Dá'maq 'neeta dá'maq chaalataxac quiyim qoỹaanot ñi qota'a
1Ca vichiguiño' ỹaqaỹarolqa, ñi'xoresentouguilo qamiri quedá'maq le'xorenataxanaxa ñi qota'a quiyim ỹaatqajam nomachiỹalta' nañaañiỹot ñi'maxare, 'ñiitari' aca nachitaxanataxanqate ỹaatqajam nca'leetauec, quiyim 'ueenataxañiỹot chaqai quiyim ỹa'maxarente' qamiri ñi'maxare. Ca' chaqaida 'ñiita'gue quiyim lliichigui añi re'taxanatahi ca remaqajnataxanaxahi. 2Totaxan quiita'pegue' da no'ueenataxac ná'maq hueetalec na 'laua; ta'ta'a quiyim dalaxachii' naua ra'deenataxanaxagohi, qaiyi dalaxaic dá'ogue da nachaalataxaguii, qaiyi 'yiiñii dá'maq ỹahotaque ñi qota'olec, 'neetasa': cá'maq ỹa'maqachiguiñi, chaqai cá'maq ỹa'maxarenta ñi'maxare, chaqai cá'maq 'maxaraic naloochiguiñi.
3Ma' quedá'maq lqouagaxa ñi qota'a caỹim, ca yilarelec dajo ỹo'ueenataxanaxac, ca shinac dajo caqamiá'ogue quiyim qaica quet cá'maq ỹoiquentac quiyim napacqajan queca chi la'deenataxanaxac. Ta'ta'a quiyim quiñi 'óna ỹa'maxate'tegue ca la'deenataxanaxac quecá'maq laloqo' ca lpi'ỹaxac qoỹaanem quiñi qota'a. 4Ma' quedá'maq no'ueenataxac na qaroshicmaxa 'xoic na louenqaipioqui', qam ná'ogue na'maxare sqai 'oonoqui' ca lo'ueenataxanaxac. 5Ca' chaqaida 'neeta coqomi', 'eno'm qomi' 'xoic, qam 'oonoqui' na qaroshicmaxa ma' ña'daqatau'a so Cristo. Ca' qarenoqueta'ta', 'nejem na louenqaipi na noshicmaxa.
6Ma' ñi qota'olec ỹoreta'oguit na no'ueenataxanaxac ỹaanema qomi', ma' ñi'maxare ỹa'den cá'maq laloqo' ca ỹaanem quiñi 'óna. Qam sa'maxatqa'tegue quiyim so'ueenataxanaxa cá'maq qaneme. No'm ñi qota'olec ỹaanema qomi' quiyim sa'xataxe' naua la'qaatqa, ca' chaqaida so'ueetaq, qam quecá'maq nalootau'a ca qarpi'ỹaxac. 7Chaqai no'm ỹaanema qomi' quiyim squelolaxa ná'maq mashic icoñiguit da na'qaatec, ca' chaqaida so'ueetaq. Chaqai cá'maq ỹa'den quiyim rapaxaguinataxan nqohin, ca' chaqaida queetalec quiyim rapaxaguinataxan. 8Chaqai cá'maq ỹa'den quiyim ỹa'ñaxat ca liỹa, ca' chaqaida queetalec quiyim ỹo'uet. Chaqai quecá'maq ramiaxan, ca ỹo'uet, qam qaica ca naquitetaque. Chaqai cá'maq na'gaxala', ỹaatqajam netela'a da lo'ueenataxanaxac. Chaqai cá'maq ỹotauan ná'maq 'ue na louenaxanaxa, qam qaidaata neconaque da leuagaxaric.
Dá'maq no'ueenataxac ná'maq mashic icoñiguit da na'qaatec
9Ỹaatqajam 'chichiguiñi nqai'ñii da re'xorenataxanaxahi quiñi 'óna queca liỹa. Se rqo'chiỹa dá'maq se no'uen, ca' quii'uegue dá'maq lo'yaxanec. 10Ca' ỹaatqajam ne'xoriñiỹata', 'ñiitari' caua nalamaxarete' nqaỹa'. Qaica ca qaỹapacqajnauec, ca' quiñi 'óna ỹa'maxate'tegue ca liỹa.
11Na'ñaxachiỹo', 'neeto' lotqai 'ue ca hualaic caqamiri. Machiỹauec añi re'taxanatahi quiyim 'ueenataxañitacot so qara'gaxala'.
12Netooñita'gue dá'maq quiyim 'ue da naquitaxaguii. Chaqai ỹaatqajam neualaxaviñi'e' quiyim 'ue ca ne'guenaxaguii. Chaqai sqai 'xañiñi da nqouagaxainaxaguii.
13Tauañii ná'maq mashic icoñiguit da na'qaatec quecanchaqaica ỹouentaque, chaqai ỹaatqajam daañii'chiguit quelolliỹa cá'maq na'piichaxahi.
14'Xoriñitac ná'maq se ỹa'maxata'que qamiri. Chaqai shiilahi ñi qota'a quiyim no'ueenaxat ca llicyaxac na'maxare, mesqai shiilaxañilec queca se no'uen.
15Netoonaxauahi cá'maq netoontac, chaqai noỹenaxauahi cá'maq noỹentac.
16Ỹaatqajam necoñii'jta' queda nachaalataxaguii. 'Neeto' qamiri nemaqajnaxahi', ta'ta'a quiyim naloqojñita'ta' da re'xoriguii. 'Neeto' lotqai 'neetapigui qavillii quiyim qamiri 'deenaxanqachaqaqa.
17Cá'maq se no'uen ca 'neeta'pegue caqamiri, sqo pilaxachilec ca se no'uen. Ta'ta'a quiyim 'viichii ca ỹa'maqachiguiñi quiyim cá'ogue qaỹa'yiinchigui. 18Ca' ỹaatqajam na'ñaxachii quiyim 'viichii ná'ogue ná'maq 'neeta'pegue na qomyipi, qaiyi qaica canchaqaica caqamiá'ogue. 19Qamiri ñauochaxaua' ỹaqaỹarolqa, 'neeto' lotqai viitaque ca chi rovirii, ta'ta'a quiyim 'xañiigue quiyim chaqaiñi ñi qota'a ñí'maq rouaxanaxan. Ma' quenaua naneresañi la'qaatqa ñi'maxare 'neracsa': “Chaqaỹim ná'maq sa'ue ca nouaxanaxaset ca qom, chaqai chaqaỹim ná'maq seshiuetenaxan, 'naac na ra'gaxalari.” 20Chaqai qai'neeta 'naac: “No'm qopat ca npa'guenaxaua'e', ca qui'ỹaxañi'. Chaqai no'm 'xoic ca laquip, ca ne'taxañi'. Ma' quena' qaỹo'uet dajo, ca ỹo'uet quiyim ỹoqa'a na lashic quena layiloxo.” 21'Neeto' lotqai nañaañichichiguit quiyim sham qami' loxonec na se no'uen, ta'ta'a quiyim qadoxonqui' na se no'uen, qam do'isa'a ná'maq no'uen.
