Da lo'ueenec so 144 mil qomyipi
1Ca na' ime, ca' lotqai liỹa ñidaanashiguim, ca' seuane'ta so 'ec qagreta llaalec co'ueetalec aso qa' ladocai leenaxat Sión, lapoota'guita saua ciento cuarenta y cuatro mil qomyipi. Ca sá'ogue qoỹeretalec na latap da leenaxat so 'ec qagreta llaalec chaqai ñi qota'olec. 2Ca na' ime, ca 'ue ca sa'xaỹaque 'maqot na piguim. 'Ec na lelamaxa na 'xoic lachiuguellipi, chaqai qai'neeta 'ec na lelamaxa aso soxonaxa quena' nouaxanaxanñi; 'ec da lelamaxa aca 'xoic neviiguellipi qaiviiquetapigui. 3Ca' ro'ueenaxantac, ỹo'ueentac da dalaxaic no'ueenec reloqotau'a yi nqa'xanqa' ñi qota'a, chaqai saua cuatro ise' nca'leesauec, chaqai queso qo'xoiquipi. Qaica ca ishit ỹa'den so no'ueenec, qaisoota só'maq ciento cuarenta y cuatro mil só'maq ỹovirau'a da nca'laxa quena 'laua. 4Ca' so'maxare só'maq se iuanapega aca 'aalo, chaqai co'teeta. Chaqai so'maxare só'maq coỹaretegueñi so 'ec qagreta llaalec quecanchaqa taigue so'maxare. Qanca'laxatec, qaỹachigoxotaugui na qomyipi hueetalec ana 'laua, 'ec nqohin aca 'auaxai nachitaxanataxanqate quiyim qoỹaanot ñi qota'a chaqai so 'ec qagreta llaalec. 5Chaqai so'maxare se iuanapega quiyim ncona'uegue quet ca na'maachic. Ca so'maxare sqaca aca lete, reloqotau'a yi nqa'xanqa' ñi qota'a.
Da la'qaataxanaxague' saua tres nelaatqa piguim lase'
6Ime na'le, ca' seuane'ta so liỹa nelaatec piguim le'ec, ỹoota quena lavinñi na piguim, i'xateta da na'qaatec sqaica lqodoc chicqaugui da nca'laxa, ỹahotaque ỹa'xatem ná'maq hueetalec ana 'laua, ná'ogue ná'maq ỹoreta'oguit na la'qaatec qomyipi. 7Ca nelamaxaren quena' retaqa, 'naacsa':
—Ỹaatqajam 'ue nqai 'negue nqai'ñii ñi qota'a, 'ỹaañiỹot da remaqajnataxanaxahi, ma' mashic ỹovita yi laloqo' quiyim ñi'maxare imit na nasauaxaset. Maqachiñii ñí'maq lo'ueenatec na piguim chaqai na 'laua, ana huaaxai chaqai na ne'paxantashiguim na le'ec huaxaỹaq.
8Ca co'uaataxan so liỹa nelaatec, ca 'naac:
—Mashic huaañi noxona yi chalego lecaic na'a' leenaxat Babilonia, ma' quiñiuguet nqai'en ná'ogue na qomyipi, quiñiuguichigui da nedequenaxac.
