Salmos 103

₁Semaqachin ma'le ñi qara'gaxala' qota'olec quedá'ogue da ñachaalataxac;

semaqachin ma'le quedá'ogue da shinta da co'teeta leenaxat.

₂Semaqachin ma'le ñi qara'gaxala' quedá'ogue da ñachaalataxac;

se scoua'ahi naua lqouagaxaco caỹim.

₃Chaqaiñi ñí'maq sqai caapeguem ná'ogue na se no'uen so'ueetetac,

ñí'maq ỹomaterec naua'que naua i'neete',

₄ñí'maq nca'laxatec da ñachaalataxac queda nelauaxa,

ñí'maq ỹomatalec aỹim da le'xorenataxanaxa chaqai yineequesenta,

₅ñí'maq ỹomataỹot ná'ogue ná'maq paguec na loyac

chaqai yadalaxateta 'ec nqai'en aỹim ca o'ic.

₆Ñi qara'gaxala' ỹaatqajam llic iuejlec

ná'maq hueetaugui da nqa'viic.

₇Ñi'maxare ỹachaxan na'le na nayiquipi chaqai na lo'ueenatqaipi

queso Moisés chaqai so llaalqaipi so Israel.

₈Ñi qara'gaxala' isoteta da lqouagaxa;

hualaxauaic chaqai imaañi ne'xorenataxanaxa.

₉Mesqai naua'que naua na'xata' nelaqatapegalo qomi',

chaqai mesqaida quiyim se neme quet ca lauel coqomi';

₁₀se ipacqajñigui cá'maq ỹaatqajam qanouaxanaxaset quet

quenaua qareualoxonqaishico chaqai naua qarasauaxasete';

₁₁chalego lecaic dá'maq le'xorenataxanaxa quená'maq imaqachin ñi'maxare,

da'maxare 'ec paguec lishicshi'megue quena piguim quena 'laua.

₁₂Ỹoỹoote'ogalo naua qarasauaxasete' coqomi',

'ec na' ỹoỹojchi da lqodoigue queda lauashiguim.

₁₃Ñi qara'gaxala' ineequesenta ná'maq imaqachin ñi'maxare,

'ec ca neta'a quiyim ineequesen ca llaalec;

₁₄ma' ñi'maxare ỹa'deenta cá'maq ỹachigoxotauguilo qomi' na' qaro'uet:

ñi'maxare ỹa'deenta quiyim sachigoxosqaugui na 'laua.

₁₅Da nachaalataxac na qom 'ec ana peue;

renohi 'ec aca peue quena no'ueenaxa:

₁₆ỹaatqajam sqaỹaloq ỹasoxot na nonot,

ca' qaica cá'maq qaỹa'den caca'maxare.

₁₇Qam da le'xorenataxanaxa ñi qara'gaxala' qaica ca lqodoc quená'maq imaqachin ñi'maxare;

qaica ca lqodoc dá'maq no'uen lo'ueenataxanaxac,

ỹovira'oga ná'maq co'uaataxanaxaic qomyipi,

₁₈quená'maq ỹomachichigui dá'maq na'maqataxac

chaqai se coua'ahi naua naqataxaco.

₁₉Ñi qara'gaxala' neeta'gue nqai'en da piguim ca nqa'xanqa' quiyim nashi,

ca' da lo'ueenataxanaxac ỹoiquentac ná'ogue nanchaqaina.

₂₀¡Maqachiñii ñi qara'gaxala', qamiri nelaatqaipi piguim laseripi!

Qamiri ma' 'viichii' nauá'maq qaramaxailgoto,

qamiri ma' na'maxachitañi quiyim na'xaỹaxañita.

₂₁¡Ỹaatqajam qaimaqachin ñi qara'gaxala' quená'ogue na nalliripi,

ná'maq mashic ro'ueenataxantacot chaqai mashic ỹo'ueetetac dá'maq ỹahotaque ñi'maxare!

₂₂¡Maqachiñii ñi qara'gaxala' ná'ogue ná'maq lo'ueenatec,

ná'ogue ná'maq hueeta'ñi ná'maq ỹoiquentac ñi'maxare!

¡Semaqachin ma'le ñi qara'gaxala' quedá'ogue da ñachaalataxac!