Mateo 24

₁Ca co'na' inoxonec so Jesús, ca'e añi no'ueenaxanaxaqui late'ogue' na'ñi yi Jerusalén, ca' so lapaxaguinatqaipi ỹachaxanta'gue na qa' no'ueenataxat aso no'ueenaxanaxaqui. ₂Qam so Jesús 'naaco' quesaua'maxare:

—¿'Ajñitac ná'ogue najo? Ỹaatqajam llic da shinac caqamiri quiyim quenajo qaica ca qa' no'ueenalec ca liỹa quenajo 'imec ma'le, ma' ná'ogue qaỹopoxoỹaxachigui ma'le.

₃Co'na'le, ca taarishi'megue ada quemaralec ladocai nananqa' ana qo'paq olivos. Ca co'na' so Jesús nqa'xantañi quiyi'maxare, ca' saua lapaxaguinatqa retaxahi', nemootetetot, 'neraco':

—Sahoqotaque sa'deenaq lagui ỹovita ca laloqo' dajo. ¿Nega'ỹo' cá'maq netanec quecá'maq roviraxagui'i' chaqai quecá'maq nqodoc?

₄Co'na'le, ca' so Jesús 'naaco' quesaua'maxare:

—Rovichiỹari'o', qaiyi qaica ca rayiñii. ₅Ma' 'xoic ma'le ca naquetaugui da ỹeenaxat 'naac ma'le: “Ỹim ná'maq ỹim rashii rca'laxaguii”, ca 'xoic ca ỹayin ma'le. ₆Qamiri 'ue ma'le na ra'xaỹaxaguii quiyim 'maqachi'ñalo na lauataq. Qam mese ro'chiỹo', ma' chaqaida 'neeta ma'le, qam saqa' novi' ca nqodoc. ₇Ma' na qomyipi nalauate'e' ma'le ca se lauo' laseripi, chaqai ca nashi nalauate'e' ca liỹa nashi. Ca' 'ue ma'le ca nqopaaxa chaqai na ne'ne', chaqai 'xoic na hua'ñi i'loxol na 'laua. ₈Ca ná'ogue najo chi la'auaxanec quecá'maq ỹaatqajam ne'xoric ma'le.

₉Ca ma' ime, ca' qoỹaando qamiri ma'le quiyim qarouaxañitac, chaqai ná'ogue na qomyipi noquii'alo qamiri sovitapigui ma' viilec aỹim. ₁₀Ca' quecauajo na'xata' 'xoic ca na'laxatañi ma'le da lpi'ỹaxac, chaqai quiñi 'óna noquii'a ca liỹa, chaqai ỹaañiguit ca liỹa ca se no'uen. ₁₁Ca 'xoic ca re'oq ma'le 'maatqaic 'naac quiyim letaxaỹaxanqajnec ñi qota'a. Ca 'xoic ma'le ca ỹayin quena qomyipi. ₁₂Ca' ỹaatqajam a'ue ma'le na se no'uen, ca vire'ta quiyim tot ne'xorenta' na qom. ₁₃Qam cá'maq se nañaxanñi, chi ỹovireta'a ca lqodoc aca lqauaxaqui, ca chaqaica cá'maq qanca'laxatec. ₁₄Qam dajo no'uen na'xaỹaxac ỹa'xat dá'maq lo'ueenataxanaxac ñi ỹoiquentac ná'ogue najo, da'maxare qaỹa'xat ma'le quená'ogue na 'laua, qaiyi qaỹa'den quená'ogue na ỹoreta'oguit qomyipi. Ca ma'le, ca' novi' ca nqodoc.

