Aso lere chaqai so 'ec qagreta llaalec
1Ca na'le, ca seuane'ta quesó'maq nqa'xantañigui aso nashi nqa'xanaxaqui lo'qoota'a aso lere queda loic 'ec lepate nqohin da no'ueenataxac, qoỹeretalec na pa'aauo chaqai na pa'aauec, chaqai qaỹapootagui quesaua siete netanaxanqate qaỹa'gaxanaxansañi. 2Chaqai seuane'ta so nelaatec piguim le'ec ỹaatqajam quesaxanaxaic. Nelamaxaren, renataxantac, 'naacsa':
—¿Nega'ỹo' ca ishit quiyim ỹauachigui ada lere chaqai quiyim naqate' saua netanaxanqate?
3Qam vire'ta quena piguim chaqai quena 'laua chaqai quena pa'aañi quena 'laua ỹaatqajam qaica ca ishit ỹauachigui aso lere, vire'ta quiyim chi ỹa'ajan. 4Ca' ỹim ỹaatqajam 'xoic da ñoỹenaxac, ma' qaica quet cá'maq qaỹanata quiyim ishit ỹauachigui aso lere, vire'ta quiyim chi retaqalec, chaqai vire'ta quiyim chi ỹa'ajan aso'maxare. 5Ca na'le, ca' 'ue so 'óna queso qo'xoiquipi 'naapiguiỹa':
—Totaxan queeta da noỹenaxaqui', ma' ñí'maq qaỹamata'gue sauaxaic leta'a chicqaugui so llaalqaipi so Judá, chaqai qai'neeta chigoxougui na lauo' so nashi David, ñi'maxare rauegaxan. Ca' ishit ỹauachigui ada lere chaqai quiyim naqate' saua siete netanaxanqate qaỹa'gaxanaxansañi.
6Ca' quena lavinñi so nashi nqa'xanqa', hueetañiguilo saua cuatro ise' nca'leesauec chaqai quena lavinñi so qo'xoiquipi seuane'ta so 'ec qagreta llaalec. Nachaatetañi, qam re'qoota dá'maq 'neeto' na' qaỹalauat. Siete saua lasote, chaqai siete nqote'. Ca' saua siete nqote' chaqaisaua saua siete lo'ueenataxanaxaco se re'xoguilo ñi qota'a sauá'maq qanelarrelec ná'ogue na 'laua. 7Ca' sojo qagreta llaalec icona aso lere queda loic só'maq nqa'xantalec aso qa'xanaxaqui. 8Ca na' icona aso lere, ca' saua cuatro ise' nca'leesauec chaqai so veinticuatro qo'xoiquipi ỹa'chi'iñi naua le'cootal quiyi reloqota'ñi so qagreta llaalec. Ca' queso qo'xoiquipi nodaachiguiñi 'ue ana liviigue chaqai lo'qoota'a ana 'taxaqui 'oro, no'qaachigui quena nichiinaxanaxat. Ca' najo nichiinaxanaxat chaqaina ná'maq nqouagaxainaxac ná'maq lalamaxareteripi ñi qota'a. 9Ca qaỹo'ueentac dajo dalaxaic no'ueenec, 'neetasa':
Qami' 'iichichiguit quiyim coñita ana lere chaqai quiyim naqachi' naua qaỹa'gaxanaxansañi netanaqsete;
ma' qaỹalauat na'le aqami',
chaqai quesaua reuochi', ca' laseue' na' shiujnaxañitalo qomi', chigoxochiraugui ná'ogue na ỹoreta'oguit qomyipi ỹoreta'oguit na la'qaatec,
qaiyi lalamaxareteripi ñi qota'a.
10Ca 'viichi' quiyim qomi' nashil chaqai quiyim qomi' letaxaỹaxanqajanqa na qomyipi quiyim so'ueenataxanqot ñi qota'olec.
Chaqai quiyim qareloxoiqatecsec ná'ogue na hueetalec na 'laua.
11Ca na' ime, ca' ñamatashiguim, ca sa'xaỹaque na ỹaatqajam 'xoic lavillaxac na nelaatqaipi piguim laseripi nachaatetaho naqallichinchiguiñi aso nashi nqa'xanaxaqui chaqai quesaua ise' nca'leesauec chaqai queso qo'xoiquipi. Qam ỹaatqajam qaica ishit naloqochin só'maq piguim laseripi. 12Qam ỹaatqajam nelamaxaren quena' retaqa, 'naacsa':
Ñí'maq qagreta llaalec qaỹalauat na'le
ta'chiguit quiyim icoñiguit da nquesaxanaxa chaqai da nesallaxa,
da na'deenaxanaxa chaqai da la'ñaxac,
da necaic, da nauaq, chaqai quiyim qaimaqachintac.
13Chaqai qai'neeta sa'xaỹa ná'ogue ná'maq lo'ueenatec ñi qota'a quená'maq hueeto'ot na piguim chaqai quena 'laua chaqai quená'maq pa'aatañi quena 'laua chaqai cana huaaxai chaqai quená'ogue ná'maq hueetaugui na'maxare, 'neracsa':
Da nemaqajnataxanaxa, chaqai da necaic, chaqai da nauaq, chaqai da nquesaxanaxa,
qaica lqodoc nqohin
qoỹaanema ñí'maq nqa'xantañigui añi qa'xanaxaqui chaqai ñi qagreta llaalec.
14Ca' saua cuatro ise' nca'leesauec 'neraco' quen:
—¡Ajá'a, chaqaida 'neeta dajo!
Chaqai so veinticuatro qo'xoiquipi ỹa'chi'iñi naua le'cootal, ca imaqachin ñí'maq qaica lqodoc da nachaalataxac.
