Marcos 11

₁Ca co'na' ipalasau'a yi Jerusalén, mashic qaỹovireu'alo saua na'aaterolqai' leenaxate' Betfagé chaqai Betania, naloote'oga ada quemaralec qo'paq olivos loma'. Ca' so Jesús ilate' saua dos lapaxaguinatqa. ₂Ca 'naapegalo':

—Quiipegue' na na'a' naloote'ogalo qomi'. Ca ma' viriu'a, ca huañijlec ma'le ca 'ashin, ncoñiretari', saqa'leca nelec. Ca' sohiuec ma'le, ca naviguiuec. ₃Ca no'm 'ue ca inate' qamiri, chi'negue 'viichii dajo, ca' qamiri 'ñiỹapega, só'maq qara'gaxala' ỹouen. Qam ma' ỹomat, ca lotqai rapilaxat.

₄Ca saua'maxare que', ca iuanterelec so 'ashin, ncoñiretari' quena lahi ca lasom, pa'aatauec queso nayic, ca' ỹosoorec.

₅Ca 'vio' sauá'maq hueese'eyi 'neraco':

—¿Negue' ná'maq 'viichitac? ¿Chi'negue ma' sohitapeguec na 'ashin?

₆Ca saua'maxare 'neraco' dá'maq qohinapegalo queso Jesús, ca qoỹaxana'pe quiyim que'. ₇Co'na' ime, ca qaỹauegue'oga so Jesús so 'ashin, ca qaipeguenlgoto saua loho, ca' so Jesús renojlec so'maxare. ₈Ca ỹaatqajam 'xoico' na ipiguiñi'ñigui so nayic na lapo', chaqai 'uo' na liỹa ỹouaxanec ana qo'paq lasote, ca illa'ñigui so nayic.

₉Ná'maq 'aueta chaqai na co'uaataxanta ỹaualqatagui, 'naaco' quen:

—¡Ỹaatqajam qaimaqachin ñi qota'a! ¡Ỹaatqajam no'uen da llicyaxac ná'maq naquetaugui da leenaxat ñi qara'gaxala'! ₁₀¡Ỹaatqajam no'uen da naata no'ueenataxanaxac, ma' 'nejem da lo'ueenataxanaxac na' nashi so qareta'a David! ¡Quiyim ỹaatqajam qaimaqachin ñi qota'olec!

₁₁Ca inoxono' na'le so Jesús quiyi Jerusalén, chaqai qai'neeta inoxonougui añi no'ueenaxanaxaqui late'ogue'. Ca co'na' ime ỹa'ajantac ná'ogue nanchaqaina, ca' taigue da Betania, liỹareta'pe saua doce lapaxaguinatqa, ma' mashic lavito' na'le.

₁₂Ca co'na' queso liỹa na'xa'a co'na' inoxondec quiyi Betania, ca so Jesús 'uo' na lqopaaxa. ₁₃Ca idaana'o' aso higo lashi qoỹoqo'ta 'ue ana laue. Ca quepegue', ra'ajnaxana quiyim tegue' chaqa 'ue ca la, qam qaca ca ỹanata higo. Qanaata ana laue, ma' saqa' ỹovita ca laloqo' quiyim 'ue aca la. ₁₄Ca co'na'le, ca' so Jesús 'naapego' aso higo lashi:

—Ca' nagui taachi'ñi quiyim tot qaica quiyim liỹa quet qaỹa'ic aca la qami'.

Ca' saua lapaxaguinatqa ỹaatqajam 'qaachirigui dajo.

₁₅Ca co'na' ỹovirera'a yi Jerusalén co'na' so Jesús inoxonougui aso no'ueenaxanaxaqui. Ca chaqa'ma' ỹo'daauec ná'maq 'ue na imeentac chaqai ná'maq 'ue na rishiujnaxantapega quiyi'maxare. Chaqai ỹamaxañi na lemeenaxanaxala' ná'maq ỹosootapigui ñiguit nqai'en ana lam na qomyipi chaqai ana nqa'xanaxaqui ná'maq imeentac na coviguiñiguiripi. ₁₆Chaqai se ỹa'maxaren quiyim 'ue quet ca qai'xat cañi no'ueenaxanaxaqui. ₁₇Ca' quiyi, ca rapaxaguinataxantac, 'naaco':

—Quenaua naneresañi la'qaatqa ñi qota'a 'nerac: “Najo ỹa'a' qaỹamata'gue na'a' nqouagaxainqa' ná'ogue na ỹoreta'oguit qomyipi.” Qam qamiri ñigui nqai'ñii na'a' nqañoqotaqa' na cuataxairipi.

