Dá'maq se neme le'xorenataxanaxa ñi qota'olec
1'Ỹaañiỹot da na'aachicyaxaguii ñi qara'gaxala' qota'olec,
ma' ñi'maxare huagaxaraic,
chaqai qaica lqodoc da le'xorenataxanaxa.
2Ñaqai qaỹa'xat quená'maq lca'laqatqaipi ñi qara'gaxala',
ná'maq nca'laxatec na'le queso npa'guenaxauaripi,
3ná'maq lapoonta' na'le quena liỹa na'aateripi,
ỹachigoxota'gue da rapiguim chaqai da 'guiñi,
da lqodoigue chaqai da lauashiguim.
4Ỹo'meetajlec na'le quena 'laua qaica qom 'xoic na lo'uaxanaxa,
se ỹanata ca nayic quiyim tau'a ca na'a' quiyim ỹahotaque na'ñi;
5'ue na lqopaaxa chaqai na laquip,
¡mashic sham nilliviñi!
6Qam na' neuocqotac, ca ỹaualqot ñi qara'gaxala',
ca ñi'maxare naqata'a queda leuogoxo.
7Ime, ca' ỹachaxañi'ñigui so no'uen nayic
taỹau'a yi na'a' ma' ỹahotaque quiyim na'ñi.
8'Ỹaañiỹot ca na'aachicyaxaguii ñi qara'gaxala' queda le'xorenataxanaxa,
¡quedá'maq lqouagaxa taalec nqai'en na qomyipi!
9Ma' ñi'maxare neme laquip nqai'en cá'maq 'xoic laquip,
chaqai ỹaanem quiyim 'xoic ca loq cá'maq qopaaxaic.
10Ỹaatqajam hueetaugui na napalaxa,
ncoñiiteguesec, ncoñireta'guit da nachicoxo,
11sauaxat se na'xaỹaxanalo naua lelaataxanaxaco ñi qara'gaxala',
ma' se icoñiguit dá'maq ỹahotaque ñi qota'olec paguec lishicshi'ma.
12Ca' ñi qota'olec ỹo'uet quiyim chalego lesallaxa na lo'ueenatec;
repoxolaxan, qam qaica ca ỹotauan.
13Qam queda leuogoxo, ca' ỹaualqot ñi qara'gaxala',
ca' ñi'maxare nca'laxatec queda leuogoxo;
14naqata'alo quiyi chalego napalaxa,
ca naqate' saua lequeete'.
15'Ỹaañiỹot da na'aachicyaxaguii ñi qara'gaxala' queda le'xorenataxanaxa,
¡quedá'maq lqouagaxa taalec nqai'en na qomyipi!
16¡Ñi'maxare lahiletajlec nqai'en naua lasomi' chicqaugui na lecat leenaxat bronce!
¡Ñi'maxare ỹaqaguitetajlec na nquepaqataxanaxat lecat leenaxat fierro!
17Ralolaxaiquipi chaqai neuocqotac
sauaxat na chi leualoxonqaishic chaqai na lasauaxaset,
18mashic tot ỹo'ueto na loq;
¡mashic sham ileu!
19Qam na' 'ue da leuogoxo, ca' ỹaualqot ñi qara'gaxala',
ca ñi'maxare nca'laxatec queda leuogoxo;
20nela' so la'qaatec, ca' ỹomatec;
¡ca' nca'laxatec queso nelauaxa!
21'Ỹaañiỹot da na'aachicyaxaguii ñi qara'gaxala' queda le'xorenataxanaxa,
¡quedá'maq lqouagaxa taalec nqai'en na qomyipi!
22Ca 'viichii aca rachitaxanataxanqachii 'ỹaañitacot da na'aachicyaxaguii,
chaqai 'xachitac netooñita'gue da lo'ueenataxanaxac.
23Ro'ueenataxan quiyim nemeenaxaiquipi caso huaaxai,
'vii naua llico ana lahi' huaxaỹaqse,
24ca na' ỹoviriñigui na lavinñi aso huaaxai,
ca iuanta da chalego loyac lo'ueenataxanaxac ñi qara'gaxala'.
25Na' retaqa ñi qara'gaxala', ca' nanac so nonot lodegaxat,
ca' 'ue na lo'paxa chalego lecaic.
26Ca' 'ec qanenaxashiguim,
ime, ca' lotqai 'ec ta'nquira quena lauajñi aso huaaxai;
¡ca' tot qaica ca ỹa'deene' paguec na lichic só'maq hueesaugui!
27Rapaqatajlec 'ec quiñiuguetaxaiquipi;
¡qaica ca 'negue da la'deenaxanaxa!
28Qam na' neuocqotac, ca ỹaualqot ñi qara'gaxala',
ca ñi'maxare naqata'a queso leuogoxo;
29ca' ñigui nqai'en quiyim nayaarichiguiñi so nonot lodegaxat,
ca' taañi na lo'paxa qaica.
30Ca na' iuana tot qaica ca lo'paxa, ca' netoon,
ca' ñi qota'olec ỹaueguereta quiyí'maq ỹahosaque ỹovijta'a.
31'Ỹaañiỹot da na'aachicyaxaguii ñi qara'gaxala' queda le'xorenataxanaxa,
¡quedá'maq lqouagaxa taalec nqai'en na qomyipi!
32¡Raualaxahiỹot ma' qamiá'ogue lapohita'ta'!
Maqachiñii queca lapoxoc na qo'xoiquipioqui'!
33Ana lachiugue chaqai na huaxaỹaq ne'paxantashiguim
ñi qara'gaxala' ñigui nqai'en 'laua qaica qom chaqai 'laua rashivijlec;
34chaqai na lo'yaxanec 'laua ñigui lalagaxalec nqai'en,
sauaxat da leualoxonqaishic ná'maq qomyipi neetalec;
35na 'laua qaica qom ñigui latogot nqai'en,
chaqai na 'laua rashivijlec ne'paxantashiguim na huaxaỹaq nqai'en;
36ca' chaqaiyi ỹanalec ná'maq 'xoic da lqopaaxa,
ca na'maxare chi ỹo'ueete' naua na'aate' leta'al.
37Danaxanlec na no'ueenaxa, ỹanñi ana 'uva,
ca 'xoic na naqat quena' lapoon na lanecsec.
38Ca ñi'maxare nqouaguegue, ca' nqo'neuec nqai'en so ni'ic,
chaqai se naqaguiñi, ta'ta'a quiyim nqo'neetauec nqai'en so laloipi.
39Chaqai no'm 'vii caua ileue', ca' naqaquiñi,
sauaxat na le'xorigue' quena le'nete'
chaqai quena nqui'ic,
40ca' ñi qota'olec se nqo'ta ná'maq ỹo'ueetac na ne'xoric,
ca ỹo'maqajnac queca llic quiyi 'laua qaica qom.
41Ñi'maxare naqata'a na 'xoraiquipi queda lachicoxo;
¡nqo'naxatec na llaalqaipi, 'ec nqai'en ana qagreta!
42Na' iuana dajo na qomyipi 'maxataxaraiquipi, ca' netoon,
chaqai na hualoxonyipi i'maqata, qaica ca ỹa'xat.
43Ca cá'maq 'ue ca naqajñi na'deenec,
ca se couaataque dajo sa'xatetac,
ca ỹa'den da le'xorenataxanaxa ñi qara'gaxala'.
