Qami' ỹa'gaxala', ¿chi'neco' ma' sqai coñichiguit aỹim?
1Qami' ỹa'gaxala' qota'olec chaqai ica'laxaqui,
quiyi na'xa'a chaqai yi pe sashiila'isac quiyim yotauañi',
2¡coñichiguit da ñqouagaxainaxac,
chaqai na'xaỹaxañita da ỹoỹaxanaxac.
3Chalego lecaic dá'maq se no'uen taalec aỹim,
ca mashic sham yileu;
4ca ¡mashic 'ec shi'gue qayalecqajnougui na leuaxaiquipi,
ma' mashic tot qaica ca iquesaxanaxa!
5Ỹim qayalataugui na leuaxaiquipi;
shintam ca ileuaugui ca lauataq
chaqai shi'gue qaishinñi;
shintam ná'maq tot qaiquepaqataxanlec,
chaqai ná'maq mashic coua'ire'e qami'.
6Yinaqairi'ñigui aca paguec qoỹoqochi'ñigui tema,
quecá'maq paguec lapalqa' chaqai qoỹoqochi'ñigui.
7Ca' ỹaatqajam machirailec da ronogoxonaxaqui',
ca' ¡ỹaatqajam iyinñi nqai'ñi' aỹim quena lo'paxa!
8'Viichi' quiyim na ñauochaxauaripi yalat;
'viichi' quiyim qanaqaica'guit aỹim quenaua'maxare.
¡Shintari' ca ncoñiiteguesec quiyim se qohitauec!
9Ca' paguec da ñoỹenaxac, ca' vire'ta sham se ñiuanñi.
¡Naua'que naua na'xata' yaualqatacot qami' ỹa'gaxala',
saansashi'ma qami' naua iqai'laqate'!
10¿Peeta'a shichi'o' chaxañitem ca se qaiuanapega na leuaxaiquipi?
¿Peeta'a ishito' na leuaxaiquipi ỹaanot qami' ca na'aachic?
11¿Peeta'a qaỹa'xato' ma'le da ra'qaachiqui' lliqueta chaqai da re'xorenataxanaxa'e'
cañi napal lahi' loqo'm queca ỹoiquentac da nelauaxa?
12Queda la'al da nelauaxa yí'maq hua'ñi quiyim ná'ogue qaicoua'e,
¿peeta'a 'uo' ma'le ca ỹa'deena'a dá'maq 'viichi' quiyim ỹa'maqachiguiñi chaqai qaimaqachin?
13Qam ỹim yaualqatacot qami' ỹa'gaxala';
quiyi nete'eta, ca saanot qami' da ñqouagaxainaxac.
14¿Chi'negue ma' se rqo'chiriua', qami' ỹa'gaxala'?
¿Chi'negue ma' nañoxochirapeguem aỹim?
15Shi'gue na' ñaqai ỹim ne'necoqui'
ỹaatqajam 'xoic da i'xoric chaqai sham yileu;
qam ỹaatqajam ña'ñaxachiguit da lichic dá'maq chicqo'ot qami',
qam mashic tot yalo'guit nagui.
16Da lichic da ronogoxonaxaqui' mashic shi'gue quejlec aỹim,
ca' ỹim loxonec;
17ỹaatqajam ỹimá'ogue yapoxonaxanchiguiñi
'ec ca nedep.
18Ỹoochire'ogalo caua ñauochaxaua' chaqai caua ñauegaxaua',
ca' nagui qainaata na napalaxa huaqui'chiguit aỹim.
