Dá'maq 'neeta quiyim ỹa'maxarente' qomi' ñi qota'a
1Ca' chaqaida 'neeta quiyim ma' ỹa'maxarente' qomi' ñi qota'olec ma' 'ue da qarpi'ỹaxac. Ca huaqui'chiguita qomi' ñi'maxare, chicqochigui nqai'en so qara'gaxala' Jesucristo. 2Ma' chaqaiso só'maq Cristo só'maq 'em quiyim seconaxaguit da lqouagaxa ñi qota'olec, qam dajo chicqochigui da qarpi'ỹaxac. Ca' dajo qanqouagaxa ỹaatqajam ña'ñaxatqa'tegue, chaqai 'ue da qanetoonaxac, ma' mashic 'ue da qanaquitaxac quiyim ñouanqau'a da lauaq ñi qota'olec. 3Chaqai mesqaidaata dajo, ma' qai'neeta ñitoonqatac quiyim 'ue da qare'xoric; ma' sa'deenaq quiyim da qare'xoric ỹo'uet ca qareualaxavic, 4chaqai da qareualaxavic ỹo'uet quiyim qaỹa'maxarente' qomi'. Ca' quiyim qaỹa'maxarente' qomi', ca 'ue da qanaquitaxac. 5Ca' dajo qanaquitaxac se ỹo'uet ca qarayiloxo, ma' ñi qota'a no'xataxachiguilo naua qare'taxanata queda le'xorenataxanaxa, chicqochigui nqai'en so Espíritu Santo ma' mashic ỹaanema qomi'.
6Ma' na' se seshitaq quiyim chi ñca'laxatqalta', ca' so Cristo ileualec na hualoxonyipi, na' ỹovita ca laloqo' nqai'en ñi qota'olec. 7Ỹaatqajam 'xoic lqalaic quiyim 'ue quet ca ileualec ca liỹa qom, 'enquetqai huagaxaraic ca qom. Qam no'm ỹaatqajam huagaxaraic ca qom, sqoue quiyim 'ue ca ỹahotaque quiyim ileualec ca'maxare. 8Qam ñi qota'olec ichoxot da le'xorenataxanaxa coqomi' quiyim so Cristo ileualgoto qomi', 'eno'm ñaqai qomi' sauaqhuaqa. 9Ca' nagui mashic qaicoñi'chiguita qomi' quiñi qota'a chicqochigui nqohin da lelauaxa so Cristo. Ca' paguec la'maxa nagui ma' so'maxare se ỹovira'alo nqai'ne' qomi' ma'le ca nouaxanaxaset na qomyipi naỹalec najo. 10Ma' ñi qota'olec ỹachigoxochichigui da lelauaxa so llaalec quiyim huaqui'chiguita qomi' co'na' ñaq qanpa'guenaxaua. Ca' paguec nagui, ca nca'laxaterec qomi' queso llaalec quedá'maq chi lca'laxa, ma' mashic huaqui'chiguita qomi' ñi'maxare. 11Qam mesqaidaata dajo, ma' qai'neeta 'ue da qanetoonaxac quiñi qota'a chicqochigui so qara'gaxala' Jesucristo. Ma' so'maxare chicqochigui quiyim huaqui'chiguita qomi' nagui ñi qota'olec.
Dá'maq 'neeta so Adán chaqai so Cristo
12Ca quiyim chicqochigui so 'oonoqui' ỹale quiyim 'ue da nasauaxaset quena 'laua, ca ỹo'uet lligo da nelauaxa, ca' da nelauaxa quigui ná'ogue na qomyipi, ma' ná'ogue 'uo' na lasauaxaset. 13Na' saqa'leca na naqataxaquipi, qa' shi'co' 'ue na nasauaxaset quena 'laua; 'eno'm na nasauaxaset se qara'igui quena' qaica da naqataxac. 14Qam qaiyiita, ma' chicqochi'ñi queso Adán chi ỹovireta'a so Moisés da nelauaxa 'uo' da lquesaxanaxa quená'maq 'ue na ỹasauaxat, 'eno'm ca lasauaxaset mesqai quiyim 'ue quet ca se na'xaỹaxana quena naqataxac, quiyim 'nejem dá'maq 'ne'teco' na'le so Adán. Qam so Adán chi qoỹañigui lqui'i só'maq naỹa'co'na.
15Qam so lasauaxaset so Adán se nalo'guit nqohin só'maq qaneme chicqo'ot ñi qota'a. Ma' quesó'maq lasauaxaset so 'oonoqui' qom, ca 'xoico' na ileu. Qam da nca'laxa qaneme chicqo'ot ñi qota'a paguec lecaic, ma' 'xoic na icoñiguit da la'maxa chicqochigui nqai'en so 'oonoqui' ỹale Jesucristo. 16Ma' so lasauaxaset só'maq 'oonoqui' ỹale se ishit quiyim qanaloqojñiguit da nca'laxa chicqo'ot ñi qota'a ỹaanema qomi'. Ma' dá'maq 'neeta queda nasauaxaset, quiyim 'ue da nouaxanaxaset na qomyipi chicqotougui da 'oonoqui' nasauaxaset. Qam dá'maq 'neeta queda nca'laxa, ca' ñi qota'olec chaqai ỹaanem na qomyipi quiyim ñi'maxare icoñi'chiguit na'maxare, 'eno'm 'xoic ca lasauaxaset. 17Ca no'm da nelauaxa 'uo' da lquesaxanaxa na'le chicqochigui so lasauaxaset so 'oonoqui' qom, ca paguec lecaic ma'le cá'maq ỹaanem ná'maq icoñi'chiguit ñi qota'olec. Ca 'ue ma'le ca lquesaxanaxa quedá'maq dalaxaic lca'laxa chicqochigui nqai'en so 'oonoqui' ỹale Jesucristo.
18Ma' 'nejem só'maq lasauaxaset so Adán quiyim ỹa'ue da nouaxanaxaset ná'ogue na qomyipi, ca' chaqaida dá'maq 'neeta quedá'maq 'maxaraic lo'ueenataxanaxac so Jesucristo, ca noviraqta ná'ogue na qomyipi da chaalataxac. Se ỹovira'a nqai'en ca nouaxanaxaset. 19Ca' dajo 'neetasa', quiyim chicqochigui so 'oonoqui' ỹale se na'xaỹaxan, ca 'xoic ná'maq sauaqhuaiquipi, ca' qaican ỹapaguec ma' chicqochigui quiyim na'xaỹaxanta so 'oonoqui' ỹale, ca 'xoic ná'maq qaicoñi'chiguit quiñi qota'a.
20Ma' na naqataxaquipi novi', qam paguec re'qoota nqai'en na nasauaxaseteripi. Qam co'na' nqo'neuec na nasauaxaset, ca' da lqouagaxa ñi qota'a pagueco' lecaic na'le. 21Ma' dá'maq nasauaxaset 'uo' da lquesaxanaxa quiyim noviraxat da nelauaxa, ca 'nejem quiyim, ma' mashic icoñi'chiguita qomi' ñi qota'a, da lqouagaxa 'ue da lquesaxanaxa quiyim ỹaanema qomi' da nca'laxa sqaica lqodoc, chicqochigui nqai'en so qara'gaxala' Jesucristo.
