Proverbios 30

₁₅Na pit dos naua llaale,

qaica ca liỹa ỹa'deene', qaidaata da lashiilaxanaxague'.

'Vii naua tres chaqai ỹovite' cuatro

quiyim se ỹauanapega 'nerac: ¡Yi, nalootañi!:

₁₆ca napal lahi',

aca 'aalo se co'o,

na 'laua quiyim ỹouen ca huaxaỹaq,

chaqai ca norec ỹouen ca lasoc.

₁₇Cá'maq se nqo'ta ca leta'a quiyim ra'iito'ot

chaqai ca i'neetac aca late'e quiyim qo'xoỹom,

paguec la'maxa quiyim qaỹa'gue' naua nqote' queca ratecsan

chaqai qaỹa'ic queca o'ic.

₁₈'Vii naua tres chaqai ỹovite' cuatro

nauá'maq ỹo'ueete' da i'laxa chaqai quiyim se sa'deene':

₁₉ca llicyaxac ca o'ic quena piguim,

ca llicyaxac ca nanaic quena qa',

ca llicyaxac aca qom lahi' huaxaỹaqse cana huaaxai,

chaqai ca llicyaxac ca ỹale caca 'aalo.

₂₀Aca 'aalo nanatqa lo'o' 'neetasa':

que'e, ca' quiỹogui na lap,

ime, ca' 'teetegueñi 'naac: Qaica ca so'uet se ỹa'maxañi.

₂₁Tres lashiigo' na qom, chaqai ỹovi' cuatro,

quiyim se qanalo'guit chaqai i'loxol nqai'en cá'maq 'laua neetalec:

₂₂ca nelaatec ỹovirau'a quiyim nashi,

ca sqailligueme' nachinñi quiyim 'xoic ca loq,

₂₃aca 'aalo naqaicqate quiyim 'ue ca loua

chaqai aca nelaata quiyim pa'aalec ca loma' aca na'cooro.

₂₄'Vii naua cuatro iserolqai' quena 'laua

quiyim paguec la'deenaxanqa' queca 'deenaxanqachaqaiquipi:

₂₅na chinaq, chalego lecai alliripi qaica ca lquesaxanaxa,

qam ỹa'maxat na loq quiyi nosaxa;

₂₆ana nesoxona late'e mesqai 'xoic,

qam lauaquiaxaqui ana qa';

₂₇ana piñai qaica ca lashi,

qam lapo'ojta' quena' eec;

₂₈na lecolaxaraic ná'maq nalootagui ana poquena,

qam ỹovirau'a ca lauo' lodegaxat ca nashi.

₂₉'Vii naua tres 'ñaaxaqa, chaqai ỹovite' cuatro,

lo'yaxanec da louoxogue':

₃₀na sauaxaic leta'a ná'maq isecỹac paguec lichic,

qaica ca 'eetapeguem chaqai qaica ca no'cha'a;

₃₁ca huaqa'e nemaqajnaxai, ca quetaq loua'

chaqai ca nashi 'auetauec queca nalliripi.

₃₂No'm vi'saque ca chi remaqachiqui'

chaqai 'ue ca na'deenaxaqui' se ỹa'maxañi, nolli'ralta', ca 'deenataxañi'sac

₃₃quiyim no'm ni'ỹa'ichiriguilo caua lo'i', ca nenoxonec na ra'ñi'ijta',

no'm paguec lamaxachirigui na rimiqui', ca' toca'a ma'le,

chaqai no'm 'ooqochichi' ca liỹa, ca ỹovireto'o' ma' nco'ua'ire'e'.