Marcos 4

₁So Jesús liỹa rapaxaguinataxan queda lahi aso latogot late'ogue', ca 'xoic so qomyipi lapoỹau'a yí'maq hueete'e so'maxare. Qam mashic paguec 'xoic, ca' so Jesús renojñigui aso qom lahi' huaxaỹaqse, ca' nqa'xanñi, ca' so qomyipi no'ueeno'ot so lemanaxa. ₂Ca 'xoic na ỹapaxaguinegue, qam ỹahote'e na laloqojnaxanaxat. Ca quená'maq lapaxaguinataxanaxac, ca 'naaco' quen:

₃—Ñaq na'xaỹaxañiỹa da sa'xat: 'Uo' so ỹale eec danaxan. ₄Ca co'na' danaxantac, ca 'uo' ana lanecse ala tajlec so nayic. Ca anaco' ana qo'oollipi, ca ỹa'ic. ₅Ca' aso liỹa lanecse ala tajleco' so 'laua ỹalliquichigui na qa'. Ma' sqoỹoxoñi na 'laua, ca' aso nanecse ala chita'gue, ca' ñaxat. ₆Qam co'na' nenoxonshiguim aso ra'aasa, ca' ỹavic, ma' sqoỹoxo'ñiguilo naua lpa'yii. Ca' ỹaso. ₇Ca' so liỹa lanecse ala taachiguinquio' ca leesat. Qam so leesat se ỹolaua'gue da llaqtaxac, ca' ỹapolec aso nanecse, ca' se ishit quiyim 'ue aca la. ₈Ca' aso liỹa nanecse tajlec yi lo'yaxanec 'laua, ca' aso'maxare ỹaatqajam lo'yaxanec da llaqtaxac. Ca 'uo' ana ỹovi' treinta ala añi 'oono'lli', chaqai 'uo' ana ỹovi' sesenta, chaqai 'ue ana ỹovi' cien.

₉Ca' so Jesús 'naaco':

—Cá'maq 'vii caua lque'laa lauaco quiyim na'xaỹaxan, ca 'maxaraic quiyim ỹa'maxate'tegue da na'xaỹaxanaxac.

₁₀Ca co'na' noda'chiguit so Jesús, só'maq chaqai'en nauegaxauaripi chaqai saua doce lapaxaguinatqa, ca' qainato' negue' cá'maq reloqo'tegue dá'maq raloqojnaxantapega, quiichigui nqai'en da la'qaatec. ₁₁Ca' so'maxare 'naaco':

—Ñi qota'olec ỹa'deenaxanaxanque qamiri dá'maq ñauapec leloxoỹaxac se re'xogui da lo'ueenataxanaxac ma' ỹoiquentac ná'ogue najo. Qam quená'maq liỹaripi pa'aatauec ná'ogue qara'qaataxana, qam qaỹahote'e na naloqojnaxanaxaqui; ₁₂qaiyi no'm 'ue ca iuanchigui, qam 'ec se reuanaxan, chaqai no'm 'qaatac, qam se ỹa'den cá'maq reloqo'tegue, qaiyi se nañaano, ca' se qaỹapalaxate' naua lasauaxasete'.

₁₃Ca qai'neeta 'naaco' quesaua'maxare:

—¿Qamiri sqa 'yiiñii da reloqo'tegue dá'maq naloqojnaxanaxat? Ca ¿negue' quet cá'maq 'neeta quiyim 'yiiñii quet ná'maq liỹa naloqojnaxanqateripi? ₁₄Cá'maq ỹantegueñi aca lanecse ala, ca'maxare 'nejem cá'maq ỹa'xatetac da na'qaatec. ₁₅Ca 'uo' na qom 'nejem so nayic tajlec aso nanecse. Na'xaỹaxantapega da na'qaatec, qam ma' ime da na'xaỹaxanaxac, ca nanac so na'ỹaapec, ca rouootaxana'gue da na'qaatec qoỹanteguelec añi le'taxanata. ₁₆Chaqai 'uo' na liỹa qomyipi 'nejem aso nanecse tajlec yi 'laua ỹalliguigui na qa'. Quiyim 'xaỹa da na'qaatec, ca' 'xoic da netoonaxac quiyim icoñiguit. ₁₇Qam sqoỹoxo'ñiguilo naua lpa'yii, ca' sqoỹoxouec da lquesaxanaxa, ma' quena' novi' da le'xoric, loqo'm da nocanaxac souetapigui da na'qaatec, ca' qoshiiuec. ₁₈Chaqai na liỹa 'nejem aso nanecse tajlec yi 'laua leesat. Na'maxare ỹaatqajam na'xaỹaxana da na'qaatec. ₁₉Qam ỹapacqajnauec quiyim imelec ná'ogue nanchaqaina huelec na 'laua. Ca' na nesallaxa ỹayin, vire'ta quiyim nqo'ta ná'ogue nanchaqaina nouenec, ca ná'ogue najo ỹapolec da na'qaatec. Ca' se ỹa'ue ca laỹaxac nqai'en ca qom. ₂₀Qam 'uo' na 'xaỹa da na'qaatec, ca' icoñiguit, ca ỹaatqajam 'xoic da laỹaxac, ca 'nejem aso nanecse ala tajlec yi lo'yaxanec 'laua. Ca 'uo' ana 'nejem aso nanecse ala ỹovi' aca treinta ala añi 'oono'lli', chaqai 'uo' ana ỹovi' sesenta, chaqai cien.

₂₁Qai'neeta 'naaco' so Jesús:

—¿Ỹa'maqachiguiño' quiyim qaỹa'ue aca ncoỹeraxanaxaqui, ca qoỹan'ot aca nade lahi', loqo'm ca nomala'? Se ỹa'maxañi. Ta'ta'a quiyim qoỹanashiguim aca ncoỹeraxanaxaqui, qaiyi re'qojlec nqai'en. ₂₂Ma' sqaica quet cá'maq qoỹoxotetegueñi quiyim se re'oq nqohin, chaqai qaica ca 'ec se re'xogui se ỹovira'a quiyim qaỹa'den. ₂₃Ca cá'maq 'vii caua lque'laa lauaco quiyim na'xaỹaxan, ca 'maxaraic quiyim ỹa'maxate'tegue da na'xaỹaxanaxac.

₂₄Qai'neeta 'naac so Jesús:

—Ỹaatqajam na'ijñii'tegue dá'maq na'xaỹaxanaxaguii. Ma' cá'maq raloqojnaxanaxaguii quiyim 'ue ca 'ỹaañiuec, ca chaqaca ipaquichigui nqai'en ñi qota'olec, ma' 'ue ca ỹaanem qamiri. Qam ỹaatqajam paguec nqai'en cá'maq ỹaanema qamiri, ma' qamiri na'xaỹaxañitac. ₂₅Ma' cá'maq 'ue ca hueeto'ot, ca' paguec ca qoỹaanem ca'maxare. Qam cá'maq qaica ca hueeto'ot, ca vire'ta qanouora'gue cá'maq cocho'qui' hueeto'ot.

₂₆Chaqai qai'neeta 'naac so Jesús:

—Da lo'ueenataxanaxac ñi qota'a quiyim ỹoiquentac ná'ogue najo, da'maxare ỹaatqajam 'nejem ca qom quiyim ỹanñi aca lanecse quena 'laua. ₂₇Ime, ca' so'maxare queho laq, ca' queso liỹa na'xa'a, ca ne'laxashiguim, ca chaqaida queetalec na'xatari chaqai naua piri. Ca' aso lanecse ñaxashiguim, ca noquiiquetashiguim da llaqtaxac, qam so'maxare se ỹa'den cá'maq 'neeta da llaqtaxac aso'maxare. ₂₈Ma' chaqaina ná'maq 'laua ỹo'uet dá'maq noquigaxac da llaqtaxac aso'maxare. 'Au nenoxonshiguim asó'maq lashi; ime, ca' lotqai ana lenoỹaxai; ime, lotqai ana ala. ₂₉Ca quena' ỹi ana ala, ca qoyicpegue', ca' qanaqat, ma' mashic ỹovita yi laloqo'.