₁₈Ca' ỹaatqajam 'qaachirigui dajo so lashillipi na netaxaỹaxanqajanqaipi quena' qaretaxaỹa'pegue' ñi qota'a chaqai na rapaxaguinataxanta'pegue na naqataxaquipi. Ca' idaandaque ca la'maqa' quiyim qaỹalauat so Jesús ma' qano'cha'a, ma' mashic ná'ogue na qomyipi 'ue da le'laxa queda lapaxaguinataxanaxac. ₁₉Qam co'na' mashic pe, ca' so Jesús eec, ca'e yi na'a' lodegaxat.

₂₀Ca co'na' nete'eta queso liỹa na'xa'a, ca liỹa queetetegueyi, ca iuanteta aso higo lashi shi'co' ỹaso, vire'talo' naua lpa'yii. ₂₁Co'na'le, ca' so Pedro no'uene'teco' na'le da la'qaatec so Jesús. Ca 'naaco' queso'maxare:

—Qami' napaxaguinataxanaq, ñaqa 'ajñi' adá'maq higo lashi dá'maq taqaira'a na'le, shi'co' chi ỹaso.

₂₂Ca' so Jesús 'naaco':

—Pi'iỹa'a ñi qota'olec. ₂₃Ma' ỹaatqajam llic da shinac caqamiri, quiyim canchaqaica 'naapega ana quemaralec late'ogue': “Qo'ñi' quena vi'sa'ñi, 'iriñigui aca huaaxai”, qam se ỹoqolliguit ca la'qaatec, ta'ta'a quiyim huelec quiyim ipaquichigui cá'maq 'naac, ca' chaqaida 'neeta. ₂₄Vichiguiño' shinac caqamiri quecá'ogue cá'maq shiilaxañiỹaque quiyim nqouagaxaiñii, no'm viilec quiyim shi'gue coñiguit, ca' chaqaida 'neeta. ₂₅Chaqai ma' ñaq nqouagaxaiñitac, ca no'm 'ue ca 'ue ca ỹasauaxat caqamiri, ca' sqo quiỹapeguem. Ta'ta'a quiyim 'xoriñii, qaiyi ñi qota'a ñí'maq viilec neeto'ot na piguim sqai caapeguem ca rasauaxashichii. ₂₆Qam no'm sqai 'xorenataxañii, ca ñi qota'a ñí'maq viilec neeto'ot na piguim se ỹapalaxate' caua rasauaxashichiri.

₂₇Ca co'na' rapilera'a yi Jerusalén, ca co'na' ỹouoxontac aso no'ueenaxanaxaqui. Ca qanqo'neu'o' na'le so Jesús quesaua la'gaxalate' na netaxaỹaxanqajanqaipi quena' qaretaxaỹa'pegue' ñi qota'a chaqai na rapaxaguinataxanta'pegue na naqataxaquipi chaqai so qo'xoiquipi. ₂₈Ca qainato' so'maxare, qohinaco':

—¿Negue' cá'maq chigoxochira'gue quiyim 'viichi' dajo? ¿Negue' cá'maq ỹaañiraxarom quiyim 'viichi' dajo?

₂₉Ca' so Jesús 'naaco':

—Ỹim qai'neeta sa'ue da inataxanaxac caqamiri. Ca' qamiri choxochii ma'le, ca' ma'le, ca' sa'xatema qamiri negue' cá'maq sachigoxota'gue quiyim so'uet dajo. ₃₀¿Nega'ỹo' ca nela' so Juan quiyim rachilaxanataxan? ¿Ñi qota'olec, loqo'm na chaqai qomyipi? Ñaqai choxochii caỹim.

₃₁Co'na'le, ca chi retaxaỹata' saua'maxare, ca 'neraco' quen:

—No'm shinqac nela' ñi qota'olec, ca da'maxare 'naac ma'le coqomi': “Qam ¿chi'neco' ma' sqai viilec?” ₃₂¿Chaqai no'm shinqac na qomyipi nela'?

Ma' saua'maxare no'chi' quena qomyipi, ma' ná'ogue ỹa'deenta quiyim ỹaatqajam llic quiyim so Juan ỹaatqajam letaxaỹaxanqajnec ñi qota'a. ₃₃Ca 'neraco' na'le queso Jesús:

—Se sa'deenaq.

Ca' so Jesús 'naaco' quesaua'maxare:

—Cha'regue ỹim qai'neeta se sechoxot cá'maq yila' quiyim so'uet dajo.