9Ime, lotqai co'uaataxan so liỹa nelaatec piguim le'ec, nelamaxaren quena' retaqa, 'naac:
—No'm 'ue ca imaqachin so isecỹac lodegaxat chaqai so nadenqatec lqui'i, chaqai nañan quiyim qaỹa'ue ca netanec quena latap, loqo'm quena lqai'laxat loic, 10ca ca'maxare ni'chigui nqohin dá'maq chalego lecaic nouaxanaxac ma'le chicqo'ot ñi qota'a, dá'maq qaỹa'maxatetañi 'ec hueetagui añi 'taxaqui dá'ogue da lonogoxonaxac ñi qota'a. Ca' qaỹo'uet ma'le ca le'xoric, qaỹodoota'a ca norec chaqai ca quiquiaxaic ỹaviquetaugui, ỹa'ajantac nqohin na lelaatqaipi ñi qota'a chaqai so 'ec qagreta llaalec. 11Ca' da lichaaxa dá'maq nouaxanaxaset qaica lqodoc, nichiitashiguim naua'que naua na'xata' chaqai naua piri quená'maq imaqachintac so isecỹac chaqai so lqui'i nadenqatec, loqo'm quiyim icoñiguit netanaqsete queda leenaxat. 12Ca' vichiguiño' ỹouen quiyim 'ue ca leualaxavic ná'maq lalamaxareteripi ñi qota'a, chaqai na'xaỹaxana da laqataxaquipi, chaqai ỹaatqajam ỹaqamqata quiyim quelec so Jesús.
13Ca' 'ue so sa'xaỹaque na'qaatec 'maqot na piguim, ca 'naapiguiỹa':
—'Chiriñi dajo: “Ma' quenagui chicqochi'ñi quiyim chalego la'maxa quená'maq mashic ileu, queeta'ñi' quiyim huelec so qara'gaxala'.” Ajá'a, 'naac so Espíritu Santo, quiyim nco'mategue'sopa naua lo'ueenatqa, qam naua lo'ueenataxanaxaco se qaicoua'ahi.
Da naqataxanaxac hueetalec ana 'laua
14Ca na'le, ca lotqai ñamatashiguim, ca seuane'ta so naueguelec lalagaxaic. Ca' so naueguelec nqa'xantalec so 'ec ca ỹale llaalec ỹantañi aso nashi nado'o 'oro quena lqahic, chaqai lo'qoota'a so nichaqsoxonaxat ỹaatqajam ỹaxaraic. 15Ca' chicqotougui añi no'ueenaxanaxaqui so liỹa nelaatec piguim le'ec, ca ỹaualaxau'ga, netenegue da laualaxac, quesó'maq nqa'xantalec so naueguelec:
—'Ueenataxañita na richaqsoxonaxachi'. Ca naqachi' ana la' ma' mashic ỹovita yi laloqo' quiyim qanaqat ana la na nanecsec hueetalec na 'laua, ma' mashic ỹiita.
16Na'le, ca' só'maq nqa'xantalec so naueguelec quelec nqai'en na 'laua so lichaqsoxonaxat, ca' naqat na la na nanecsec quena 'laua.
17Ca na'le lotqai nenoxonec so liỹa nelaatec piguim le'ec chicqotougui ñi no'ueenaxanaxaqui queda piguim. So'maxare qai'neeta lo'qoota'a so lichaqsoxonaxat ỹaxaraic. 18Ca' nenoxonec so liỹa nelaatec piguim le'ec chicqojlec ada ncopatoxonaxalate, hueeto'ot quiyim ilarac so norec. Ca' netenegue da loỹaxanaxac na' roỹaxana só'maq lo'qoota'a so lichaqsoxonaxat, 'naacsa':
—'Ueenataxañita na richaqsoxonaxachi' ỹaxaraic, ca lapooñi' ana laxale ana 'uva mashic ỹiita hueetalec ana 'laua.
19Ca' so nelaatec piguim le'ec quelec nqai'en so lichaqsoxonaxat na 'laua, ca' naqat ana 'uva quena 'laua. Ca ỹocorougui ca lahi' lodegaxat, ca qanelam na li'i. Ca dá'maq leloxoỹaxac dajo quiyim naỹa'quena dá'maq chalego lecaic da louaxanaxanaxac ma'le ñi qota'a. 20Aso 'uva qanelam na li'i, qam pa'aatauec nqohin quiyi na'a' lodegaxat. Ca' quiñi lapoonaxaqui nenoxonec na neuo', ca na'maxare ỹoviro'oto naua la'gaqa na shipgaq. Ca' da lecaguiñi so leuoripi ỹovi' trescientos kilómetros.
