Aso Rut re'palaxantac quiyi lanaxanqa' so Booz
1Ca' aso Noemí 'uo' so li'ỹoxoua, so'maxare lauo' le'ec so loua Elimelec, so'maxare leenaxato' Booz. Ỹaatqajam nesallaxanec chaqai 'ue nqai'negue.
2'Uo' so na'xa'a, ca' aso Rut 'naaco' caso Noemí:
—'Maxariñite' quiyim se'palaxanec, sha'apiguito' quiyim 'ue cá'maq mashic raqataxan ỹa'maxarenta quiyim chi sco'uaataxanta, ñi'palatac ana ni'ỹoqote la na nanecsec.
Ca' aso ni'ỹoqoro 'naaco':
—Ajá'a, mo'e', ỹaalole.
3Ca' aso Rut quepegue' ca nanaxanqa', ca' ne'palatac ana li'ỹoqote ca naqataxanyipi. Ca chi natenta'a so lanaxanqa' so Booz, só'maq chi lauo' le'ec so Elimelec. 4Ca nachinchiquio' novirec so Booz, chicqau'a yi Belén, ca iquino' so naqataxanyipi.
—¡Ñi qara'gaxala' liỹareta'pe qamiri!
Ca' so naqataxanyipi 'naaco':
—¡Ñi qara'gaxala' ỹaanem qami' ca no'uen qayicyaxaqui'!
5Ime, ca' so Booz inato' so la'gaxala' so naqataxanyipi:
—¿Negue' ca lauo' lase adajo nequetegaxai?
6Ca' so lashi so naqataxanyipi 'naaco':
—Chicqa'gue da Moab. Ada'maxare nauegaxaua na'le aca Noemí. 7Da'maxare yashiila quiyim chi coỹaretaho quena naqataxanyipi quiyim chi ne'palatac ana ni'ỹoqote ala na nanecsec. Ada'maxare ro'ueenataxantac quesá'ogue so nete'eta, chi ỹovireta'a nagui. Ca' chaqai cocho'qui' nco'matec.
8Co'na'le, ca' so Booz 'naaco' caso Rut:
—Qami' ỹaalole, ñaq na'xaỹaxañiriua', totaxan quirepegue'o' ca liỹa nanaxanqa' quiyim ne'pala'e' ana la na nanecsec. Chaqaina viiso'o', lliquisauquio' na ilaataipi. 9Ca coỹachisalgoto quecá'maq taigue na naqataxanyipi quiyim raqataxan. Aỹim mashic sa'ue da ỹaqataxac quena ilaatqaipi quiyim qarayaxañi'sac. Chaqai ma' vichi' ca raquipi', ca' coñita aca 'taxaqui, ca naqachirishiguim ca raquipi' caná'maq laquipiaxaqui na'maxare.
10Ca' aso Rut ỹa'chi'iñi naua le'cootal, ỹoviraxata'guit na latap na 'laua. Ca inato' so Booz:
—¿Chi'neco' ma' ỹaatqajam lamaxachichirigui aỹim quiyim yi'xoriñi' quiyim ỹoqa'a ca sachicqa'gue?
11Ca' so Booz 'naaco':
—Sa'deenta dá'ogue dá'maq 'ñi'sari' cañi ni'ỹoqoro'e' na' ñaqai cha'gue ileu yi roua'e', chaqai sa'den qai'neeta quiyim lachi' caua qata'alli' chaqai cá'maq 'laua chicqoiralec, ma' viisaque qami' qara'aayaxaua, 'eno'm sqai huañirapegalo qomi'. 12Ca' ¡ñi qota'olec ishiueten ma'le dá'maq 'ñiisari'! ¡Ñi qara'gaxala' ñí'maq qota'olec quena Israel llaalqaipi ñí'maq daañisaque quiyim huaqaitot, ishiueten ma'le dá'ogue dá'maq ro'ueenataxanaxaqui'!
13Ca 'naaco' aso Rut:
—Ỹaatqajam 'ue da re'xorenataxanaxa'e' caỹim, chaqai naua ra'qaataxahi' ya'ñaxate', ma' ỹaatqajam yichirite' quena' taxahi' caỹim, 'eno'm sqaỹim qachaaqainata'e'.
14Ca co'na' ỹovita ca nqui'ỹaaqa', ca' so Booz roỹaxano' aso Rut, ca 'naaco':
—Na'itquena, coñita yi pan lahi, llichiriñi queda alegue'.
Ca' aso Rut nqa'xanñi, ỹalequetougui so naqataxanyipi. Ca' so Booz ỹaanem so nqatelecsec la ana cebada, ca' que'e, chi ỹovireta'a quema' chaqai 'ue so li'ỹoxot. 15Ca co'na' liỹa pilauec raqataxan cana la, ca' so Booz qata so lelaatqaipi, 'naaco':
—'Xañitaco' quiyim qai'neeta ne'pala ana la na nanaqata cebada. Qaica ca se ỹa'maxata'gue ada'maxare. 16Chaqai qai'neeta 'ue ca najñi nqai'ñii caná'maq chi rcoñitahi, qaiyi ne'pala ada'maxare. ¡Qaica ca se ỹa'maxata'gue ada'maxare!
17Ca' aso Rut re'palaxan cana la quiyi lanaxanqa' so Booz, chi ỹovireta'a quiyim pe. Ca' so le'palec aso'maxare, co'na' qanasoolañi, paguelec veinte kilo aso cebada. 18Ca co'na' pilo quiyi na'a' pa'aatañi caso le'pala cebada ala, ca' ỹachaxantapeguem aso ni'ỹoqoro. Ime, ca' lotqai naqajshiguim so li'ỹoxot na' que'eetac, ca' ỹaanem aso Noemí.
19Ca' aso Noemí inato' aso late, 'naaco':
—¿Hua'gue cá'maq re'palaxanqachi' queso na'xa'a? ¿Negue' cá'maq chicqa'gue ná'maq 'xoic re'pala'e'? ¡Ỹaatqajam no'uen da llicyaxac cá'maq 'ne'tegue dajo quiyim rotauañi'!
Ca' aso Rut ra'qaataxanem aso ni'ỹoqoro quesó'maq ro'ueenataxantacot:
—So ỹale leenaxat Booz:
20Ca' aso Noemí 'naaco':
—¡Ñi qara'gaxala' ỹaanem ma'le da lqouagaxa ca'maxare! Ma' ỹaatqajam 'ue da lqouagaxa coqomi', 'nejem nqai'en da no'ueenataxac so 'auaxaic qomyipi mashic shi'gue sou. Cajo ỹale chi lauo' le'ec so Elimelec, vichiguiño' chaqaica cá'maq ishit quiyim cochiỹalo qomi'.
21Ca' aso Rut lotqai 'naaco':
—Qai'neeta 'naac caỹim quiyim shiquetalec se'palaxantac, iỹaatac na lelaataipi, chi ỹovireta'a ime qanaqat ana la yi lanecsec.
22Ca' aso Noemí 'naaco' caso late:
—Qami' ỹaalole, 'eco' ỹa'maqachiguiñi nqaishin quiyim qui'salec lliquisaugui ca lelaataipi ca'maxare, chaqai sqai quirepegue' ca liỹa nanaxanqa', qaiyi qaica ca i'guentau'a qami'.
23Ca' aso Rut queetalec da le'palaxanaxac, liỹaasegueñi saua lelaata so Booz, chi ỹovireta'a quiyim ime so naqataxanaxac cana cebada chaqai quena trigo. Qam aso'maxare ñaq lauora aso ni'ỹoqoro.
