1Ca ¿nega'ỹo' cá'maq ỹapacauec quiyim qom judío lase'? ¿Negue' cá'maq 'neco' cá'maq netanec na qaroshicmaxa? 2'Xoic, chaqai 'xoic ná'maq leloxoỹaxaquipi quiyim na'maxare napacalec na liỹaripi. Ma' dá'maq 'avichiguiñi 'neetasa': Ñi qota'olec pataxalec na'le da la'qaatec na judioipi. 3Qam ¿negue' cá'maq 'neeta quiyim no'm 'ue ca se ipacqajñigui da na'qaatec? Ca' ¿ñi qota'olec ỹaxanño' da la'qaatec quiyim se ipacqajñigui? 4¡'E'! Ta'ta'a quiyim ñi'maxare ipacqajanchigui ỹo'uet dá'maq lliqueta, 'eno'm ná'ogue na qom 'maatqaic. Ma' 'nerac naua naneresañi la'qaatqa ñi qota'a:
Quiyim taxahi', ca' re'oq quiyim ỹaatqajam lliqueta ca 'ñirac,
ca' re'qootec quiyim qaica ca rasauaxashichi' ma' qaimit qami'.
5Qam no'm dá'maq qareualoxonqaishic re'oq nqai'en quiyim ñi qota'olec ỹo'ueetetac da ỹa'maqachiguiñi, ca ¿nega'ỹo' ca shinqac? Ca ¿peeta'a ñi qota'a ñí'maq se ỹa'maxañi quiyim ỹo'uet ca qanouaxanaxaset? (Dajo shinac 'nejem ca la'qaatec ca chaqai qom.) 6¡'Nesa ma' sqai 'neeta dajo! Ma' quetqai ñi qota'olec se ỹa'maxañi ca ỹo'ueetetac, ca ¿negue' quet cá'maq la'maqa' quiyim imit na lasauaxaset na qomyipi?
7Qam no'm dá'maq ỹa'maachic paguec re'oq nqai'en da lauaq dá'maq ỹaatqajam llic no'ueenataxac ñi qota'olec, ca ¿chi'neco' ma' qaimit aỹim, qohinta'gue aỹim quiyim 'ec ỹim sauaqhuaic? 8Quiyim 'neeta dajo, ca ¿chi'neco' ma' se qaỹo'uet cá'maq se ỹa'maxañi, qaiyi novi' cá'maq ỹa'maqachiguiñi? Ca' 'eda dá'maq 'neeta quiyim 'ue na se no'uen da la'deenataxanaxac, ca 'naac quiyim qomi' sapaxaguinataxanqata'pegue. Qam cajo qomyipi qaỹa'ue ma'le ca nouaxanaxaset.
Qomá'ogue qom sauaqhuaiquipi
9Ca ¿negue' cá'maq 'neeta? Ma' ¿qomi' judío lase', ca sapacqauec quena liỹaripi? ¡'E', mesqaida! Ma' qomi' shi'gue sichoxotaq quená'maq judioipi chaqai ná'maq sqai judío ná'ogue qoỹoiquentac queda lquesaxanaxa na nasauaxaset. 10Ma' naua naneresañi la'qaatqa ñi qota'a 'neracsa':
Qaica ca huagaxaraic, ñaqa 'ue quet ca 'oonoqui';
11qaica quet cá'maq 'oonoqui' ỹahotaque quet quiyim 'ue ca ỹa'den,
qaica ca ishit imitaque ñi qota'a.
12Ná'ogue chi namaqatajlec, ná'ogue tai'a quiyim na'laañi.
Qaica quet cá'maq ỹo'uet quet ca ỹa'maqachiguiñi, ñaqa 'ue quet ca 'oonoqui'.
13Añi loqosote 'ec aca napal lahi' nauatetañigui;
rayinaxantac quenaua la'qaatqa.
'Ec nanaic ledoonaxa na hueetauguilo naua la'qaatqa.
14Quena' retaqa, qaidaata quiyim chi ỹayinta'a quiyim qaỹa'ue ca nouaxanaxaset ca liỹa,
qaica ma' lo'yaxanec quet ca ỹa'xatetac.
15Naua lichil ỹaatqajam yaraqa quiyim ralauataxan;
16da no'ueenataxac ỹo'uet quiyim na'laañi ca liỹa, chaqai ỹo'uet ca le'xoric,
17chaqai se ỹa'den dá'maq llicyaxac da neuagaxa.
