Salmos 126

₁Na' qaropilaxata ñi qara'gaxala' qota'olec na qara'a' Sión,

ca shinqatapega 'eco' chi se'guemachaqatac.

₂Ca' ỹaatqajam 'xoic na qaraỹalliguiric

chaqai quenaua qodaapi' ca so'ueenaxanqatac;

ca na'le, ca' na ỹoqa'a qomyipi 'naac:

¡Ñi la'gaxala' chalego lecaic dá'maq ỹo'uet quena Israel llaalqaipi!

₃Ajá'a, ñi qara'gaxala' ỹaatqajam chalego lecaic da ỹo'uet coqomi',

ca' 'ue da qanetoonaxac.

₄¡Qami' qara'gaxala', qaropilaxachi' queca qara'a',

'ec na ỹaxat quena' ỹadalaxat na 'laua qaica qom!

₅Ná'maq noỹentalec da lanaxanaxac quena' danaxan,

qam ỹaualqatari' queda netoonaxac quena' naqat ca la ca lanecsec.

₆Ca 'eno'm noỹenta'pegue' quiyim nallacsenta aso lloxoqui lahi' ana lanecsec ala,

qam chalego da netoonaxac ma' rapil,

lo'qoota'a qa'aalto'ot ana nanaqata quena trigo.