Saua 'taxaqui' hueesagui daua louaxanaxanaxaco ñi qota'a
1Ca' 'ue so na'qaatec ỹaatqajam lam, 'maxougui añi no'ueenaxanaxaqui queda piguim, 'neetapegalo saua siete nelaatqa piguim lase':
—Mohi, quii, co'taxachiguilo naua siete 'taxaquiripi, corilec na 'laua dá'maq chalego lecaic louaxanaxanaxac ñi qota'a.
2Ca só'maq 'auaxaic nelaatec, ca' co'taxachigui aso 'taxaqui, ỹocorelec na 'laua. Ca ná'ogue ná'maq qom quená'maq 'ue na letanec so isecỹac lodegaxat chaqai quiyim imaqachintac so nadenqatec lqui'i, ca' naashiguim ana chalego la'aaxa le'neete chaqai chalego lqui'ic.
3Ca' so co'uaataxanaxaic nelaatec piguim le'ec eec, co'taxachigui aso 'taxaqui, ỹocorelec ana huaaxai. Ca' na huaxaỹaq caso huaaxai 'ec na leuaxaic leuoripi. Ca ná'ogue ileu ná'maq nca'leetauec le'ec aso huaaxai.
4Ca' so liỹa nelaatec piguim le'ec co'taxachigui aso 'taxaqui, ỹocorelec na lachiuguellipi, chaqai na ne'paxantashiguim huaxaỹaq. Ca' ñigui leuoripi nqai'en. 5Na' ime, ca' sa'xaỹa só'maq nelaatec piguim le'ec ỹoiquenac na huaxaỹaq, 'naacsa':
—Ỹaatqajam ỹa'maqachiguiñi dá'maq 'neeta nqai'ñi' da nouaxanaxaset, qami' qara'gaxala', qami' qota'olec ỹaatqajam qami' co'teeta, ma' 'ue qami', chaqai chaqai'eno' quen 'ue qami'. 6Ma' saua'maxare ỹocoraqta'pe saua leuo' sauá'maq lapoosapegueu'a qami' chaqai ná'maq ỹa'xatetac da ra'qaachiqui'. Ca' nagui, ca ne'taxañirigui na neuoripi; ma' chaqaida dá'maq ta'chiguit quiyim qohine'tegue.
7Qai'neeta 'ue so sa'xaỹaque 'maqateguelec ada ncopatoxonaxalate, 'naac:
—Ajá'a, qami' ỹa'gaxala', qami' qota'olec qaica ca qalañirac, ỹaatqajam lliquete' chaqai ỹalamrete' naua leloxoỹaxaco da rouaxanaxanaxaqui'.
8Ca' so liỹa nelaatec piguim le'ec co'taxachigui aso 'taxaqui, ỹocorelec añi ra'aasa. Ca' añi ra'aasa qoỹaanem quiyim ỹavigaxat na qom quena lauaq. 9Ca' ná'ogue ỹaatqajam ỹaviqueta nqai'en. Qam se netacocha, chaqai se imaqachin ñi qota'a. Ta'ta'a quiyim 'ue na ỹa'xat se no'uen npa'guente'e' ñi'maxare, ñí'maq 'ue da lquesaxanaxa quiyim ilate' naua nqa'viico.
10Ca' so liỹa nelaatec piguim le'ec co'taxachigui aso 'taxaqui, ỹocorelec yi nqa'xanqa' quiyim nashi so isecỹac lodegaxat, ca ná'maq loiquenatec so'maxare hueetaugui na napalaxa. Ca' na qomyipi chi ỹa'que'ta na laqa' quena nqui'ic. 11Qam qaiyiita sqai ỹaxanñi dá'maq se no'uen ỹo'ueetetac. Ta'ta'a quiyim se no'uen na ỹa'xat npa'guente'e' ñi qota'a queda piguim, sauaxat ná'maq nqui'ic chaqai ana le'neete.
12Ca' so liỹa nelaatec piguim le'ec co'taxachigui aso lo'qoota'a 'taxaqui, ỹocorelec so huaxaỹaq caso lachiugue late'ogue' Eufrates. Ca' so huaxaỹaq caso lachiugue quiguiñi, ca rashivigui. Ca' ỹo'uet llicta so nashillipi chicqa'gue da lqodoigue.
13Ca na'le, ca seuane'ta quena lap so isecỹac 'ec naanoc, chaqai quena lap so isecỹac lodegaxat, chaqai quena lap só'maq 'neetapega letaxaỹaxanqajnec ñi qota'a chicqauguilo saua tres nase' lecmaxaqa 'nejme' ana piyiloxoloxo. 14Ca' sauajo sauá'maq lelaatqa so na'ỹaapec sauá'maq ỹo'ueetesac ná'maq chalego lecaic netanqaipi. Chaqai que', lapoondeta' ná'ogue na nashillipi quena 'laua, ỹa'maxatetañi queca chalego lecaic na'xa'a quiyim nalauate'e' ñí'maq qota'a sqaica lqalanec. 15“Ajñii, ỹim ñovi' ma' sqaica ca qaỹahotaque, shintari' ca cuataxai. Chalego loyac ma'le quecá'maq nelootauec chaqai cá'maq netela'alo caua loho, qaiyi mesqai neetauec, ma' no'me' na qomyipi iuana ma'le ná'ogue na loshicmaxa.” 16Ca lapoonta' ma'le na nashillipi saua tres nase' lecmaxaqa quiyi lapooqo', ca' quenaua hebreo la'qaatqa qohinac leenaxat Armagedón.
17Ca' eec só'maq pa'aatec quesaua siete nelaatqa piguim lase', ca ỹocorelec na nonot, ca quiñí'maq no'ueenaxanaxaqui queda piguim chicqotougui so ỹaatqajam lam na'qaatec, 'naacsa':
—Ca mashic ime.
18Ca na'le, ca 'ue so nqai'legaxaripi, nalataxa, chaqai soxonaxa, chaqai i'loxol na 'laua. Ca' so le'loxolaxa qaica nqai 'nejem da lquesaxanaxa, sqai 'nejem ná'ogue ná'maq le'loxolaxaripi na 'laua quecá'maq na' ñaqai chita'gue re'oq na qom quena 'laua. 19Só'maq chalego lecaic na'a' secta'chi, tres lahil nqohin. Chaqai ná'ogue na na'a' quena 'laua ná'ogue 'guiñi. Ca' ñi qota'a ỹo'leenta'a so chalego lecaic na'a' Babilonia quiyim 'ec ne'taxañigui ca nouaxanaxaset cá'maq nelata na'le ñi'maxare na' ro'o. 20Ná'ogue palac ana delec chaqai ana quemaralec ladocai qa'. 21Qai'neeta nac aso qalachi late'ogue', chicqo'ot na piguim, taalec na qom. Ỹovi' cuarenta kilos que'óna. Ca na qomyipi 'ue na ỹa'xat se no'uen quiñi qota'a quesojo nqa'viic caso qalachi, ma' mashic chalego lecaic dá'maq nouaxanaxaset.
