Quena' ỹaatqajam qaipi'ỹa'a ñi qara'gaxala'
1Ỹa'gaxala', se'guenot qami' quiyim 'ootaxañirelec aỹim.
¡Totaxan vite ca ỹayiloxo!
¡Yca'laxachirec, ma' 'maxaraic ca ro'ueenataxanaxaqui'!
2Qouaquiric na'xaỹaxañiriua';
ca ¡chaqa'ma' yca'laxachirec!
¡'Ñiisari' ca i'guenaxaqui qa',
'ñiisari' ca i'guenaxaqui chaqai ica'laxaqui!
3¡Ma' mashic 'ñiisari' ca qa' chaqai ca 'imec i'guenaxaqui!
¡Yashaxañisac chaqai quepaqataxañiseguelec aỹim; 'viichi' ca lichoxoric da qadeenaxachi'!
4¡Yaqachi' cañi noqoina qaỹa'maxatetañi ñanoxonaxaqui,
qam qami' ná'maq quepaqataxañiseguelec aỹim!
5Sañiguilo naua napoquenalli' da ñachaalataxac;
¡coñira'ñigui aỹim, qami' ỹa'gaxala', qami' qota'olec queda lliqueta!
6Ỹaatqajam se yqo'ta ná'maq nqouagaxaintacot na nqolaquipi qaica ca 'negue.
Ma' ỹim selliito'ot da ñaquitaxac ñi qara'gaxala'.
7Da re'xorenataxanaxa'e' ỹo'uet da ñitoonaxac chaqai da ỹa'maxa.
Qami' huañichirigui da ỹachicoxo,
chaqai 'yiiñite' naua ñi'guenaxaco.
8Se yayaañichiguit ca ñpa'guenaxaua;
¡yachaalataxañiriñi quiyí'maq hua'ñi qaica ca youetaque!
9Qami' ỹa'gaxala', qouaquiric,
ma' ỹim seuetaugui na lichic.
Nolaviñi naua ñqote' queda nqui'ic,
na ỹoshicmaxa chaqai ỹimá'ogue.
10¡Da nqui'ic chaqai naua ñoỹenaxaco
imero nqai'ne' naua niñaxari da ñachaalataxac!
Tot qaica ca ỹa'ñaxac quena ỹachicoxo;
¡na ỹoshicmaxa qaica ca la'ñaxac!
11Chaqaỹim le'nec na ñpa'guenaxauaripi,
ỹaatqajam 'xoic da le'naxanaxac na ỹa'aayaxauaripi,
ỹaatqajam 'ue da laqaigaxa ná'maq iuañiua'.
¡'Eetapiguit quena' iuañi'chiguit aỹim quena nayic!
12Ỹaatqajam qaicoua'tem aỹim,
mashic 'ec shi'gue yileu.
'Ec ỹim aca nehoma ropoqogui.
13Sa'xaỹa na qomyipi nemootetecta':
Ná'ogue hueetaugui da nqolonaxa.
'Xoic, qam 'oonoqui' da la'deenataxanaxac quiyim na'xalentapigui aỹim;
¡na'xalentapigui aỹim quiyim ỹahotaque yalauat!
14Qam ỹim spe'eetapega qami' ỹa'gaxala',
ma' ỹim shinac: ¡Qami' qota'olec caỹim!
15Qami' lo'qo'isañi da ñachaalataxac;
¡'ootaxañirelec aỹim quena ñpa'guenaxauaripi, ma' na'maxare yocantac!
16Ñaqai 'ajñi' da le'xoric najo relaachiqui',
ca yca'laxachirec queda re'xorenataxanaxa'e'.
17Yaualqatacot qami' ỹa'gaxala';
¡se pataxañi nqai'ñi' aỹim da nayiloxo!
¡Da nayiloxo pataxañi nqai'ñi' na hualoxonyipi;
ỹaatqajam ỹovira'ña nqai'ñi' ca hua'ñi na leuaxaiquipi!
18I'maxañi nqai'ñi' na 'maatqaiquipi
ná'maq re'naxantac quenaua la'qaatqa chaqai naqaica'guit,
ca' ỹo'ooqochit ca qom no'uen ca la'deenataxanaxac.
19¡Chalego lecaic da rqouagaxa'e' quená'maq imaqachin qami'!
'Maxachisac da'maxare, 'ec nqai'ñi' ca nouenec 'xoic loyac,
chaqai iuanchigui nqai'ñi' na qomyipi,
ma' huagaxachirec quená'maq pi'ỹa'a qami'.
20'Ootaxañiseguelec quiyim loqoisa'a,
no'ueenaxachisac quena na'deenaxac se no'uen na qomyipi,
quepaqataxañiseguelec na'maxare queda loquiiaxa na npa'guenaxauaripi.
21Ỹaatqajam qaimaqachin ñi qara'gaxala', ma' queda le'xorenataxanaxa,
ca chalego lecaic da ỹo'uet caỹim
na' ỹaatqajam yiuocqotac.
22Na' tot qaica ca ỹa'maqa', ca' shintapega
quiyim shi'gue yo'yirauec;
qam na' sashiila'e' quiyim yotauañi',
ca' 'qa'ita ca ỹaualaxac.
23Ca' chaqaida 'neeta ñi qara'gaxala' quená'maq imaqachin ñi'maxare.
Ñi qara'gaxala' netela'a ná'maq huelec ñi'maxare,
qam ná'maq nemaqajnaxairipi
nqo'naxatetauec da nouaxanaxaset.
24Ca ỹaatqajam 'taxachiñi quiyim
'ue nqai 'negue nqai'ñii añi re'taxanatahi
ná'ogue ná'maq pi'ỹa'a ñi qara'gaxala'.
