Miqueas 6

₁Ñaq na'xaỹaxañiỹa dá'maq 'naac nagui ñi qara'gaxala':

“¡Ne'laxachirishiguim, ca' lli're'oguiyi dá'maq 'ñi'sari' quena leseeque'ta ana qa' ladocai,

chaqai qaiyi 'qaasapega qami' naua quemaralgoto!”

₂Ñaqai na'xaỹaxañii qamiri qa' ladocaipi chaqai ná'maq nolliitañi na 'laua.

Ñi qara'gaxala' ỹo'uet ca limiitaxanaxac caqamiri quená'ogue na lalamaxareteripi,

ỹo'uet quiyim relocỹe'e' na Israel.

Vii ca 'ñiỹac, qamiri ỹalamaxarete',

¿negue' cá'maq se no'uen so'uet caqamiri, loqo'm negue' ca hua'co' na' sqai saxañiỹac?

₄Ỹim ñaqata'a na'le qami' quiyi Egipto,

ñaqata'a na'le qami' quiyim qami' na'ac,

ỹim sela' na'le so Moisés, Aarón chaqai aso María,

sahotaque quiyim ra'gaxalachiri.

₅Qamiri ỹalamaxarete', ñaq no'viñigue nagui

dá'maq na'deenaxac na'le so nashi quiyi Moab leenaxat Balac

quecá'maq sham 'neeta'guelo qamiri,

chaqai dá'maq la'qaatec na'le só'maq llaalec so Beor leenaxat Balaam.

No'viñigue na' chigoxoichi'ñi yi Sitim, ca 'iỹa'gue da Gilgal,

chaqai 'yiiñira'a quiyim so'ootaxanteguelgoto qamiri na'le.

₆¿Nega'ỹo' cá'maq llo'qoota'a ma' shicpegue' quiyim ñqouagaxainot

ñi qara'gaxala' ñí'maq qota'olec queda piguim?

¿Peeta'a ma' sovira'a, ca' sauequetau'a ca huaqui llaalec 'óna niñaaxa,

sahotaque ỹachitaxanataxanaxat quiyim qaỹavigaxat?

₇¿Peeta'a netoon ñi qara'gaxala' no'm saanto'ot ca mil qagreta loua',

loqo'm ca diez mil lachiugue quena aceite?

¿Loqo'm quiyim saanot cá'maq ỹi ỹaalec,

laseue' na ỹasauaxaset chaqai quiyim se ña'xaỹaxan?

₈¡'E'! Ñi qara'gaxala' shi'gue 'naac caqami',

negue' cá'maq hueetaugui cá'maq no'uen,

chaqai negue' cá'maq nauaantaque ñi'maxare caqami' ỹalloolec:

quiyim 'viichi' cá'maq no'uen, na'maxachite' chaqai raqamqaite'

chaqai quiyim ne'xorishiñite', na'xaỹaxañiteta ñí'maq qota'olec caqami'.