Salmos 96

₁'Viiñii ca dalaxaic no'ueenec ñi qara'gaxala';

ná'ogue na hueetalec na 'laua ro'ueenaxanlec ñi qara'gaxala';

₂'ueenaxañilec ñi qara'gaxala', maqajñii da leenaxat,

'xachitac naua'que naua na'xata' da lca'laqataxanaxa.

₃'Xachii da lquesaxanaxa chaqai da lemaqachic,

'xachim na ỹalliripi chaqai ná'ogue na qomyipi quena 'laua,

₄ma' ñi qara'gaxala' chalego lecaic,

ta'chiguit quiyim qaimaqachin:

¡paguec chaqaic quená'ogue na chi nqolaquipi nashiilqaipi!

₅Na nqolaquipi nashiilqaipi quena liỹa qomyipi qaica ca 'negue,

qam ñi qara'gaxala' lo'ueenatec na piguim.

₆¡'Ue da lauaq queda reloqota'gue!

¡'Ue da lquesaxanaxa chaqai da loyac yí'maq neeta'ñi quiñi no'ueenaxanaxaqui!

₇Qamiá'ogue ỹoreta'oguit qomyipi maqachiñii ñi qara'gaxala',

maqachiñii queda lquesaxanaxa chaqai da lauaq;

₈'ỹaañiỹot ñi qara'gaxala' cá'maq ta'chiguit ỹaatqajam nemaqajnataxanaxa,

noxoñiu'a yi nasoxoc yi la'a',

dohitaho aca rachitaxanataxanqachii,

₉nqouagaxaiñiỹot ñi qara'gaxala' quiyí'maq chalego loyac neeta'ñi.

¡Ná'ogue na ỹoreta'oguit qomyipi i'loxol quiyim ra'iito'ot ñi'maxare!

₁₀'Xachim ná'ogue na ỹoreta'oguit qomyipi quiyim ¡ñi qara'gaxala' chaqaiñi ñí'maq nashi!

Ñi'maxare ỹanñi na'le na 'laua, ca' qaica idaxan;

ñi'maxare reloqota'a, naloqojne'ejta' ná'ogue na qomyipi.

₁₁¡Netooñii qamiri piguim chaqai na 'laua!

¡Noxohi', qami' huaaxai chaqai ná'ogue ná'maq hueetañigui!

₁₂¡Netooñi', qami' no'ueenaxa chaqai ná'ogue ná'maq hueetalec!

¡Qami' 'oochi, raualaxaỹagui queda netoonaxaguii,

₁₃queda reloqota'gue ñí'maq naata qara'gaxala'!

¡Ajá'a, nanac ñi'maxare,

ca' ỹoiquentac na qomyipi quena 'laua ma'le,

ca' da lo'ueenataxanaxac ỹa'maqachiguiñi chaqai lliqueta!