18Chaqai vire'ta se ỹa'den quiyim no'cha'a ñi qota'olec.
19Sa'deenaq quiyim dá'ogue dá'maq ỹa'xat so naqataxaquipi chicqo'ot so Moisés, ỹa'xat, qam 'naapega ná'maq hueeto'ot so naqataxaquipi, qaiyi ná'ogue i'maxañi, qaica retaqa, ca' qaiyi ná'ogue na qomyipi hueeto'ot quiyim 'ue ca 'neeta ma' ñi qota'a imit ná'ogue na nasauaxaset. 20Ma' qaica quet cá'maq qaỹa'maxarenta quiñi qota'olec quiyim ỹo'ueetetac dá'maq 'naac na naqataxaquipi, ma' na naqataxaquipi, na'maxare chi ỹo'uet quiyim ỹa'deenaxanaxaneguelo qomi' quiyim qomi' sauaqhuaqa.
Da nca'laxa chicqochigui da npi'ỹaxac
21Qam nagui le'en nqaishinaq so naqataxaquipi. Ca' ñi qota'olec ỹa'deenaxanaxanque dá'maq 'neeta quiyim ỹa'maxarente' qomi' ñi'maxare. Ca' dajo re'oq quena' qaretaqalec aná'maq lere hueetalec na naqataxaquipi chaqai quenaua la'qaatqa so qota'a letaxaỹaxaquiripi. 22Dá'maq 'neeta quiyim icoñi'chiguita qomi' ñi'maxare chicqochigui quiyim qomi' 'ue da qarpi'ỹaxac queso Jesucristo. Ca' chaqaida 'ne'tegue quená'ogue ná'maq huelec so'maxare, qaica ca ỹapacqajnauec. 23Ma' ná'ogue na qomyipi 'ue na lasauaxaset, chaqai quiyim qoỹoqo'ta queda lca'laqataxanaxac ñi qota'a. 24Qam quedá'maq lqouagaxa ñi qota'a, ca ỹo'uet quiyim qaicoñi'chiguit quiñi'maxare. Qaca aca laseuete nqai'en, ma' nca'laxatec, chicqochigui nqai'en so Cristo Jesús. 25Ñi qota'olec ỹo'uet chicqochigui nqai'en so Cristo queso lelauaxa, quiyim ishit qaỹapalaxat na nasauaxaseteripi, qam quiyim qoyiuelec so'maxare. Dajo 'ne'tegue, qaiyi re'oq quiyim ñi qota'a ipacqajanchigui dá'maq 'neeta'pegue, ma' mashic quedá'maq leualaxavic liyi le'ne' nqai'ne' sauá'maq 'auaxaqa nasauaxasete'. 26'Neeta dajo, ma' ñi qota'a ỹahotaque ỹachaxan quiyim ñi'maxare ỹo'ueetetac da ỹa'maqachiguiñi. Chaqai se neme da 'neetari' quiyim icoñi'chiguit ñi'maxare ná'maq huelec so Jesús.
27¿Negue' cá'maq 'neeto' na'le dá'maq nemaqajnaxac na qom? Se qaỹalecqajno. Qam ¿chi'neco'? Ma' quiyim qaipacqajanchigui dá'maq 'naac na naqataxaquipi, ca chicqochigui da maqajnaxac. Qam queda npi'ỹaxac qaica ca lligo nqai'en. 28Ca vichiguiño' qomi' sa'deenqata quiyim ñi qota'olec icoñi'chiguit ca qom quiyim 'ue ca lpi'ỹaxac, mese ipacaque quiyim ỹo'ueetetac da 'naac na naqataxaquipi, loqo'm 'e'.
29Ca ¿peeta'a ñi qota'olec nodaatec quiyim qota'olec quena judioipi? Ca' ¿mese qota'olec qai'neeta quena sqai judioipi? Ajá'a, ñi'maxare qota'olec qai'neeta quena'maxare. 30Ma' qaica quet cá'maq liỹa qota'olec. Ca' chaqaiñi ñí'maq qota'olec ñí'maq icoñi'chiguit ná'maq 'ue ca lpi'ỹaxac, se ipacaque quiyim 'ue ca netanec na loshicmaxa, loqo'm 'e'. 31Ca quedá'maq qarpi'ỹaxac, ca' ¿qaica ca 'negue nqaishinaq da naqataxaquipi? ¡'E'! Ta'ta'a quiyim se'taxataxañi dá'maq naqataxaquipi.
