Marcos 7

₁Co'na'le, ca qanqo'neu'a so Jesús queso fariseoipi, chaqai 'vio' saua napaxaguinataxana' quena naqataxaquipi novite', chicqora'gue da Jerusalén. ₂Sojo ỹalliripi 'vio' saua ỹauanchiguilo quesaua lapaxaguinatqa so Jesús quiyim napio'ỹi' naua napoquena quena' que'e, ma' se qaipaguelec da 'ueenataxac quiyim qaiquiỹo', ca' qoyiqueteguelgoto saua'maxare. ₃(Ma' so fariseoipi chaqai ná'ogue na liỹa judioipi ñaqai queeta'pegue' da no'ueenataxac so 'auaxaic leta'allipi quiyim se que'e no'm sqai piltalec quiỹota'pe naua napoquena. ₄Chaqai no'm chicqa'a ca nemeenqa', se que'e no'm saqa' nquiỹo. Chaqai 'vii naua liỹa' 'ueenataxaco queetalgoto, 'nejem da quena' qaiquiỹo ana 'taxaqui, chaqai ana nehoma, chaqai ana 'ueena, chaqai na nomala'.) ₅Ca' so fariseoipi chaqai so napaxaguinataxanaripi quena naqataxaquipi inatetac so'maxare 'naaco':

—¿Chi'negue ma' naua rapaxaguinataxahi', ma' sqai quelgoto naua no'ueenataxaco so 'auaxaic qareta'allipi? Ma' napio'ỹi' naua napoquena quena' que'e.

₆Ca' so Jesús 'naaco':

—Ỹaatqajam taachiguilo qamiri naua la'qaatqa so letaxaỹaxanqajnec ñi qota'a, leenaxat Isaías, co'na' ỹa'xatau'alo qamiri, ma' qamiri 'ñiỹac quiyim qamiri llaalqa ñi qota'olec. Co'na' so'maxare ỹiriñi dajo, 'neetasa':

₉Ca lotqai 'naaco' na'le:

—Ma' qamiri chaqai quiilgoto nauá'maq chi no'ueenataxagohi, ca' ỹaatqajam lachii' naua laqataxaco ñi qota'olec. ₁₀Ma' so Moisés 'naaco' na'le: “Se napacqachiñi' queca qataa'i' chaqai aca qachii'i'”, chaqai “Cá'maq ishiuen ca leta'a loqo'm aca late'e, ca' qaỹalauat.” ₁₁Qam qamiri 'ñiỹac ca qom ishit 'naapega ca leta'a loqo'm aca late'e: “Se seshit sotauañi', ma' ná'ogue na hueetaỹot qohinac Corbán” (da'maxare 'naac: mashic qoỹaanot ñi qota'olec). ₁₂Ca no'm chaqaida dajo, ca 'taxachiñi quiyim tot qaỹotauan ca neta'a chaqai aca nate'e. ₁₃Ca' 'eda dá'maq 'neeta quiyim qamiri qaica ca 'negue nqai'ñii dá'maq lelaataxanaxac ñi qota'olec, ma' quii'ueguelo na 'ueenataxaquipi queetauguilo qamiri. Chaqai 'xoic na liỹa 'viichitac 'nejme' dauajo.

₁₄Ca' so Jesús lotqai liỹa roỹaxanougui so qomyipi, ca 'naaco':

—Ñaq na'xaỹaxañiua' qamiá'ogue, chaqai 'yiiñii dá'maq shinac: ₁₅Ná'ogue ná'maq ỹa'ic ca qom quiyim que'e qaica ca ishit napio'xot da nachaalataxac. Qam ná'maq chicqa'ña añi le'taxanata, ca' chaqaina ná'maq ishit napio'xot ca'maxare. ₁₆Ma' qamiri 'vii naua rque'lahi lauaco, ca 'maxachi'tegue ca na'xaỹaxanaxaguii.

₁₇Ca co'na' so Jesús ca'e so qomyipi, ca inoxonougui so 'imec. Ca' saua lapaxaguinatqa inatesac so'maxare negue' cá'maq reloqo'tegue só'maq qaraloqojnaxantapega. ₁₈Ca so'maxare 'naaco':

—¿Ỹovira'alo qamiri sqa 'yiiñiỹo' dajo? ¿Sqa 'yiiñiỹo' quiyim ná'ogue ná'maq ỹa'ic na qom, se ishit quiyim napio'xot da nachaalataxac? ₁₉Ma' na'maxare se ỹovira'a añí'maq le'taxanata. Ta'ta'a quiyim ta'ñigui añi racom, ca ime, ca nenoxonec quena loshicmaxa.

