Dá'maq 'neeta ñi qota'olec chaqai na qom
1Qami' qara'gaxala', chaqaqami' ná'maq qami' quepaqataxañiseguelgoto qomi'
quenaua'que naua ñaxari.
2Na' saqa'laca ana quemaralec qa' ladocai
chaqai saqa'leca na 'laua chaqai ná'ogue nanchaqaina,
shi'gue nallaaqo', chi ỹovireta'alo caua pa'aaterec na'xata',
qaqamite' qami' qota'olec.
3Chaqai 'viichi' quiyim ca qom pilougui na 'laua
quena' 'ñirac: Qomyipi, pilliugui na 'laua.
4Ca' llic quiyim caqami' caua mil ñaxari
'ec nqai'ñi' so scavit mashic ỹoxogue.
¡Ỹaatqajam 'ec nqai'ñi' ca 'oonoqui' pe!
5Ca viquete' na qomyipi sqai 'maxachira'gue;
ỹaatqajam 'ec nqai'ñi' ca chi ne'guemataxac;
6na'maxare 'neetari' aca peue quiyim ñaxat,
ca' renohi quiyi nete'eta,
qam quiyi lavit, ca' ỹaso, ca' ileu.
7Ca' llic quiyim da ronogoxonaxaqui' imero nqai'ne' qomi',
ca' ¡se sa'deenaq nqai'en ca shinqata!
8Naua qarasauaxasete' chaqai naua qareualoxonqaishico
naua'que 'ajñisa'pe.
9Ca' ỹaatqajam llic quiyim dá'ogue da qanachaalataxac
taỹa'a quiyim imeuo queda ronogoxonaxaqui';
naua qaniñaxari ime'ueque, 'ec ca 'oonoqui' qanauec nacat.
10Setenta ñaxari yí'maq laloqo' da qanachaalataxac;
ca ná'maq paguec quesaxanaxaic, ca ỹovite' yaua ochenta;
qam dá'maq maqajnaxac quiyim qaỹovireta'a ca nqo'xo,
ca chi ỹo'uet da neualaxavic chaqai da nedaxac.
¡Naua ñaxari chita'gue, ca ỹovirerec,
ca 'nejme' qomi', chita'gue, ca' qareme!
11¿Negue' ca ỹa'den da lquesaxanaxa da ronogoxonaxaqui'?
¿Negue' ca ỹa'den da lichic da qauelgaxanaxaqui'?
12Qarapaxaguiñitegue quiyim yitanaq se ladoc aca qarqauaxaqui,
qaiyi yi qara'deenataxanaxac 'ue na'deenec hueetagui.
13¡Qami' qara'gaxala', rapillitalo qomi'!
¿Chi' laquio', ca novichi'?
¡Ñaq rqouaquiteguelo qomi', qomi' relaataxahi'!
14No'xataxachiriguilo qomi' queca re'xorenataxanaxa'e' quiyi na'xa'a,
chaqai saỹaaquioqotac, so'ueenaxanqatalec dá'ogue da qanachaalataxac.
15Ladoc nqai'ñi' da qanachaalataxac,
ỹocane' nqai'ñi' saua ñaxari qare'xoyaxaqui'.
16¡'Viichi' coqomi' relaataxahi' chaqai quena qochaalqaipi,
qaiyi iuanchirigui da ro'ueenataxanaxaqui' chaqai da recaiqui'!
17Ca' da lqouagaxa ñi qara'gaxala' qota'olec
hueetalgoto qomi'.
¡Qami' qara'gaxala', 'taxachiriñi da qaro'ueenataxanaxac!
¡Ajá'a, paguec 'taxachiriñi da qaro'ueenataxanaxac!
