Nehemías 2

₁Ca' 'ue so na'xa'a queso shiraigo leenaxat Nisán, na' ỹovire'oga so ñaaxa veinte quiyim neetaho nashi. Ca na' socoretapigui queso lataxa aso ne'taxaqui so nashi, ca retan quiyim sachicotam. ₂Ca yinatetac, 'naac:

—Ỹaatqajam chicoitem'. ¿Chi'negue? 'Ec sqai qami' ralolaxaic, ca' peeta'a 'ue ca 'neeta.

Ca' quiyi na'le, ca' ỹaatqajam 'ue ca iqolonaxa. ₃Ca' shinac na'le queso nashi:

—¡Ỹaatqajam se neme quiyim qami' nashi! ¿Negue' quet cá'maq 'neeta quet quiyim se sachicota? Ma' yi na'a' lelauaqate' yaua ita'al ỹaatqajam qanopoxoỹaxajñi chaqai naua lasomi' ỹoviquete'.

₄Ca' so nashi 'naaco':

—¿Negue' cá'maq vi'saque quiyim so'uet caqami'?

Ca na'le, ca' saanot da ỹa'qaatec ñi qota'olec queda piguim. ₅Ca' shinac na'le queso nashi:

—Qami' ỹashi, no'm 'maxariñite' da ỹa'qaatec, no'm chaqaiyi quiyim rqouaquitegue aỹim, ca' sashiila'e' quiyim yilachitegue da Judá yí'maq na'a' huera'ñi yaua ita'al, ma' sahotaque quiyim liỹa ño'xonshiguim.

₆Ca' so nashi huaqate'e' aso loua, ca 'naac caỹim:

—¿Ỹorete' caua na'xata', ca vichi' quiyim 'itegue da'maxare? chaqai ¿lagui, ca' rapilli'?

Ca' ỹim sa'xatem cá'maq laloqo' quiyim yapil, ca so'maxare yasenetec quiyim shic. ₇Chaqai qai'neeta shinapega quiyim no'm ỹa'maxarenta, ca' ỹaanem aỹim ca la'qaatec ỹeretañi tai'a nqai'en so nashillipi pa'a'gue da lauashiguim caso lachiugue Eufrates, qaiyi sqaica ca yanaxat, chi sovireta'a ma'le yi Judá; ₈chaqai aca liỹa nerecse tai'a ca Asaf, cá'maq reloqota'a yi nashi no'oochi, quiyim nañaañim ca qo'paq, qaiyi so'uet ca lasomyipi queso lquepaqataxanaxat añi no'ueenaxanaxaqui, chaqai so lquepaqataxanaxat yi na'a' lodegaxat, chaqai cá'maq 'imec senaugui. Ca' so nashi nañaañim sá'ogue só'maq sahotaque, ma' yotauan ñi qota'olec.

₉Ca na' sovitalo saua nashil pa'aasa'gue da lauashiguim caso lachiugue Eufrates, ca' saano aso lerecse so nashi, ma' so'maxare ỹa'ue na'le so ila' neloxoỹaripi neetashiguim, ỹa'queetalec so lashi. ₁₀Qam na' 'ue da la'xaỹaxac so Sanbalat só'maq na'ñi yi na'a' Horón chaqai so Tobías na'ñi yi 'laua Amón, ca so'maxare ro'o ma' ñovi' sahotaque sotauan so llaalqaipi so Israel.

₁₁Ca na' sovita yi Jerusalén, ca' quesaua tres na'xata' quiyim senta'ñi yi'maxare. ₁₂Ca' ñi'laxashiguim queso pe. Ca' 'vii saua iỹareta'pe ỹale', qam qaica ca sa'deenaxanaxanegue dá'maq illiichigui iuel ñi qota'olec quiyim so'uet quiyi Jerusalén. Qaica ca liỹa iñaxala', qaisoota só'maq sentalec. ₁₃Ca' queso pe shiquetougui ñi lasom queso ca'megue, ca sa'oga aso huaxaỹaq lahi' leenaxat isecỹac lodegaxat 'ec naanoc, chaqai so lasom lete loma'. Ca' sa'ajantac so lquepaxaset yi Jerusalén ỹaatqajam 'guiñi chaqai naua lasomi' ỹaviquete'. ₁₄Ime, ca' lotqai shicpegue' ñi lasom aso huaxaỹaq lahi', chaqai aso neuaxaỹaq lahi' so nashi. Qam so iñaxala' se ishit que'tegue yi'maxare. ₁₅Ca ma' ñaqai pe na'le, ca shiquete'uegue aso ñaachi Cedrón, ca na' ime sa'ajantac so nquepaqataxanaxat, ca' sopilo shiquetou'gue so lasom na'ñi so ca'megue.

₁₆So nashillipi se ỹa'den ca saigue chaqai cá'maq so'ueetetac. Chaqai qai'neeta saqa' sa'qaataxana so judioipi quená'maq netaxaỹaxanqajanqaipi, chaqai na nemaqachinec qomyipi, chaqai na nashillipi, chaqai na liỹa qomyipi quená'maq taỹapegueu'a ma'le da no'ueenataxanaxac. ₁₇Ca na'le, ca' shinapega so qomyipi:

—Qamiri 'yiiñita quiyim 'xoic lqalaic dá'maq shinqata, ma' na Jerusalén ỹaatqajam qanopoxoỹaxachichiguiñi chaqai naua lasomi' ỹaviquete' nqohine'. Ca' vichiguiño' lapohiguit aỹim, ca' liỹa ño'xonaxashiguim na lapoxot na Jerusalén, qaiyi totqai qomi' ne'naqa.

₁₈Ca na' sa'xatem da lqouagaxa ñi qota'olec quiyim yotauan chaqai saua la'qaatqa nañaañima ñi nashi, ca' so qomyipi 'naac caỹim:

—¡Chaqa'ma' ño'xonaxashiguim ca'maxare!

Ca so qomyipi 'ue da na'ñaaqataxac, ca chaqa'ma' na'ñaxajta'. ₁₉Qam cana' 'ue da la'xaỹaxac so Sanbalat só'maq na'ñi yi Horón, chaqai so Tobías só'maq na'ñi yi Amón, chaqai so Gesem só'maq na'ñi yi Arabia, ca ỹaatqajam i'neeta'pe qomi', ca quedá'maq 'naac se nqo'talo qomi':

—¿Negue' cá'maq viitaque 'viichii qamiri? ¿Loqo'm viitaque npa'guiñi'e' ñi qarashi?

₂₀Qam ỹim shinac na'le quesaua'maxare:

—Ñi qota'olec queda piguim ỹo'uet ma'le quiyim somataq, ma' qomi' lelaatqa. Ca so'ueenataxanaq, ca' qamiri sqa 'iỹapegueu'a na Jerusalén.