Ca' quedajo, ca 'naac quiyim co'teeta ná'ogue ná'maq qaỹa'ic. ₂₀Chaqai 'naaco' qai'neeta:

—Ná'maq nenoxonec, chicqochigui añi le'taxanata ca qom, ca chaqaina ná'maq napio'xot da nachaalataxac. ₂₁Ma' añí'maq le'taxanata ca qom, ñí'maq chicqa'ña ná'maq se no'uen na'deenataxanaxac, chaqai quiyim nocachite'e' aca se loua, chaqai na dequenaxac, chaqai na nalauataxanaxac, ₂₂chaqai na nocataxac, ipiteta'a ca ỹoqa'a, chaqai na se no'uen, na'maachic, qaỹaataq ca nisha'a, da npa'guenaxanaxa, ỹa'xat cá'maq sqai llic, maqajnaxac, chaqai se raỹajnataxan. ₂₃Ca ná'ogue ná'maq se no'uen quiyim chicqaugui ca qom, ca' chaqaina ná'maq napio'xot da nachaalataxac.

₂₄Ca' so Jesús ca'e yí'maq hueeta'ñi, ca quepegue' yi 'laua Tiro chaqai yi Sidón. Ca quepegue' ca 'imec, chaqai ỹahotaque quiyim qaica ca ỹa'den so'maxare, qam se ishit nañoxojñi. ₂₅Ma' chi ncopaata, ca 'ue aso 'aalo 'xaiguelec so Jesús. So'maxare 'ue aso llaale nequetegaxai 'ue so le'ec lecmaxaic. Ca aso'maxare nacpegue' so Jesús, ca ỹa'chi'iñi naua le'cootal. ₂₆Qam asó'maq 'aalo sqai judío lase, ma' so'maxare Sirofenicia lase. Aso'maxare nacpegue' so Jesús, ỹashiilo'ot quiyim ỹo'daauec so le'ec lecmaxaic aso llaale. ₂₇Qam so Jesús 'naaco' caso'maxare:

—Ñaqai 'xañirac na ñaalqaipi quiyim 'au que'e, ma' se ỹa'maxañi quiyim qarouootaxana'gue na pan quena ñaalqaipi, ca qoỹaanem na pioqripi.

₂₈Ca aso'maxare 'naaco':

—Ỹaatqajam llic da 'ñirac, qami' ỹa'gaxala'. Qam vire'ta na pioqripi hueeto'ot ca nqui'ỹaxala', na'maxare ỹa'queeta'guit ná'maq najñi loq lete cá'maq ñaalqaipi.

₂₉Ca' so Jesús 'naaco' na'le caso'maxare:

—Ỹaatqajam ỹa'maqachiguiñi dá'maq 'ñirac. Ca' nagui, ca pilli', ma' mashic inoxonec só'maq ne'ec lecmaxaic cayi qachaalli'i'.

₃₀Ca co'na' ỹovi' aso'maxare queca la'a', ca iuanejlec aso llaale hueetalec ca lomala'. Ca só'maq ne'ec lecmaxaic shi'co' inoxonec caso'maxare.

₃₁Ca so Jesús lotqai ca'e yi 'laua Tiro, ca quejlec yi Sidón chaqai na na'aateripi quiyi 'laua Decápolis, chi ỹoviretaqso'ma aso latogot late'ogue' quiyi Galilea. ₃₂Ca' quiyi hua'ño' na' qanauegueu'a so ỹale ra'ñaagui lqahic chaqai na'perapeguec la'qaatqa. Ca qaỹashiilo'ot quiyim ỹashil-lec so'maxare. ₃₃So Jesús ỹaueguec, nodaqajantec queso qomyipi. Ca ỹahote'e ada lpalaaqate ỹa'deu'guelo naua lque'laa lauaco, chaqai natoxoguilo naua lpalaaqate, ca ipootau'a ñi lo'legaxanaxat. ₃₄Ime, ca' ra'ishiguim quena piguim, ca nauec so lacat, ca 'naaco' queso'maxare:

—¡Efata! —da'maxare 'naac: ¡Nauachiguilo naua lque'laa lauaco!

₃₅Ca' quedajo, ca huachiguilo naua lque'laa lauaco so ra'ñaagui lqahic, chaqai so lo'legaxanaxat imeuec, ca ỹa'maqachiguiñi quiyim retaqa. ₃₆Ca' so Jesús ỹaatqajam 'ue da laqataxac quiyim sqaica ca qara'qaataxana. Qam na' paguec dá'maq laqataxac quedajo, ca 'eco' lama'xa qanoquigaxatec quiyim qaỹa'xat da'maxare. ₃₇Ca ỹaatqajam 'xoic da ne'laxa, ca qohinaco' quen:

—Ỹaatqajam ná'ogue ná'maq ỹo'ueetetac ỹa'maqachiguiñi, ma' vire'ta na ra'ñaagui lqahic 'qaa nqai'en, chaqai na qaicaua la'qaatqa retaqa nqai'en.