₃₀Qai'neeta 'naaco' so Jesús:

—¿Nega'ỹo' ca 'nejem nqaishinaq da lo'ueenataxanaxac ñi qota'a ma' ỹoiquentac ná'ogue najo? loqo'm ¿negue' ca paguec la'maxa quiyim saloqojnaxanaxagui? ₃₁Da'maxare 'nejem aca la ana mostaza quiyim qoỹanñi quena 'laua. Ana'maxare ỹaatqajam cocho'lli' ana ala, sqai 'nejem ná'ogue ana liỹa nanecse hueetalec ana 'laua. ₃₂Qam quena' qoỹanñi, ca' ñaxat, ca' eec da lañaqtaxac, chi ỹovireta'a quiyim ỹaatqajam late'ogue', napacalec ana liỹa nanecsepi. Late'ogue' na lasotellipi, ca' na qo'oollipi anac, ca' tauguilo naua lasotellipi, ca' nco'matec quena la'al.

₃₃Ca' chaqaida 'neeta'gue da lapaxaguinataxanaxac so Jesús quena' ỹa'xatetac da na'qaatec, ỹaatqajam 'xoic na reloqojnaxana 'nejem dajo, taachi'ñi nqai'en cá'maq qaishit qaỹa'den. ₃₄Ca' qaica quet cá'maq ỹa'xat quiyim se ỹahote'e ca laloqojnaxanaxaqui quiyim ỹa'xatetac da na'qaatec, qam co'quena' noda'chiguita saua lapaxaguinatqa, ca ichoxoteta dá'ogue da leloxoỹaxac.

₃₅Ca' chaqaiso' so na'xa'a co'na' mashic pe, ca' so Jesús 'naaco' quesaua lapaxaguinatqa:

—Saqta'gue da laseego ana latogot late'ogue'.

₃₆Ca saua'maxare no'ueenaqterañi so qomyipi, ca ỹauegue' so Jesús neesañigui aso qom lahi' huaxaỹaqse só'maq chaqai'en neetañigui so'maxare. Chaqai 'vio' saua liỹa' qom lahiri nauequetecto. ₃₇Ca anaco' so nonot lodegaxat, ca na lo'paxa taañigui nqai'en na huaxaỹaq aso qom lahi', ca noquiiquetashiguim na huaxaỹaq caso'maxare. ₃₈Qam so Jesús laqatam hueeta'gue ana nate' asó'maq neesañigui, ỹahote'e so na'xanaxat. Ca qanqo'xon, ca qohinapego':

—¡Qami' napaxaguinataxanaq! ¿Qaico' ca huapigui qavilli' quiyim sham iyiñiñi qomi'?

₃₉Ca' so Jesús ne'laxashiguim, ca retaxaỹa so nonot, chaqai 'naapega so huaxaỹaq:

—¡Nañaxañiriñi! ¡Re'maqaite'!

Ca qaguiguit so nonot, ca lotqai sá'ogue nayaarichiguiñi. ₄₀Co'na'le, ca 'naaco' so Jesús quesaua lapaxaguinatqa:

—¿Chi'negue ma' 'xoic rqolonaxahi? ¿Saqa'leco' ca rpi'ỹaxaguii?

₄₁Qam saua'maxare ỹaatqajam 'xoic da lqolonqa', ca chi nenatetecta', 'neraco':

—¿Negue' queto' dá'maq dajo ỹale? Ma' vire'ta na nonot chaqai na huaxaỹaq na'xaỹaxana.