Proverbios 25

₂Da lecaic ñi qota'olec hueetagui nqai'en ca se re'xogui,

chaqai nemaqajnataxanaxa quena nashillipi quecá'maq ỹovirau'a ỹa'xat ca'maxare.

₃Da lishicshi'ma na piguim,

da lishigui'ña na 'laua

chaqai da la'deenataxanaxac na nashillipi,

da'maxare se qaique'guenejlec qaỹovira'a qaỹa'den.

₄No'm qanaqat na lishile na lecat plata,

ca cá'maq ỹo'ueetac na'maxare ishit ỹo'uet aca 'taxaqui;

₅Se ro'ueenataxanot nqohin ca nashi ca hualoxonaq,

ca' 'chiñi ma'le da lelaataxanaxac queda ỹa'maqachiguiñi.

₆'Neeto' 'ec 'ue ca 'ñitegue quiyim loqoisa'guit ca nashi,

chaqai 'neeto' 'iri'ñi ca loma' ca qom qaimaqachin;

₇paguec la'maxa quiyim qohinac caqami': Nochirishiguim quenajo,

quiyim qarenotaxanaxanec qami' quiyim loqoisa'guita caua nashil leta'al.

Cá'maq huañichirigui quenaua nqochichi'

₈mesqai chaqa'ma' do'ira'a ca nimiitaxanqa' quena nasauaxaset,

ma' sqoue ca liỹa ỹoqa'a ca 'naac,

ma'le, ca' sqa 'yiiñi' ca 'ñiite'.

₉Taqaisa'guit nemaqaire'e' cá'maq 'ue ca pataqateguelec qami',

qam sqai choxochi' cá'maq ỹoqa'a se re'xogui qoỹoxotetañi;

₁₀ma' sqoue ca 'qaatapega qami', ca' rayilqochichi',

ca' qaica lata' da se no'uen na'qaataxaqui'.

₁₁'Oonoqui' ca ra'qaachiqui', qam 'maxaraic quiyim ỹaatqajam chaqaica qaỹouentaque,

'ec aca nadenqata manzana imaañi 'oro 'ue na no'ueetaxat plata.

₁₂'Ec aca nichicshaqate chaqai aca nqola chicqaugui ná'maq no'uen 'oro,

ná'maq paguec loyac napaxaguinataxanaxac quecá'maq ỹa'den icoñi'chiguit.

₁₃Cá'maq qamaxaraic na'qaataxanqajnec quecá'maq nelaatqo',

'ec ca lo'oomaxa aca loñi queca npa'iiñi na'xa'a,

ma' ỹadalaxat da na'ñaaqataxac cá'maq na'co'.

₁₄Naueguelec chaqai nonot, qam qaica ca ỹaxat,

'ec ca qom 'naac 'ue ca ỹaan, qam se ỹauanapega ipacqajñigui.

₁₅Da la'ñaxac neuel taauec nqai'en ca nonogoxonaxac;

naua ỹolaauete' na'qaatqa iuagaxatac ca neuel.

₁₆No'm huañiterelec ca rapic li'i, 'neeto' paguelec ca 'qui',

ma' no'm 'xoic ca 'qui', ca' sqoue resalli'.

₁₇No'm 'piichira'a ca nauochaxaua'e', qam 'neeto' sqai 'migui nqai'ñi',

'ase' no'm neuala'a qami', ca noquii'raxaua'.

₁₈¡'Ec pon, lecat, novic shitaxaraic,

cá'maq na'majan 'naac quiyim se no'uen ca 'ñiisari' queca nauochaxaua'e'!

₁₉'Ec qagaxaic ca liỹa richi'i'

loqo'm qui'ỹaxañita aca lasooxoi rovi'i',

'ec quiyim qaipi'ỹa'a ca se ỹaqamaq quiyim 'ue ca reuogoxo'e'.

₂₀Qaro'ueenaxanlec aca ne'taxanata 'ue ca leuogoxo,

'ec qaỹocorigui aca ne'neete queca lataxa lochiviaxaic,

loqo'm qanaqate' caua noho quiyim 'xoic ca no'oomaxa.

₂₁No'm qopat ca npa'guenaxaua'e', ca qui'ỹaxañi';

chaqai no'm ỹalauat laquip, ca ne'taxañi';

₂₂ca' queda, ca' ỹoqa'a nqai'ñi' na lashic quena layiloxo,

ca' ñi qara'gaxala' rishivichiñi' ma'le.

₂₃Quena nonot chicqa'gue da rapiguim chicqaugui na ỹaxat,

chaqai naua se no'viiñi na'qaatqa chicqochigui da se no'uen nashicyaxac.

₂₄Paguec la'maxa qoyintau'e na lahi ca 'imec lelaq,

qam mesqai quiyim qoyintaugui ca 'imec lodegaxat,

qam loquiaxai aca na'aalo'e'.

₂₅'Ec na 'oom huaxaỹaq queca qom ỹalauat laquip,

ca' chaqaida 'neeta da no'uen na'xaỹaxac qoỹoqo'tegue ca chicqa'gue.

₂₆'Ec ne'paxantashiguim na icolqata huaxaỹaq,

ca' chaqaida 'neeta cá'maq qom huagaxaraic i'loxol quiyim reloqota'guit ca hualoxonaq.

₂₇Se no'uen quiyim 'xoic ca qaỹa'ic quena rapic li'i,

qam chalego loyac quiyim qaimitaque ca leloxoỹaxac ná'maq 'xoic ca lqalaic.

₂₈'Xoic na lichic ca qom se ỹa'den nollaalta' queda no'ueenataxac,

'ec ca na'a' lodegaxat qaica ca lquepaqataxanaxat.