Filipenses 1

₁Ỹim Pablo chaqai Timoteo qomi' lelaatqa so Jesucristo, seraxañi ana qarelaata, tai'a nqaishinaq ná'ogue na qarqaỹaripi chaqai na la'gaxalateripi chaqai ná'maq lotauaripi quená'maq neeta'ñi na na'a' lodegaxat Filipos, ná'maq lalamaxareteripi ñi qota'a chaqai na'deetau'a so Cristo Jesús. ₂Qamiri coñiguit ma'le da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.

₃Quena' so'lliinchi'chi qamiri, ca lotqai saantacot da ña'aachic ñi qota'a. ₄Ca quena' ñqouagaxain, 'ue quen da ñitoonaxac quena' sashiilaxanteguelgoto qamiá'ogue. ₅Ma' qamiri qai'neeta lliguiỹau'a quiyim 'xachii dá'maq na'qaatec, chicqochigui cá'maq 'auaxaic na'xa'a na' coñiguit da na'qaataxac so Jesús, chi ỹovireta'a nagui. ₆Ca' ỹaatqajam se'taxachichiguiñi quiyim ñi qota'a, ma' mashic ỹo'uet dá'maq 'maxaraic lo'ueenataxanaxac caqamiri, ca' se neme quiyim queetalec ỹo'ueetetac, ỹovireta'a nqai'en cá'maq na'xa'a ma' liỹa novi' so Jesucristo. ₇Ca 'maxaraic quiyim ỹa'deenataxanaxac dajo caqamiá'ogue, ma' 'ue da ỹoqo'iichi caqamiri, ma' nouañiỹau'a qai'neeta da qouagaxa chicqo'ot ñi qota'a, 'eno'm quiyim aỹim ncoñiiteguesec, loqo'm quiyim seloqoguit na nashillipi quiyim sqoshiilec dá'maq na'qaatec chicqaugui da nca'laxa, chaqai se'taxajñi quiyim lliqueta da'maxare. ₈Ma' ñi qota'a ỹa'den quiyim ỹaatqajam yqo'talo qamiri, sahote'e dá'maq sotaxaraic le'xorenataxanaxa so Jesucristo. ₉Ca quena' ñqouagaxaintac, ca sashiilaxantac quen quiyim nqo'neuec dá'maq ne'xorenataxanaxa hueetauguilo qamiri quiyim 'xoic ca ra'deenaxanaxahi qaiyi ná'ogue 'yiiñii, ₁₀chaqai 'yiiñii nca'aiua'a cá'maq ỹaatqajam ỹa'maqachiguiñi. Qaiyi ỹaatqajam co'teeta da nachaalataxaguii, qaiyi qaica ca 'ue ca lasauaxaset ma' novi' so Cristo. ₁₁Qaiyi so Jesucristo no'xataxachichigui ma'le da nachaalataxaguii quedá'maq 'maxaraic 'ueenataxac, qaiyi qaimaqachin dá'maq lecaic ñi qota'a.

₁₂Qamiri ỹaqaỹa', ỹim sahotaque 'yiiñii quiyim dá'maq sovira'guit na'le, da'maxare 'ec ỹotauan da na'qaataxanaxac queda na'qaatec chicqaugui da nca'laxa. ₁₃Ca ná'ogue ná'maq neetaho quena nouaataxanaq quená'maq reloqota'a na la'a' ñi nashi quena Roma chaqai ná'ogue na liỹaripi, ỹa'den quiyim aỹim ncoñiiteguesec sasouetapigui quiyim shiquetalec so Cristo. ₁₄Ca na' qaỹa'den dá'maq 'neeta quiyim qaycoñiretari', ca sham ná'ogue na qarqaỹaripi na'ñaxat, ca' qaica ca no'chaaque quiyim ỹa'xat da la'qaatec ñi qota'a chaqai nqo'neuec da lpi'ỹaxac queso qara'gaxala'.

