Marcos 9

₁Ca' so Jesús qai'neeta 'naaco':

—Ỹaatqajam llic da shinac caqamiri, quiyim 'vio' caua quená'maq ỹalequesaho nagui saqa' ileue', ca' iuanchirigui ma'le da lo'ueenataxanaxac ñi qota'olec chaqai da lquesaxanaxa ma' ỹoiquentac ná'ogue najo.

₂Ca co'na' mashic ỹore'ueguelo saua seis na'xata', ca' so Jesús qaisauate' ỹauegue' saua Pedro, Jacobo, chaqai so Juan, ca taashi'megue aso quemaralec ladocai. Ca' quiyi hua'ño' na' qaỹadalaxat da no'ueenataxac so'maxare, ỹauanchiguilo' nqohine' na'le saua'maxare. ₃Saua loho ỹaatqajam qashilgue' chaqai ỹaatqajam lalagaxaqa, ỹaatqajam qaica ca qom quena 'laua quiyim quiỹoxon 'nejme' lalacqa' nqai'ne' saua loho. ₄Ca saua'maxare iuane'talo saua Elías chaqai so Moisés retaqasa'pegue' so Jesús. ₅Ca' so Pedro 'naaco' queso Jesús:

—Qami' napaxaguinataxanaq, ¡ỹaatqajam chalego la'maxa na seuqata'ñi! Quiyim so'ueetaxai' caua tres 'imqolqai', 'óna caqami', ca liỹa queda Moisés, chaqai ca liỹa queda Elías.

₆Ma' saua lapaxaguinatqa ỹaatqajam no'chi', ca' so Pedro se ỹa'den dá'maq ỹa'xatetac. ₇Co'na'le, ca' noviriñi so naueguelec hueetauguilo saua'maxare, ca queso naueguelec 'maxaugui so na'qaatec 'naaco':

—Najo ná'maq ỹaalec ỹaatqajam ỹauochaxat, ca' chaqaida na'xaỹaxañiỹa.

₈Ca co'na' namaterashiguim, ca' qaica ca liỹa iuanta, qaisoota so Jesús.

₉Ca co'na' mashic renoterec caso quemaralec ladocai, ca' so Jesús qatetapegalo saua lapaxaguinatqa quiyim qaica cá'maq ỹa'xajtem dá'maq lauanaxanaxague', toco' ma' najo ỹale llaalec lotqai liỹa nca'leuec. ₁₀Vichiguiño' saua'maxare qaica ca ra'qaataxantem, qam chi nenatesapigui negue' cá'maq reloqo'tegue dá'maq lotqai liỹa nca'leuec. ₁₁Ca' qainatetac so Jesús:

—¿Chi'negue ma' ná'maq rapaxaguinataxanta'pegue na naqataxaquipi 'naac 'au novi' ma'le ca Elías?

₁₂Ca so'maxare 'naaco':

—Ỹaatqajam llic quiyim 'au novi' ma'le ca Elías, quiyim ỹa'maxajñi ná'ogue na leloxoỹaxaquipi. Chaqai ¿negue' cá'maq 'nerac qai'neeta naua naneresañi la'qaatqa ñi qota'olec quiyim ỹa'xate' dá'maq 'neeta ma'le ca ỹale llaalec? Quiyim 'ue ca le'xoric, chaqai ma'le qaica nqo'ta ca'maxare. ₁₃Qam ỹim shinac caqamiri quiyim so Elías shi'gue novi'. Qam canchi qohinta'gue na' qoỹoiquentac so'maxare, ỹaatqajam ipaquichigui nqohin dá'maq naneretañi la'qaatec ñi qota'olec queso'maxare.

₁₄Co'na'le, ca pile' quiyí'maq hueesa'ñi saua liỹa' lapaxaguinatqa, ca iuanteta so 'xoic qomyipi lapoỹau'alo saua'maxare. Chaqai 'vii qai'neeta saua napaxaguinataxana' quena naqataxaquipi retaqata'guita saua'maxare. ₁₅Ca co'na' qaidaana'guit so Jesús, ca sá'ogue 'ue da le'laxa, ca qane'guenta'guit so'maxare, ca qaiquin. ₁₆Ca so'maxare inate'o' saua'maxare:

—¿Negue' cá'maq 'neeta quiyim taxahita'guita yaua'maxare?

