Salmos 73

₁¡Chalego leuagaxaric ñi qota'olec quena llaalqaipi so Israel,

quená'maq co'teeta añi le'taxanata!

₂Saqa'leca cocho'qui', ca' seuañi,

ỹame'quet sesaulli.

₃Ma' 'ue da ipa'guenaxanaxa quiyim noquiiquetashiguim

na nemaqajnaxairipi chaqai na hualoxonyipi.

₄Na'maxare se iten ca lelauaxa,

ma' na'maxare ỹaatqajam ỹa'maqachiguiñi;

₅se ỹovira'a da nouaxanaxaset na qomyipi,

chaqai sqaica ca lachitachic sqai 'nejem na liỹaripi.

₆Vichiguiño' da nemaqajnaxac nqolaantañi,

chaqai 'ec looỹac ỹantañi da nco'uaxac;

₇mashic nenoterec naua nqote' cana lo'ỹo,

chaqai chalego la'aaqa' naua la'deenataxanaxaco.

₈Re'naxantac chaqai nemaqajan chaqai se npocoq,

quiyim ra'xalenataxan quiyim ỹo'uet ca se no'uen, reloquiaxanataxan.

₉Ỹadentalec na piguim quenaua la'qaatqa

chaqai quena' retaqa querelec naua la'qaatqa na 'laua.

₁₀Vichiguiño' na qomyipi imaqachin

chaqai qaica cá'maq iuana se ỹa'maxañi quena'maxare.

₁₁Ca' renataxan: ¿Ñi qota'olec ỹa'deeno' dajo ma'le?

¿Ỹa'deeno' dajo ma'le ñí'maq chalego lishicshi'ma?

₁₂¡Ñaqai 'ajñii na hualoxonyipi!

'Maaxaic, qam nqo'neetashiguim da lesallaxa.

₁₃¡Ỹaatqajam qaica quet cá'maq 'neeta quet quiyim co'teeta añi i'taxanata,

chaqai sco'taxate' naua iqai'laqate' quena se no'uen!

₁₄Ma' ỹaatqajam saqa' ime qayotocqotac,

chaqai qaỹouaxantailec quenaua'que naua nete'etari.

₁₅Quetqai ca ỹa'deenataxanaxac 'nejem ca la'deenataxanaxac na'maxare,

ca shi'gue quet 'ue ca shine'tegue na qachaalaxai'ipi.

₁₆Ca' chalego da shinta quiyim sahotaque sa'den dajo,

qam chalego da lqalaic caỹim.

₁₇Qam na' saugui ñi lauo' ñi qota'olec,

ca' qaigueme sa'den yí'maq taata'a na'maxare:

₁₈ma' hueeta'ñi nqai'ñi' yí'maq ỹaatqajam resaulli,

chaqai maqaisa'nquira.

₁₉¡Ca' sqaỹaloq nimiguiñi!

¡Da nqolonaxa nimiguiñi nqai'en na'maxare!

₂₀Ma' ne'laxachirishiguim, qami' qara'gaxala',

'ec ca qom quena' nelouec, ca' ne'laxashiguim,

ca' se rqo'chita dá'maq 'neetari'.

₂₁Ỹaatqajam chalego da nqui'ic caỹim,

chaqai iỹala añi i'taxanata,

₂₂ma' ỹim qaica ca sa'den;

¡shintari' ca isecỹac seloqoto'ot qami'!

₂₃Qam qaiyiita se neme sento'ot qami'.

Coñisa'guit aỹim queda ỹoic,

₂₄yashaxañi'sac quenaua raqataxagohi',

qam ma' ime, ca' coñichiguit aỹim, ca' vite ca imaqachic.

₂₅¿Negue' queto'ca spe'eetapega queda piguim? ¡Qaqamite'!

Ca quiyim sento'ot qami', ca' qaica ca liỹa yqo'ta quena 'laua.

₂₆Dá'ogue da shinta imeuo,

qam ñi qota'olec ñí'maq ỹalamaxaret sqaica lqodoc,

ma' chaqaiñi ñí'maq nolliitañi añi i'taxanata.

₂₇Ca ná'maq noỹootec caqami', ca' ileu ma'le;

na'laañi nqai'ñi' ná'maq se ỹaqamaq quiyim quelec qami'.

₂₈Qam ỹim ñqo'neu'a ma'le ñi qota'olec,

ma' caỹim da'maxare paguec la'maxa.

Qami' ỹa'gaxala' qota'olec, quepaqataxañiseguelec aỹim,

ca' ỹim sa'xat ná'ogue ná'maq ro'ueenachiqui'.