₁₅So letaxaỹaxanqajnec ñi qota'a leenaxat Daniel 'uo' so lerec taỹaugui ná'maq chicqochigui ca se no'uen chaqai ra'aaqataxan. Ca ma' qamiri huañiỹa ca'maxare hueeta'ñi ca se loma' —ca cá'maq retaqalec anajo, ca no'uen quiyim ỹa'yiinchigui dá'maq leloxoỹaxac— ₁₆ca ná'maq na'ñi yi Judea no'uen quiyim 'eet, i'guenlec ana quemaralec ladocai. ₁₇Chaqai cá'maq hueetalec ca lauo' lelaq, se renotec quiyim 'ue ca queu'a pa'aataho. ₁₈Chaqai cá'maq hueetauec quena no'ueenaxa, sqai pilo quiyim lapoon ca looỹac. ₁₉¡Ỹaatqajam chalego le'xoric ma'le na 'aallipi 'manaxaipi chaqai aná'maq 'ue na llaalec ñaqai llipetac! ₂₀Ca' shiilahi ñi qota'olec quiyim ma' 'iichii sqai hueetougui nqai'en ca no'oomaxa, loqo'm ca na'xa'a co'mataxaqui. ₂₁Ma' ỹaatqajam 'xoic ca ne'xoric ma'le, qaica 'nejem shi'gue na' ñaqai taachiguiñi qaỹo'uet na 'laua, chaqai qaica ma' 'ue quet ca liỹa 'nejem. ₂₂Ca' ñi qota'olec quetqai se nqo'naxajta' cauajo na'xata', ca' qaica quet cá'maq ishit nca'leuec. Qam nqo'naxajta' ma'le, ma' i'xoren ná'maq lca'acseripi.

₂₃Ca ma'le no'm 'ue ca 'naac caqamiri: “'Ajñii, hueete'e najo da nashi nca'laxaqui”, loqo'm “'Ajñii, 'iyi hueete'e”, totaxan viilec. ₂₄Ma' 'xoic ca 'maatqaiquipi novi' ma'le, ca 'naac quiyim chaqaica cá'maq nashi nca'laxaqui, loqo'm 'naac quiyim letaxaỹaxanqajnec ñi qota'a. Ca ma'le, ca ỹo'uet ca chalego lecaic netanec chaqai na se qaiuanapega, ma' ỹahotaque quiyim sha'apiguito' ỹayin ná'maq lca'acseripi ñi qota'olec. ₂₅Saqa' novi' dajo, qam ỹim shi'gue sa'xatema qamiri. ₂₆Vichiguiño' no'm 'ue ca 'naac caqamiri: “'Ajñii, 'eda da nashi nca'laxaqui hueetalec yi 'laua qaica qom”, sqai quiipegue'. Loqo'm 'ue ca 'naac caqamiri: “'Iñi neetaugui ñi 'imec”, totaxan viilec. ₂₇Ma' 'ec ma'le ca nqai'legaxa re'qoota queda lqodoigue chaqai queda lauashiguim, ca chaqaida 'neeta ma'le ca loviraxac najo ỹale llaalec. ₂₈Ca cá'maq hueeta'ñi ca leuaxaic, ca' chaqaica ca lapooqo' na ratecsanyipi.

₂₉Ca co'na' ỹovirerec saua na'xata' ne'xoyaxaqui', ca' añi ra'aasa 'om, chaqai ñi shiraigo qaica ca lauaq, chaqai ana huaqajñi najñi quena piguim, vire'ta i'loxol na nquesaxanaxa hueeto'ot na piguim. ₃₀Ca ma'le, ca' qaiuana quena piguim ca letanec najo ỹale llaalec. Ca ná'ogue na ỹoreta'oguit qomyipi noỹentagui, ma' qaidaana'guit najo ỹale llaalec naquetaugui na naueguelec, ỹaatqajam chalego lquesaxanaxa chaqai na lauaq. ₃₁Ca ila' na lelaatqaipi piguim laseripi quiyim netenegue da lelamaxa ana lpe'te pe'taxan, ca' qaiyi lapoonta' ná'ogue na lca'acseripi neeta'guelo naua cuatro llico na nonot, qaỹachigoxota'ogalo naua'que naua lahil na 'laua.