₁₇Ca 'uo' so 'óna hueete'eyi 'naaco':

—Qami' napaxaguinataxanaq, ñauega qami' ñi ỹaalec, ma' 'ue ñi le'ec lecmaxaic se retaqa nqai'en. ₁₈Ma' quecá'maq canchaqaica hueeta'ñi, ñi le'ec lecmaxaic quena' naqajñi, ca nenaxañi. Ca' nac nqai'en na ro'i na lap, chaqai iquishquinta' nqai'ne' naua louee, ca vire'ta quiyim tot qaica ca la'ñaxac. Shi'gue sashiilo'oto naua rapaxaguinataxahi' quiyim naqate' ñi ne'ec lecmaxaic, qam se ishite'.

₁₉Ca' so Jesús 'naaco':

—¡Ỹaatqajam qaica ca huelec najo qomyipi! ¡Canchaqai taỹa'co' quiyim salequetapouguilo qamiri, chaqai canchaqai taỹa'co' quiyim ñiualaxaintegueto qamiri! Ñaq naviguiiri' quenajo ñí'maq ne'nec.

₂₀Ca' qaỹauega'a so'maxare so ne'nec. Ca co'na' so ne'ec lecmaxaic iuane'ta so Jesús, ca ileueta nqai'en so ne'nec, ca so'maxare huaañi naqalcqotegueri', ca' naauec nqai'en na ro'i na lap. ₂₁Ca' so Jesús inato' na'le so leta'a:

—¿Shi'gom dá'maq 'neetari'o' quen dajo?

Ca' so leta'a 'naaco':

—Shi'gue na' ñaqai noctoqui'. ₂₂Chaqai mashic 'xoic quiyim ñi ne'ec lecmaxaic taañigui nqai'en na norec chaqai na huaxaỹaq, ma' ỹahotaque ỹalauat. Ca no'm chaqaida quiyim shichi' 'ue ca 'viichi', quiyim qare'xoriñi', ca qarotauañi'.

₂₃Ca' so Jesús 'naaco':

—No'm shichi' vi'relec, qaica ca qaỹaqalanac quecá'maq huelec.

₂₄Ca co'na'le, ca só'maq leta'a so ne'nec ỹaualqo':

—¡Seuelec; qam yotauañi', qaiyi paguec ỹaatqajam seuelec!

₂₅Ca co'na' so Jesús ỹa'den quiyim mashic 'xoic so qomyipi lapoỹaho, ca' retaxaỹa so ne'ec lecmaxaic, 'naaco':

—Qami' ne'ec lecmaxaic se retaqa chaqai sqa 'qaa nqai'ñi' ca qom, shinapega qami' noxoñirec quena ne'nec, qam tot liỹa noxoñirougui na'maxare.

₂₆Ca' so ne'ec lecmaxaic ỹaualaq, ca' ileueta nqai'en so ne'nec. Ca inoxonec, qam 'ec ileu nqai'en. Ca' queda, ca 'xoic na 'neetapega mashic ileu so'maxare. ₂₇Qam so Jesús ỹacona ada laua, ca navicshiguim. Ca so'maxare nachajñi.

₂₈Co'na'le, ca' so Jesús inoxonougui ca 'imec. Ca' saua lapaxaguinatqa ỹoỹooteterec so'maxare, ca inate', 'neraco':

—¿Chi'negue ma' qomi' se seshitaq so'daqauec so ne'ec lecmaxaic?

₂₉Ca so'maxare 'naaco' quesaua'maxare:

—Ná'maq 'nejem sojo ne'ec lecmaxaic quiyim qaỹo'daauec, qam ỹouen quiyim ca qom quelec da nqouagaxainaxac chaqai nqopaaqachit.

₃₀Ca co'na' que' quiyi hueesa'ñi, ca queeterelec yi Galilea. Ca' so Jesús ỹahotaque quiyim se qaỹa'deene', ₃₁ma' so'maxare ra'qaataxantapegalo saua lapaxaguinatqa, 'naaco':

—Najo ỹale llaalec ma'le qoỹaanougui na qomyipi, ca' qaỹalauat ma'le. Qam ma' ime' caua tres na'xata', ca lotqai liỹa nca'leuec ma'le.

₃₂Qam saua'maxare se ỹa'deene' dá'maq qohinac, chaqai no'chiiralec quiyim liỹa renataxane'.

₃₃Ca co'na' mashic ỹovirera'a yi na'a' Capernaum. Ca co'na' mashic neesa'ñi ca la'a', ca' so Jesús inate'o' saua lapaxaguinatqa, 'naaco':

—¿Negue' cá'maq noqollicchitapigui quiyi quena nayic?

₃₄Qam saua'maxare i'maretem', ma' queso nayic noqollictesapigui quiyim negue' cá'maq paguec qaimaqachin ma'le quesaua'maxare. ₃₅Co'na'le, ca nqa'xanñi so Jesús, ca roỹaxanouguilo saua doce lapaxaguinatqa. Ca 'naaco' quesaua'maxare:

—Cá'maq ỹahotaque quiyim 'auaxaic, ca' chaqaica cá'maq paguec co'uaataxanta, chaqai quelola ná'ogue na liỹaripi.

