Miqueas 1

₂Qamiá'ogue qamiri qomyipi, ñaq na'xaỹaxañiỹa dajo;

qamiá'ogue qamiri ná'maq ñiitalec najo 'laua, ñaq na'xaỹaxañiichiguiñi:

Ñi qara'gaxala' quiyí'maq neeta'ñi quiñi lalamaxaret lauo',

ñi'maxare ỹa'xat ma'le cá'maq 'neeta quiyim npa'guento qamiri.

₃Ñi qara'gaxala' nenoxonec ma'le quiyí'maq neeta'ñi,

ca' nac, nanaquetalec ma'le na lo'lo ana ladocai qaripi.

₄Cá'maq ta'ñi da lapia' quiyim co'viiñi, ca' quiguiñi nqai'en ana qa',

'ec nqai'en ana lapa quena' qaillaañigui na norec,

chaqai naua ca'meguelo, ca ropoxoỹa'que nqai'ne',

'ec dá'maq quena' na huaxaỹaq 'ue ca itagoxotauec queda lquesaxanaxa.

₅Dá'ogue dajo 'neeta ma'le sauaxat quiyim se na'xaỹaxan na llaalqaipi so Jacob,

sauaxat na lasauaxaset ná'maq nashillipi ỹoiquentac yi Israel.

¿Negue' cá'maq hua'ñi quiyim se na'xaỹaxan na llaalqaipi so Jacob?

¡Hueetaugui na qomyipi quiyi Samaria!

Chaqai ¿negue' ca hua'ñi ca nqouagaxainqa' quena lashiilqaipi na llaalqaipi so Jacob?

¡Chaqaiyi yí'maq Jerusalén hua'ñi!

₆Vichiguiño' 'naac ñi qara'gaxala':

Yi na'a' lodegaxat Samaria 'ec nqaishin ma'le ca qa' lahillipi lapoỹañi,

'ec nqaishin ca no'ueenaxa quena' qodanaxanlec cana 'úva.

Seuagaxajlec so ca'megue na lahillipi na 'imec quiyi na'a' lodegaxat,

ca' qaỹauajlec nqaishin ná'maq no'xonaxanaxalateripi.

₇Ná'ogue na lashiilqaipi lahiletajlec ma'le,

chaqai qaicopata'a ana loỹo nqouagaxainaxalate.

Ma' na'maxare qaỹachigoxotaugui ana nam dequenqate,

ca lotqai sopilaxachichigui aná'maq qaỹachigoxotaugui.

₈Vichiguiño' ñoỹen ma'le paguec da ỹachicoxo,

ca' queda'maxare, ca sqai sañiñi ma'le caua ipelate' chaqai sentauec,

ca' soso'ota'pegue', shintari' ca cotaapla',

chaqai ñoỹen, shintari' ca mañic llaalec ro'uaataxantac.

₉Ma' yi lcoñiraxa yi Samaria tot qaica nataren.

Da nouaxanaxaset ỹovira'oga yi Judá

chaqai qai'neeta sham ỹovira'oga yi Jerusalén,

yí'maq na'a' lodegaxat neeta'ñi yí'maq ỹalamaxareteripi.