₁₅Ca' llic quiyim 'ue na ỹa'xatetac so Cristo, qam queetaugui da lpa'guenaxanaxac chaqai da laquiitaxanaxac, qam 'ue na liỹaripi 'maxaraic da la'deenataxanaxac. ₁₆'Ue na chi ỹa'xatetac so Cristo, ma' 'ue ca naquitetaque. Ca' se ỹaqamqata, ma' ỹahotaque quiyim lama'xa ypataxañi nagui ma' mashic ỹim ncoñiiteguesec. ₁₇Qam na liỹa 'ue da le'xorenataxanaxa, ma' ỹa'den quiyim qaycoñiretari' ma' sqoshiiteguelec da na'qaatec chicqaugui da nca'laxa. ₁₈Qam ¿negue' quet cá'maq 'negue? Cá'maq canchaqai 'neeta, quiyim ỹaqamqata quiyim ỹa'xat so Cristo, loqo'm 'e'. Qam dajo ỹo'uet da ñitoonaxac quiyim qaỹa'xat so Cristo.

Chaqai nqo'neuec ma'le ca ñitoonaxac, ₁₉ma' ỹim sa'deenta quiyim qaicanqaida ma'le queda ñachaalataxac, ma' qamiri nqouagaxaiñitalec aỹim chaqai da lotaanaxanaxac caỹim so Espíritu Santo neetaquio' na'le so Jesucristo. ₂₀Ma' ỹim dá'maq sahotaque chaqai da ñaquitaxac quiyim qaica ca ñayiloxontaque. Ta'ta'a quiyim qaica yo'chiitaque quiyim sa'qaataxantac, quiyim shintari' nagui chaqai quecá'maq saata'gue, qaiyi paguec re'oq caỹim dá'maq lecaic so Cristo, quiyim ñaq yca'leetauec, loqo'm quiyim mashic yileu. ₂₁Ma' ca ilauaxa 'ec chi ỹaueguec ma'le, ma' dá'maq ño'ueenataxac hueetagui so Cristo. ₂₂Qam no'm ñaq yca'leetauec, ca' ñaq so'ueenataxantacot so qara'gaxala'. Ca' se sa'den nega'ỹo' cá'maq sapacqajnauec. ₂₃Ca' 'xoic da lqalaic quiyim ñca'aguilo daua dos. Ma' da liỹa ỹa'deenataxanaxac 'neetasa': Ỹim yishiitaque quiyim yileu, qaiyi shic, ca' sento'ot so Cristo. Ca' dajo 'eco' paguec la'maxa caỹim. ₂₄Qam queda liỹa ỹa'deenataxanaxac 'neetasa': 'Eco' paguec la'maxa caqamiri quiyim ñaq yca'leetauec, ca salequetauguilo qamiri. ₂₅Ma' ỹaatqajam lliqueta nqaishin dajo, ca sa'den quiyim ñaq salequetauguilo qamiri. Ca' sotauañii quiyim nqo'ñiishiguim qamiri, qaiyi nqo'neuec ca netoonaxaguii queda rpi'ỹaxaguii. ₂₆Ca' qaiyi lotqai liỹa salequetauguilo qamiri, ca' 'ue ca netoonaxaguii 'ỹaañitacot ca na'aachicyaxaguii so Cristo Jesús.

₂₇Qaidaata quiyim nquipichiỹa'pegue' quiyim nachiñi'chiguit nqai'ñii dá'maq no'ueenataxaguii da na'qaatec qaỹa'xat queso Cristo. Ca' quiyim saiquena loqo'm qoỹoqo'ta ỹim, qam sahotaque quiyim 'ue ca ỹa'xaỹaxac quiyim ỹaatqajam quiijlec chaqai necoñii'jta' queda rpi'ỹaxaguii chicqochigui da na'qaatec chicqaugui da nca'laxa, ₂₈qaiyi se rqo'ỹoqochichii ná'maq pa'guenta'pe qamiri. Ca' dajo, ca' ỹaatqajam re'qoota quiyim na'maxare tai'a quiyim na'laañi, qam qai'neeta ichoxot dá'maq rca'laxahi. Qam dajo chicqo'ot ñi qota'a. ₂₉Ma' qoỹaanema qamiri da na'aachicyaxaguii ma' viilec so Cristo. Qam sqaidaata quiyim viilec so'maxare, ma' qai'neeta viriỹau'a da re'xoriguii, soviỹalec so'maxare. ₃₀Ma' qamiri chaqai ỹim dá'ogue da qaraloquiaxac. Chaqai shi'gue huañiỹa qamiri ca iloquiaxac na'le, chaqai nagui 'ue da ra'xaỹaxaguii quiyim ñaq seloquitac.