₃₆Co'na' ime, ca roỹaxana so noctoqui', ca' illaañigui na lavinñi quesaua'maxare. Ca' qa'aalegue, ca 'naaco':

₃₇—Cá'maq qom quená'maq huelec aỹim, quiyim icoñiguit ca noctoqui' 'nejem najo, ca' quelola, ca' icoñiguit aỹim. Chaqai cá'maq icoñiguit aỹim, mesqaỹimeta icoñiguit, ma' qai'neeta icoñiguit ñí'maq yila'.

₃₈Co'na'le, ca' so Juan 'naaco':

—Qami' napaxaguinataxanaq, qomi' 'ue so seuanaxa ro'ootaxantapega da qadeenaxachi' quena ne'ec lecmaxaic; qam ma' se qanauegaxaua, ca' qomi' se sa'maxarenaq.

₃₉Qam so Jesús 'naaco':

—Se ỹa'maxañi quiyim olliỹapeguem, ma' qaica quet cá'maq quiyim ishit ỹo'uet ca se qaiuanapega, ro'ueenataxana da ỹeenaxat, ime, ca ishit quiyim 'ue ca ỹa'xat se ỹa'maxañi caỹim. ₄₀Ma' cá'maq sqai qanpa'guenaxaua, ca' qarotaua. ₄₁Ma' canchaqaica quiyim 'ue ca ỹaanema qamiri 'eno'm chaqai 'oono'lli' aca 'taxaqui queca huaxaỹaq, quiichigui nqai'en da ỹeenaxat, ma' mashic qamiri ỹalamaxarete', ca ca'maxare ỹaatqajam 'ue ma'le ca nishiue'.

₄₂Canchaqaica quiyim chicqochigui quiyim 'ue ca lasauaxaset quenaua collo'olqai' quiyim mashic huerelec aỹim, ca paguec la'maxa quiyim qainaxañigui aca huaaxai, qaicoñireto'ot na lqosot ca qa' lodegaxat nopoxoiqataxanaxat. ₄₃Chaqai no'm na rqai'laxachi' ỹovirau'a nqai'en ca rasauaxashichi', ca 'maxaraic quiyim chaqairec. Ma' paguec la'maxa quiyim vichirau'a ca nca'laxa, 'eno'm 'oonoqui' ca rqai'laxachi', qam mesqaida quiyim nalo'ojta' naua rqai'laqachichi', qam qarenaqairiñigui ca ncopatoqo' na sauaqhuaiquipi, cá'maq hua'ñi ca norec qaica ishit ỹo'mat, ₄₄yí'maq hua'ñi na ñilo' se ileu chaqai ca norec sqai 'om. ₄₅Chaqai no'm na richi'i' chicqau'a quiyim 'ue ca rasauaxashichi', qai'neeta chaqairec. Ma' paguec la'maxa quiyim vichirau'a ca nca'laxa qami' chisaq, qam sqai 'nejem quiyim nalo'ojta' naua richilli', qam qarenaqairiñigui ca ncopatoqo' na sauaqhuaiquipi, cá'maq hua'ñi ca norec qaica ishit ỹo'mat, ₄₆yí'maq hua'ñi na ñilo' se ileu chaqai ca norec sqai 'om. ₄₇Chaqai no'm añi nqochi'i' ñí'maq 'em quiyim 'ue ca rasauaxashichi', ca naqachi'. Ma' paguec la'maxa quiyim qami' qotesaq, qam noxoñira'a ca lo'ueenataxanaxac ñi qota'olec ma' ỹoiquentac ná'ogue najo, mesqai 'nejem quiyim nalo'ojta' naua nqochichi', qam qarenaqairiñigui queca ncopatoqo' na sauaqhuaiquipi, ₄₈yí'maq hua'ñi na ñilo' se ileu chaqai ca norec sqai 'om.

₄₉Ma' ná'ogue ma'le na qomyipi qaỹa'maxajñi, qam qaỹahote'e ca norec; chaqai ná'ogue na nachitaxanataxanaxat qaimiichigui ma'le queca 'ue. ₅₀Na 'ue ỹaatqajam lo'yaxanec. Qam no'm eec na lochiviaxa, ca' ¡tot qaishit quiyim liỹa qaỹouen! Ca 'nejme'o' qamiri ca 'ue quiyim nalequejnaxanaxat, chaqai quiñi 'óna huaqui'chiguit na liỹaripi.