet, qaiyi co'teeta qai'neeta na pa'aauec!
27¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Qam 'ec qamiri napal lahi' na'meenecse, ca 'ec lo'yaxana quená'maq pa'aauec, qam quena pa'aauo, ca no'qaachigui quena leuaxaic lpi'nec chaqai ná'ogue nanchaqaina napio'xo. 28Ca' chaqaida 'ñiita qamiri; quená'maq pa'aauec 'ec qamiri lo'yaxanqa quena qomyipi, qam quená'maq pa'aauo no'qaachigui quedá'maq naqaigaxanqachic chaqai da 'ueenataxac chalego la'aaxa.
29¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Qamiri no'xoñishiguim ana lahi' so letaxaỹaxanqajanqaipi ñi qota'a chaqai viitaque na lemaqatet na qaripi netanaxaset so huagaxaraic qomyipi. 30Ime, ca 'ñiỹac: “Quetaxan salecqatauo' na'le queso 'auaxaic qareta'allipi, ca' se sotauanaq queta' ỹalauat na letaxaỹaxanqajanqaipi ñi qota'a.” 31Ca' quedajo, ca' ichoxot quiyim qamiri llaalqaipi só'maq ỹalauat na'le so letaxaỹaxanqajanqaipi ñi qota'a. 32Ca ¡'maxaraic quiyim qamiri 'xañiñi dá'maq ỹo'ueeto' na'le so 'auaxaic qataa'illipi!
33¡Qamiri nanaiquipi! ¡Qamiri llaalqaipi na nanaic! ¿Negue' quet cá'maq nañitqarii quecá'maq nouaxanaxashichii ma' qarenaxai'ña ca ncopatqo' na hualoxonyipi? 34Ca' vichiguiño' ñila' ma'le ca itaxaỹaxanqajanqaipi chaqai ca 'deenaxanqachaqaiquipi chaqai ca napaxaguinataxanaripi. Qam qamiri 'ue ca lauachii chaqai pachiñiho ma'le quecaua'maxare, chaqai caua liỹa' ca huaxañita'pe quenaua rapoxoguii, chaqai 'ue na ocañitac quenaua na'aate'. 35Ca' taalgoto ma'le qamiri dá'ogue da nasauaxaset queda nalauataxac sá'ogue so huagaxaraic qomyipi shi'gue qaỹalauat, chicqochi'ñi queso huagaxaraic ỹale leenaxat Abel, chi ỹovireta'a so Zacarías, llaalec so Berequías, só'maq co'na' lauachii huaañiguilo nqai'ñii da ncopatoxonaxalate naloote'oga yi napooqo'. 36Ỹaatqajam llic da shinac caqamiri, quiyim ná'ogue na nasauaxaseteripi quená'ogue taalec ma'le najo qomyipi nagui.
So Jesús noỹenlec yi Jerusalén
37¡Qami' Jerusalén, qami' Jerusalén, ma' qami' lauachirac na netaxaỹaxanqajanqaipi chaqai naqai' quena qa' ná'maq nelata qami' ñi qota'olec! ¡Ỹoto'o' sahotaque llapoonta' na qachaalaxai'ipi, 'nejem aca huaqa'e quena' lapoonta' na llaalqaipi, ca illo'oto naua laua', qam sqai 'maxariñi'! 38Ca' ñaqa 'ajñii, co'tejlem ma'le na ra'aari. 39Ma' ỹim shinac quiyim tot liỹa huañiua', toco' ma' ỹovita ca laloqo' quiyim 'ñiỹac: “Ỹaatqajam no'uen da llicyaxac ná'maq naquetaugui da leenaxat ñi qara'gaxala' qota'olec.”
