Chalego lecaic da lquesaxanaxa ñi qara'gaxala'
1'Ỹaañiỹot da na'aachicyaxaguii ñi qara'gaxala' qota'olec, ma' ñi'maxare huagaxaraic,
ma' sqaica lqodoc da le'xorenataxanaxa.
2Na llaalqaipi so Israel 'naiquet:
Da le'xorenataxanaxa ñi qara'gaxala' sqaica lqodoc.
3'Naiquet na netaxaỹaxanqajanqaipi quiñi qota'olec:
Da le'xorenataxanaxa ñi qara'gaxala' sqaica lqodoc.
4'Naiquet ná'maq imaqachin ñi qara'gaxala':
Da le'xorenataxanaxa ñi qara'gaxala' sqaica lqodoc.
5Na' yiuocqotac, ca' soỹaxanot ñi qara'gaxala';
ca ñi'maxare na'xaỹaxañiua', ca nañaañim da iuagaxa.
6Ñi qara'gaxala' iuora; ca qaica quet cá'maq yo'chiitaque.
¿Negue' quet ca 'ne'tegue aỹim ca qom?
7Ñi qara'gaxala' iuora; ñi'maxare yotauantac.
¡Ca' seuana ma'le quiyim loxonqaipi ná'maq noquiaatapiguiỹa'!
8Paguec la'maxa quiyim qaipi'ỹa'a ñi qara'gaxala'
quiyim qaipi'ỹa'a quet ca chaqai qom.
9Paguec la'maxa quiyim qaipi'ỹa'a ñi qara'gaxala'
quiyim qaipi'ỹa'a quet na nashillipi.
10Ná'ogue na ỹoreta'oguit qomyipi yahiquinchiguiñi,
qam sahote'e da leenaxat ñi qara'gaxala', ca' ỹoxonqaipi.
11Ỹaatqajam yaqallichinchiguiñi, qaica ca ỹiguec nqai'en,
qam sahote'e da leenaxat ñi qara'gaxala', ca' ỹoxonqaipi.
12Nqueuorigui aỹim 'ec na lauoic,
qam 'ec na norec quena' ỹovirougui na leesat, chita'gue, ca' no'miñi;
¡qam sahote'e da leenaxat ñi qara'gaxala', ca' ỹoxonqaipi!
13Ỹaatqajam netenegue aỹim yamaxañi, ma' ỹahotaque seuañi,
qam novi' ñi qara'gaxala', ca' yotauan.
14Ỹim so'uen ñi qara'gaxala', ma' ñi'maxare ỹo'uet da iquesaxanaxa.
¡Chaqai chaqaiñi ñí'maq ica'laxaqui!
15Quena la'a' na qamaxaraic qomyipi
'ue na naỹaac qaro'ueenaxantalec da nauegaxanaxac, qohinac:
¡Da lquesaxanaxa ñi qara'gaxala' ỹovirelec quiyim rauegaxan!
16¡Da lquesaxanaxa ñi qara'gaxala' chalego lecaic!
¡Da lquesaxanaxa ñi qara'gaxala' ỹovira'a quiyim rauegaxan!
17¡Se yileu, ta'ta'a quiyim yca'leuec,
qaiyi sa'xat dá'maq lo'ueenataxanaxac ñi qara'gaxala'!
18Ñi qara'gaxala' chalego lquesaxanaxa da louaxanaxanaxac caỹim,
qam sqai ỹaxanegue aỹim quiyim yileu.
19¡Huachiguilo naua lasomi' ana no'ueenaxanaxaqui,
ma' sahotaque senoxono, ca' saanot da ña'aachic ñi qara'gaxala'!
20Chaqaina najo nasom ñi qara'gaxala',
ca' chaqaina taatougui ma'le ca qom qamaxaraic.
21Ỹa'gaxala', saanot qami' da ña'aachic, ma' saachichiguito' aỹim,
chaqai ma' qami' ná'maq qami' ica'laxaqui.
22Só'maq qa' lañijnec na 'imec lo'ollipi,
ca' chaqaiso só'maq 'auaxaic qailliguiñi caso lasogue so 'imec.
23Dajo ỹo'uet ñi qara'gaxala',
ca' qomi' chalego da qare'laxa.
24Chaqaina najo na'xa'a ná'maq quiyim 'ue ca ỹo'uet ñi qara'gaxala':
ca' nagui, ca ¡ñitoonqatac chaqai qara'maqachiguiñi!
25Qouaquiroxoric, qami' qara'gaxala', ¡qarca'laxachirec!
Qouaquiroxoric, qami' qara'gaxala', ¡'viichi' quiyim qaicanqaida queda qoyicyaxac!
26¡Qaimaqachin cá'maq qom naquetaugui da leenaxat ñi qara'gaxala'!
Semaqachinaxe' qamiri quena no'ueenaxanaxaqui quiñi qara'gaxala'.
27Ñi qara'gaxala', ñi'maxare qota'olec, ¡ñí'maq coỹaretalgoto qomi'!
Taañi nqai'ñii ca nemaqachic,
'xachii ana qo'paq lasote,
viraxachiỹau'alo naua 'ec lasote ada ncopatoxonaxalate.
28Saanot qami' da ña'aachic chaqai semaqachin da recaiqui',
ma' qami' ná'maq qami' qota'olec caỹim.
29'Ỹaañiỹot ca na'aachiguii ñi qara'gaxala', ma' ñi'maxare huagaxaraic
ma' da le'xorenataxanaxa sqaica ca lqodoc.
