Mateo 28

₁Ca co'na' ỹoxe'uegue so na'xa'a co'mataxaqui, chaqai mashic sham richiguiñi quesó'maq 'auaxaic na'xa'a quenaua no'ueenataxanaxaqui', ca' aso María lase yi Magdala chaqai aso liỹa María que' ra'ajnaxanda'a aso lahi' so Jesús. ₂Ca 'uo' so quesaxan le'loxolaxa na 'laua, ma' so lelaatec piguim le'ec ñi qara'gaxala' chicqo'ot na piguim. Ca na' noviri'ña aso lahi', ca naqat so qa' lodegaxat lapooque' aso'maxare, ca' nqa'xanlec. ₃Ca so'maxare ỹaatqajam ỹaviquetaugui, 'ec na nqai'legaxa, chaqai saua loho ỹaatqajam lalagaxaqa, 'nejme' ana loñi. ₄Ca co'na' qaiuana so'maxare queso nouaataxanyipi, ca sá'ogue i'loxol quena lqolonaxa, ca' huerañi ileuete'. ₅Co'na'le, ca' so nelaatec piguim le'ec 'naaco' quesaua 'aalo:

—Totaxan ro'chii, ma' ỹim sa'den quiyim daañitaque ca Jesús cá'maq qaipateno na'le. ₆Qam sqaica quenajo. Ma' shi'gue liỹa nca'leuec, ca ipaquichigui dá'maq 'naac na'le. Qam ỹalahi, ñaqai 'ajñii yí'maq qailla'ñi na'le. ₇Ca chaqa'ma' quii, 'ñiỹapega ca lapaxaguinatqaipi, quiyim so'maxare ileu na'le, qam liỹa nca'leuec, ca' eec 'aueta'gue da Galilea. Ca' quiyi hua'ñi ma'le, ca huañiỹa. Ca' dajo dá'maq shim sa'xatema qamiri.

₈Co'na'le, ca' saua 'aalo chaqa'ma' quere'e aso napal lahi', 'ue da lqolonqa', qam lotqai 'xoic da netoonaxague'. Ca' que', ne'guente', ỹahote la'xaỹaxague' saua lapaxaguinatqa. ₉Ca queco'na'le, ca' qanachaxanalo queso Jesús, ca' qaiquine'. Ca' saua'maxare nqo'netot so Jesús, ca' ỹa'dooto naua le'cootal, chaqai qa'aalouguilo naua lichil. ₁₀Ca so Jesús 'naaco' quesaua'maxare:

—Totaxan ro'chii. Mohi, vii la'xaỹaxac ca ỹaqaỹaripi, quiyim taigue da Galilea. Ca' queda hua'gue, ca' iuañiua' ma'le.

₁₁Ca co'na' ñaqai queete' saua 'aalo, ca 'vio' saua neloxoỹa' nouaataxanaq lase' querepegue' yi na'a' lodegaxat Jerusalén, ca ra'qaataxanta so la'gaxalateripi na netaxaỹaxanqajanqaipi quedá'ogue dá'maq 'neeto' na'le. ₁₂Ca' so na'gaxalateripi eec quepegue' so lqo'xonqaipi na judioipi, ma' ỹahotaque quiyim na'deenta'. Ca co'na'le, ca 'xoico' aso qoỹaanema nam plata saua nouaataxanaq lase'. ₁₃Ca' 'neraco' quesaua'maxare:

—Qamiri 'ñiỹaco' queso pe na' qamiri laxaita, ca' saua lapaxaguinatqa so Jesús novirero, ca' rocachita so loshicmaxa so'maxare. ₁₄Chaqai no'm ñi nashi ỹoviro'ot quiyim ỹa'den dajo, ca' qomi' ñpa'xanaxaguit quiyim huelec nqaishinaq, qaiyi se ishit ỹa'ue ca nouaxanaxashichii.

₁₅Ca co'na'le, ca' saua nouaataxanaq lase' iconchiguit aso nam plata, ca' que', ỹo'ueete' dá'maq qohinapegalo. Ca chaqaida dá'maq la'qaatec quen na judioipi, chi ỹovireta'a nagui.

₁₆Ca' chaqaida nqohin, ca' saua once lapaxaguinatqa taategue da Galilea, querepegue' ada quemaralec ladocai, dá'maq ỹicapego' na'le so Jesús. ₁₇Ca co'na' iuanta so Jesús, ca' ỹa'dooto naua le'cootal, 'eno'm 'ue na ñaqai saqa' ỹaatqajam huelec quiyim ỹaatqajam chaqaiso' so'maxare. ₁₈Co'na'le, ca' so Jesús nqo'neuo' quesaua'maxare, ca 'naaco':

—Qanañaañim da iquesaxanaxa quiyim soiquentac ná'ogue na hueeto'ot na piguim chaqai quena 'laua. ₁₉Ca' vichiguiño' qamiri selarii quiyim quiipegue' ná'ogue na ỹoreta'oguit qomyipi. Ca' 'viichii quiyim ỹim napaxaguinaxala', chaqai chilaxanataxañiỹa da leenaxat ñi qota'olec, chaqai najo llaalec, chaqai so Espíritu Santo. ₂₀Chaqai paxaguiñigue quiyim huelec ná'ogue ná'maq sapaxaguinguelo qamiri. Chaqai 'yiiñita quiyim ỹim salequetauguilo qamiri quenaua'que naua na'xata', chi ỹovireta'a ca nqodoc. Ajá'a, ca' chaqaida 'neeta dajo.