Salmos 36

₁Na se no'uen ỹilentac na hualoxonaq

dá'maq se re'xogui hueetagui añi le'taxanata.

Ca'maxare sqai hueetapigui lauel

quiyim qano'cha'a ñi qota'olec.

₂'Neetapega quiyim ỹaatqajam qaimaqachin,

se ỹa'den quiyim qanaqaiquetapega ná'maq ỹo'ueetetac se no'uen.

₃Se ỹa'machiñi naua la'qaatqa chaqai 'maatqaic,

na'laxatañi da la'maqataxanaxac, ca ỹo'uet na se no'uen.

₄Quena' nenantañi queca lomala' ỹa'deentaque quiyim ỹo'uet ca se no'uen;

ỹaatqajam lo'qoochiguiñi da se no'uen ñicyaxac,

ca se ỹa'maxaren ỹaxanñi da leualoxonqaishic.

₅Qam da re'xorenataxanaxa'e', qami' qara'gaxala', ỹovirashiguim queda piguim;

chaqai naua ra'qaataxahi' quiyim ipaquichiguilo ỹaatqajam ỹovirero'ot na piguim icolaq.

₆Naua ra'qaataxahi' ipaquichiguilo 'ec ana quemaralec qa' ladocai;

chaqai naua relaataxanaxagohi' 'nejme' aca huaaxai late'ogue' chaqai qoỹoqochi'ñigui.

Qami' qara'gaxala', richillira'a na qomyipi chaqai na iseripi.

₇¡Chalego loyac da re'xorenataxanaxa'e', qami' qota'olec!

¡I'guenoto naua rauachi' na qomyipi, ma' huotaque quiyim 'ootaxañirelec!

₈Chaqai ỹaatqajam ná'ogue ỹa'maqachiguiñi ma' 'xoic na na'ic queca ra'aachi';

chaqai ne'teetapigui na le'ec aso no'uen lachiugue,

₉ma' chaqaiqami' chicqotacot da nca'laxa,

chaqai queda rauaqe',

ca' seuanaxa quiyim richiichiguiñi.

₁₀Se neme 'ỹaañisapeguec da re'xorenataxanaxa'e' chaqai da no'uen ro'ueenataxanaxaqui'

quená'maq ỹa'den qami'

ná'maq qomyipi 'deenataxanaxaiquipi.

₁₁Sqai 'xañitegue quiyim co'ueetapigui aỹim na nemaqajnaxairipi

chaqai quiyim nochigoxoshiguim aỹim na hualoxonyipi.

₁₂¡Huañiỹa quena' huaañi na hualoxonyipi,

ca' tot ishit quiyim ne'laxashiguim!