₃₂Napaxaguiñiỹa dajo quiyim saloqojnaxana ana higo lashi: Quena' no'ualauec chaqai ñaxatec ana laue, ca' qamiri 'yiiñii quiyim nepalata ca nosaxa. ₃₃Ca' chaqaida 'neeta ma'le ma' huañiỹa ná'ogue najo, ca 'yiiñii quiyim ca nqodoc nepalata. ₃₄Ỹaatqajam llic da shinac caqamiri, quiyim ná'ogue najo 'au re'oq ma'le, ma' saqa' ileu na qomyipi hueetauguilo nauajo na'xata'. ₃₅Na piguim chaqai na 'laua imero ma'le, qam naua ỹa'qaatqa sqaica ma' se ipaguiguilo quet.

₃₆Qam quecajo na'xa'a chaqai ca laloqo' qaica ỹa'den, vire'ta na nelaatqaipi piguim laseripi, chaqai najo qota'olec llaalec. Qaiñiita ñi qota'olec ita'a ỹa'den.

₃₇'Neete'm ma'le saua na'xata' hueetouguilo saua na'xata' so Noé, ca' chaqaida 'nejem ma'le ca loviraxac najo ỹale llaalec. ₃₈Quesauajo na'xata' na' saqa' i'paxanlec ana 'laua, so qomyipi ỹo'ueetetac lqui'ỹaxac, chaqai ne'teetac, chaqai o'neetecta' chaqai ỹo'naxantac na llaallipi, chi ỹovireta'a so na'xa'a na' so Noé inoxonougui aso lo'ueenata qom lahi' huaxaỹaqse. ₃₉Chaqai qaico' ca retanaxan na'le, chi ỹovireto'o' na' nac so ỹaxat, ca ỹaỹoxonaxat sá'ogue so qomyipi. Ca' chaqaida 'neeta ma'le ma' novi' najo ỹale llaalec. ₄₀Ca' quecajo na'xa'a dos caua ỹale' hueesalec ma'le na no'ueenaxa, ca 'óna ca qai'xat ma'le, ca' ca liỹa qano'ueenaqtañi. ₄₁Chaqai caua dos 'aalo ra'daxanta'pe, ca 'óna aca qai'xat ma'le, chaqai aca liỹa, ca' qano'ueenaqtañi.

₄₂Ca no'uen quiyim qamiri nelohitauec, ma' sqa 'yiiñii ca laloqo' ca loviraxaqui na ra'gaxalarii. ₄₃Qam qamiri 'yiiñii quiyim cá'maq lauo' ca 'imec, quiyim ỹa'den ca laloqo' cá'maq hua'ñi ca pe, ca novi' ca cuataxai, ca ca'maxare sqai laq, qaiyi se ỹasen quiyim qarocachigui ca lauo'. ₄₄Ca vichiguiño' qamiri qai'neeta na'maxachitañi. Ma' noma' sqaica ca viitaque, ca novi' najo ỹale llaalec.

₄₅¿Nega'ỹo' cá'maq nelaatec qamaxaraic chaqai 'deenaxanqachaqaic, cá'maq reloxoỹa'a nqai'en sá'ogue so la'a' ca na'co' quiyim qui'ỹaxanac quiyim ỹovita ca laloqo'? ₄₆Chalego la'maxa queca nelaatec, quiyim ma' novi' ca na'co', ca iuanejlec ñaq ỹo'ueetetac cá'maq qailarelec. ₄₇Ỹaatqajam llic da shinac caqamiri, quiyim so na'co' pataxalec ma'le ná'ogue na louenqaipi. ₄₈Qam cajo nelaatec, no'm se nouoogoñi, ca 'neetapigui lauel quiyim qaua' novi' ca na'co'. ₄₉Ca' queetalec da lqa'viic quena lo'ueenataxanaxauaripi, chaqai ỹo'uet na nqui'ỹaxac chaqai quelec da ne'taxac ỹalequetaugui na ne'taaxairipi. ₅₀Ca' novi' ma'le ca na'co' ma' ỹovita ca na'xa'a quiyim qaica ca ỹahotaque, ma' cá'maq laloqo' se ỹa'den. ₅₁Ca qaỹo'uet ma'le ca chalego lecaic nouaxanaxaset, 'nejem nqohin ca nouaxanaxaset ná'maq 'neetapega 'maxaraiquipi. Ca ma'le, ca' noỹen chaqai iquishquinta' naua louee quena nqui'ic.