Números 6
Dá'maq leloxoỹaxac cá'maq qaỹoỹoota'oga nca'acsec quiñi qota'a
1Ca' ñi qara'gaxala' ỹaatqajam ỹalamaxachichigui so Moisés, ca 'naaco':
2—'Ñirapego' na Israel llaalqaipi queda shinac, 'neetasa': Ca ỹale loqo'm aca 'aalo quiyim mashic ỹaanec da la'qaatec quiyim nañaanot ñi qara'gaxala' quiyim nazareo, 3ca' se ni'chigui na lataxa, chaqai sqaica ni'chigui quena quiñiuguetqataxan, chaqai na lochiviaxaic lataxa, chaqai canchaqaica liỹa quena qani'chigui, loqo'm ca nelamecsec li'i ana 'uva. Chaqai se ỹa'ic ana 'uva la chaqai ana nelamecse 'uva nashiviaqata. 4Quiyim saqa' ỹomat cá'maq laloqojnec quecá'maq la'qaatec quiyim nco'taxateta, ca ca'maxare se ỹa'ic canchaqaica chicqaugui ana 'uva. 5Chaqai se nepetec na laue qai'neeta, ta'ta'a quiyim ỹaxanegue ca llaqtaxac na laue, toco' ma' ỹovire'oga cá'maq laloqojnec quecá'maq ỹaanec la'qaatec. Ma' ca'maxare ỹouen quiyim nañaanto'ot ñi qara'gaxala'. 6Chaqai quecaua'que cauajo na'xata' se nqo'neu'a canchaqaica leuaxaic, 7'eno'm quiyim ileu ca leta'a, loqo'm aca late'e, loqo'm aca lqaỹa 'aalo loqo'm ca lqaỹa ỹale, qaiyi se napio'o. Ma' ca'maxare ỹouen quiyim nco'taxateta quiyim nañaanot ñi qara'gaxala'. 8Ca' caua'que caua na'xata' laloqojonqa quiyim saqa' ỹovirerec, ỹouen quiyim nañaanto'ot ñi qara'gaxala'.
(6.9-21 Dá'maq 'neeta quiyim ỹa'maxate'tegue da nachaalataxac so nazareo.)
Da lqouagaxa cá'maq mashic netaxaỹaxanqajnec
22Ca ñi qara'gaxala' ỹalamaxachichigui so Moisés, ca 'naaco':
23—'Ñirapega ñi Aarón chaqai na llaalqaipi quiyim ma' ỹaanem da no'uen llicyaxac na Israel llaalqaipi, ca 'ne'teco'yi ca la'qaatec:
24Ñi qara'gaxala' ỹaanem qami' ca no'uen qayicyaxaqui' chaqai quepaqataxanlec qami';
25ñi qara'gaxala' ỹaatqajam ỹa'maxarenta qami' chaqai ỹaanem qami' da lqouagaxa;
26ñi qara'gaxala' ỹaatqajam i'xoren qami' chaqai ỹaanem qami' ca ra'maxa'e'.
27Qaiyi na'maxare ỹa'xatetac da ỹeenaxat quiyim ỹaanlec na Israel llaalqaipi, ca ỹim saanem ma'le ca iqouagaxa na'maxare.
(7.1—10.32 Najo ỹa'xat ana nachitaxanataxanqate quiyi lanatqa' ñi qota'olec chaqai quena' qoỹaanshiguim quena llaalqaipi so Leví chaqai quena' qaỹo'leente na' qoyique'e yi Egipto. So llaalqaipi so Israel na'maxajñi quiyim ca'e yi Sinaí.)
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
