Da qanachaalataxac na'deetau'a so Cristo
1Ca ¿nega'ỹo' ca shinqac? ¿Qolqatalco' quiyim sahoqotaque na qarasauaxaset, qaiyi nqo'naxatec ma'le da lqouagaxa ñi qota'olec coqomi'? 2¡'E', mesqaida! Ma' mashic 'eco' shi'gue qareleu quena nasauaxaset. Ca' ¿chi'negue queta' lotqai liỹa qolqatalec na'maxare? 3¿Sqai 'yiiñiỹo' qamiri quiyim ña'daxau'a so Cristo Jesús quena' qanachilaxane' qomi', ca ña'daxau'a qai'neeta da lelauaxa so'maxare? 4Ma' na' qanachilaxane' qomi', ca 'ec qaishiñiñi qomi' qariỹaachi'ñi' so Cristo, ca qareleu, qaiyi ma' liỹa qanca'laxaterec qomi', ca sanaxañi da dalaxaic chaalataxac. Ca 'nejme' qomi' ma'le so Cristo na' liỹa qanca'laxatec queso lelauaxa, ỹahote'e da lauaq da lquesaxanaxa ñi qota'a.
5Ma' no'm 'ec qariỹaata'ñi' na'le so Cristo queso lelauaxa, ca 'nejme' qomi' ma'le qariỹaatashiguim ma' liỹa qanca'laxaterec qomi'. 6Sa'deenaq quiyim dá'maq 'auaxaic qano'ueenataxac shi'gue qaipateno liỹaatashiguim nqohin so Cristo, qaiyi sogui dá'maq lquesaxanaxa da qano'ueenataxac ma' sauaqhuaic, ca' qaiyi tot ilareta'pe qomi' da nasauaxaset quiyim 'ec ca qana'co'. 7Ma' quecá'maq mashic ileu, ca qaỹoso'oga quena nasauaxaset. 8Ma' no'm qomi' shi'gue qolqata'ñi' so Cristo queso lelauaxa, ca qai'neeta seuaqlec quiyim qarca'laxaua ma'le so'maxare. 9Ma' sa'deenaq quiyim so Cristo na' liỹa qanca'laxatec quiñi qota'a, ca' tot ileu; ma' da nelauaxa tot ishit quiyim liỹa quet ỹalauat so'maxare. 10Ma' so Cristo co'na' ileu, qam ileualec na nasauaxaset, ca so'maxare tot qaica ma' liỹa quet ileu; ma' co'na' liỹa nca'leuec, ca' da nachaalataxac loiquenatec ñi qota'a. 11Ca qai'neete' qamiri 'ñiitari' 'ec qamiri leuaxaiqa quena nasauaxaset, qam da nachaalataxaguii ỹoiquentac nqai'ñii ñi qota'a, ma' na'yiitau'a so Cristo Jesús só'maq qara'gaxala'.
12Ca vichiguiño' qamiri sqai 'xañii'tegue quiyim dá'maq se no'uen se neme ilaretac na roshicmaxahi ma' 'ue lqodoc, quiyim 'ec ỹilentalgoto qamiri quiyim 'viichii cá'maq ỹahotaque se no'uen. 13Sqai 'ỹaañiguit na roshicmaxahi na nasauaxaset quiyim ỹahotaque quiyim ỹouen ỹo'uet ca se no'uen. Ta'ta'a quiyim nañaañiỹot ñi qota'olec, 'ñiitari' ca qom mashic ileu chaqai quiyim liỹa nca'leuec. 'Ỹaañiỹot ñi qota'olec na roshicmaxahi quiyim rouenaxana quiyim ỹo'uet ca ỹa'maqachiguiñi. 14Ma' da nasauaxaset tot qaica da lquesaxanaxa caqamiri quiyim relaritac, ma' totqai viito'ot na naqataxaquipi, ta'ta'a quiyim viito'ot da lqouagaxa ñi qota'a.
Qaraloqojnaxañigui ca na'ac
15Ca ¿nega'ỹo' ca shinqac? ¿Sahoqo' ca qarasauaxaset ma' totqai seuqato'ot so naqataxaquipi, ta'ta'a quiyim seuqato'ot da lqouagaxa ñi qota'a? ¡'E', mesqaida! 16Ma' qamiri ỹaatqajam 'yiiñita quiyim no'm nañaañiỹot ca na'coori viitaque quiyim qamiri lelaatqa, ca quecá'maq 'naac, ca' na'xaỹaxañii'ta ca'maxare, ma' na'coori. Ca qaican ỹapaguec no'm quii'uegue da hualoxonqaishic na'xaỹaxañiỹa 'ñiita'gue ca na'coori, ca da'maxare noviraxat ma'le ca nelauaxa, loqo'm na'xaỹaxañiỹa ñi qota'olec, ca quiitalec 'viichitac dá'maq no'uen queda nachaalataxaguii. 17Qam 'ue da qana'aachic quiñi qota'a caqamiri, ma' quesom qamiri loiquenatqa na se no'uen, qam nagui ỹaatqajam na'xaỹaxañii'ta dá'maq leloxoỹaxac da napaxaguinataxanaxac mashic qoỹaanema qamiri. 18Ca na' qaỹoso'ogalo qamiri quena' qarelaritac quena nasauaxaset, ca noxoñiu'a quiyim qamiri lelaatqa ñi qota'a, qam quiyim 'viichii ca ỹa'maqachiguiñi. 19(Da itaxaỹaxac 'neetari' ca letaxaỹaxac cá'maq canchaqaica qom, ma' qamiri saqa' ỹaatqajam 'yiiñii cá'maq ỹaatqajam leloxoỹaxac dajo.) Ma' quiyim dá'maq 'ñiita'gue quesom na' 'ỹaañiguit na roshicmaxahi ná'maq rapio'qotaxan chaqai na se ỹa'maxañi quiyim 'viichii na se no'uen, ca' chaqaida 'ñii'tegue nagui quiyim 'ỹaañiuec na roshicmaxahi quiyim qaro'ueenataxana quena ỹa'maqachiguiñi quiyim ỹaatqajam machii'ot da nachaalataxaguii ñi qota'a.
20Ma' na' ñaqai ỹoiquenta'pe qamiri na nasauaxaset, ca' qamiri saqa' viriu'a dá'maq no'ueenataxac dá'maq co'teeta chaalataxac. 21Qam ¿negue' cá'maq 'neco' na'le dá'maq dajo, dá'maq nagui ỹo'uet na rayiloxohi? Ma' da'maxare qaidaata da nelauaxa rauecqataxantau'a. 22Qam nagui mashic qaỹoso'ogalo qamiri quena nasauaxaset, ca' noxoñiu'a da lo'ueenataxanaxac ñi qota'a. Ca' dajo maxasa' 'ue ca 'negue, ma' da'maxare chicqaugui quiyim ỹaatqajam qaỹomato'ot dá'maq chaalataxac ñi qota'a, chaqai co'uaataxanta ma'le da nca'laxa sqaica lqodoc. 23Ma' da nasauaxaset qaica quet cá'maq liỹa rishiuetenaxana, qaidaata da nelauaxa; qam da lqouagaxa ñi qota'a chicqaugui da nca'laxa sqaica lqodoc quiyim ña'daqatau'a so Cristo Jesús só'maq qara'gaxala'.
