Da qouagaxainaxac qarashiilaxantaque quiyim qanca'laxatec na qomyipi
1Qami' qota'olec,
¿Chi'neco' ma' ỹaatqajam quira'ahi qomi'?
¿Chi'neco' ma' 'ue da roquiiaxa'e'
cana qagretaipi qui'ỹaxañisac?
2Ñaqai o'lliinchira'a na ralamaxarichi'ipi,
ná'maq rca'acshiqui' na' ñaqai 'avichiguiñi,
ná'maq nca'laxachirec na'le ma' vi'saque ralamaxarichi' qauochi';
chaqai o'lliinchira'a añí'maq quemaralec qa' ladocai Sión, ñí'maq ñi'sa'ñi.
3Ñaqai naqui', ca 'ajñi' na nopoxoiqatec sqaica lqodoc;
¡nopoxoỹaxajñi na pa'guenaxauaripi yá'ogue yi 'imec qouagaxainaxaqui!
4Ca' na npa'guenaxaua'e'ipi ro'ueenaxantalec quiyim nopoxoỹaxajñi yi ra'aachi';
¡ca illa'anyi na letanec quiyim pa'aalec yi'maxare,
5pa'xanashiguim quiñi lasom ñigo!
Na'maxare 'ec na qo'paq lo'ollipi
hueetañigui na lavinñi ca 'oochi lodegaxat,
6ỹahote'e ana qai'pe chaqai na notogoxosoxonaxat
na' qanopoxoỹaxajñi na no'ueetaxat qo'paq.
7Ime, ca' qaicopata'a yi romachi';
ime, ca' ¡i'naari' yi ra'aachi',
ca' ỹamaxañi!
8Ỹahotaque nopoxoỹaxajñi qomá'ogue;
¡qaicopata'alo naua na'aate' quena 'laua,
quenauá'maq qalapooqote' quena' ñqouagaxainqot qami'!
9Ca' tot seuanaxa na nqalanec qaremaqateteripi;
chaqai qaica ca taqairougui quena qom,
chaqai vire'ta se sa'deenaq chi' laquio' ime dajo.
10Qami' qota'olec,
¿chi' laquio' ime quiyim qarishiuentac na qanpa'guenaxauaripi?
¿Chi' laquio' ỹaxanñi quiyim ỹa'xatetac na se no'uen caqami'?
11¿Chi'neco' ma' 'xochiriñi na rqai'laxachi' quesaxanaxaic?
¿Chi'negue ma' qa'aalliso'oto naua rqai'laqachichi'?
12Shi'gue quesom qami' ỹashi.
Qami' qota'olec ỹaatqajam 'xoic na qadoxonqui' na'le quena 'laua:
13qami' shicchigui nqai'ñi' aso huaaxai queda rquesaxanaxa'e',
poxoỹaxachirigui na lqahic so isecỹac lodegaxat huaxaỹaqsec,
14tepaxachiriguilo naua lqahigo' so isecỹac lodegaxat, leenaxat Leviatán,
ca 'ỹaañirec quiyim qaỹa'ic quena iseripi neuec.
15Ca' qami' 'viichi' ana huaxaỹaq lahi' chaqai ana lachiuguellipi,
chaqai 'im nqai'ñi' na lachiuguellipi se ỹauanapega 'im.
16Qatooỹaqui' yi na'xa'a chaqai yi pe;
qami' 'viichi' na'le ñi shiraigo chaqai añi ra'aasa;
17qami' retañi' na'le naua lqodoco na 'laua;
qami' 'viichi' na'le yi nosaxa chaqai yi no'oomaxa.
18No'viñisa'gue, qami' ỹa'gaxala', quiyim so npa'guenaxaua'e' noquiaatapega qami',
chaqai na qomyipi se ra'deenataxan se no'uen na ỹa'xat caqami'.
19¡Totaxan coua'ira'e qomi'!
Qaica ca qarishaaque 'ec qomi' ca cocon;
¡sqai 'ỹaañichiguita qomi' na iseripi!
20¡Ñaqai o'lliinchira'a da qana'deenaxac,
ma' mashic tot na'maxajta' na qom quenaua'que naua lahil na 'laua!
21Mesqai 'xañitegue quiyim nemanachit nqohin ná'maq mashic qaico'uelec;
¡'viichi' quiyim imaqachin qami' ca 'xoraic chaqai ca sqaicanqaiyi!
22¡Ne'laxachirishiguim, qami' qota'olec!
¡'Ootaxañirelec dá'maq chi no'ueenataxaqui'!
¡No'viñitegue quiyim na hualoxonyipi noquia'isapegaxaua'!
23'Neeto' coua'ire'e da laualaxac na npa'guenaxaua'e'ipi
ma' noquiiquetashiguim na laualaxaquipi ná'maq sqai huelec qami'.
