Ná'ogue imaqachin ñi qara'gaxala'
1¡Qaimaqachin ñi qara'gaxala' qota'olec!
¡Qaimaqachin ñi qara'gaxala' queda piguim!
¡Qaimaqachin ñi qara'gaxala' queda pa'aashiguim!
2¡Maqachiñii qamiri, qamiá'ogue nelaatqaipi piguim laseripi!
¡Maqachiñii qamiri, nalliripi queda piguim!
3¡Maqachiñii qamiri, ra'aasa chaqai shiraigo!
¡Maqachiñii qamiri, vigaxarai nete'ese!
4¡Maqachiñi' qami', qoỹoqoshi'megue piguim,
chaqai qami' huaxaỹaq pa'a'isashiguim quena piguim!
5Maqachiñii da leenaxat ñi qara'gaxala',
ma' ñi'maxare chilnataxan, ca ná'ogue nanchaqaina 'ue;
6ñi'maxare ỹo'viijñi ná'ogue, qaica lqodoc nqai'en,
chaqai ỹa'ue da lelaataxanaxac, ca' qaica ca napacalec.
7¡Maqachiñii ñi qara'gaxala' quena 'laua,
na isecỹac lodegaxat huaxaỹaqsec chaqai ana huaaxai qoỹoqochi'ñigui!
8¡Na nqai'legaxa chaqai ana qalachi, loñi nacañi chaqai na neue'!
¡Na nonot quesaxanaxaic ná'maq ipacqajanchigui da nelaataxac!
9¡Na qoỹoqoshi'megue qa' chaqai naua quemaralgoto!
¡Ná'ogue ana qo'paq cedroipi chaqai ana qo'paq na'ic ana la!
10¡Na iseripi neloipi chaqai na neuequipi!
¡Na ỹoipi chaqai na nqai'iquipi!
11¡Na nashillipi quena 'laua chaqai quena ỹoreta'oguit qomyipi!
¡Ná'ogue na na'gaxalateripi chaqai na relaataxanac quena 'laua!
12¡Na ỹalliripi chaqai na 'aallipi, ne'naqaipi chaqai na qo'xoiquipi!
13¡Ná'ogue imaqachin da leenaxat ñi qara'gaxala',
ma' qaidaata da leenaxat ỹapacauec lecaic!
¡Chaqai da nemaqajnataxanaxa napacalec na 'laua chaqai na piguim!
14¡Ñi'maxare ỹaanem da lquesaxanaxa na lalamaxareteripi qomyipi!
¡'Ue da lemaqajnataxanaxa ná'ogue na qamaxaraiquipi
quená'maq llaalqaipi so Israel, lalamaxareteripi sqoỹoqaque!
¡Qaimaqachin ñi qara'gaxala' qota'olec!
