So Booz o'ñiguit aso Rut
1Ca co'na' shi'gom queso na'xa'a, ca' so Booz eec quepegue' yi ñigo quiyi na'a', ca' nqa'xanñi quiyi lapooqo'o' quen na qomyipi. Ca co'na' que'tegueyi so liỹa lauo' le'ec só'maq 'neetapego' so Booz, ca 'naaco' so Booz:
—Vei, ỹala'e' quenajo, nqa'xanyiñi.
Ca só'maq lauo' le'ec eec, ca' nqa'xanñi. 2Ca' so Booz chaqa'ma' roỹaxanalo saua diez qo'xoiqa quiyi na'a', ca qai'neeta 'naapegalo quiyim nqa'xañiñi quiyi'maxare. Ca na' nqa'xañiñi saua'maxare, 3ca' so Booz 'naaco' queso lauo' le'ec:
—Mashic novi' rapil añi Noemí, chicqota'gue da Moab. Añi'maxare ỹahotaque imen yi na'laua so qouo' le'ec Elimelec. 4Sahotaque 'yiiñi', qaiyi no'm viisaque shiujnaxañita, ca 'ñirac nagui qara'qaachigui qami' quenaua reloqosaho chaqai quena qo'xoiquipi quena na'a'. Ma' qami' ná'maq paguec qauochi' le'ec so Elimelec, ca' qami' tajlec quiyim shiujnaxañita yi na'laua. Qam no'm sqai shiujnaxañita, ca' vite ca ỹa'xaỹaxac ma' quiyim ime sqai shiujnaxañita, ca qaigueme seshit seshiujnaxana.
Ca só'maq lauo' le'ec 'naaco':
—Ajá'a, seshiujnaxana cajo 'laua.
5Co'na'le, ca' so Booz ỹaatqajam ichoxochichigui dá'maq 'neeta dajo:
—'Yiiñite' quiyim ma' shiujnaxañita yi na'laua añi Noemí, ca qai'neeta o'ñichiguit añi late Rut, añí'maq pa'ỹe Moab lase, qaiyi yí'maq 'laua ñaqaiyiita hueetalec da leenaxat yí'maq tot qaica.
6Ca co'na' 'xaỹa dajo só'maq lauo' le'ec, ca 'naaco':
—Ca' no'm chaqaida dajo, ca' ỹim se seshiujnaxana ca'maxare, ma' ỹim se seshit ña'axat da isallaxa. Qam no'm vi'saque shiujnaxañita, ca chaqaida nqai'ñi'. Ca' ỹim saanec nagui quiyim qami' shiujnaxañita.
7Ca' quecauajo na'xata' 'uo' quen da no'ueenataxac na Israel llaalqaipi: co'quena' 'ue ñi se ipaquiguit aca li'ỹoxoua, loqo'm se rishiujnaxana cá'maq lalamaxaret só'maq lauo' le'ec tot qaica, ca ca'maxare naqat ca lapela' liỹa, ca' ỹaanem só'maq ipaquejlec nqai'en dajo 'ueenataxac. 8Ca' so lauo' le'ec so Booz naqate'e so lapela' liỹa, ca' ỹaanem só'maq ipaquejlec quiyim ỹo'uet dajo 'deenaxac. Ca 'naaco':
—Qami' shiujnaxañita ca'maxare ma'le.
9Co'na'le, ca' so Booz 'naaco' queso qo'xoiquipi chaqai queso reloqotaho qomyipi:
—Qamiá'ogue 'yiiñichigui nagui quiyim ỹim seshiujnaxana caso Noemí cá'ogue cá'maq lalamaxareteripi so Elimelec, Quelión chaqai so Mahlón. 10Chaqai qai'neeta 'yiiñichigui quiyim aỹim secona aso Rut quiyim ỹoua, só'maq pa'ỹe Moab lase, qaiyi yijo 'laua chaqai 'neetari' hueetalec leenaxat so Mahlón só'maq loua shi'gue sou, qaiyi sqai pal da leenaxat so Mahlón quená'ogue ná'maq qouo' laseripi chaqai quená'ogue ná'maq na'ñi najo. Qam qamiri 'yiiñichigui aỹim quenajo na'xa'a.
11So qo'xoiquipi chaqai sá'ogue só'maq ỹalequetaho 'naaco':
—Ajá'a, qomi' seuanqachigui. Ca' ¡ñi qara'gaxala' quiyim ỹo'uet cacajo 'aalo inoxona'a ca ra'aachi', 'nejem nqai'en aso Raquel chaqai aso Lea sauá'maq sachigoxosoxouguilo qomá'ogue qomi' llaalqaipi so Israel! Chaqai qami' ỹaatqajam qami' choxoraic chaqai ỹaataxaraic quena qara'a' Efrata, da liỹa leenaxat Belén. 12Sashiilqatac ñi qara'gaxala' quiyim 'xoic nqai'en ca qachaalaxai'ipi cacajo 'aalo, qaiyi qami' ni'ic lodegaxat, 'nejem na'le so Fares só'maq llaalec aso Tamar chaqai so Judá.
13Ca' chaqaida da 'neeta na'le so Booz na' o'ñiguit aso Rut. Ca co'na' mashic loua aso'maxare, ca' ñi qara'gaxala' ỹo'uet quiyim 'man aso'maxare, ca' 'ue so llaalec.
14Ca' na 'aallipi 'naaco' quen caso Noemí:
—¡Ỹaatqajam qaimaqachin ma'le ñi qara'gaxala' ñí'maq ỹo'uet quiyim 'ue nagui na qaualli', qaiyi reloqota'a qami' ma'le! ¡Saxanchi' na qaualli' choxoraic ma'le quena Israel llaalqaipi! 15Ca'maxare ỹo'uet ca na'ñaaqataxaqui' chaqai reloqota'a qami' ma' qami' qo'xoỹom, ma' llaalec añi rachi'i' ñí'maq ỹaatqajam qami' lqo'itqate. Ca 'enquetqai siete caua qachaalaxahi', qam añi'maxare ỹapacauec.
16Ca' aso Noemí icona so noctoqui', ca' qa'aalto'ot chaqai npa'xanlec quiyim iỹaaqain. 17Ca co'na' qaiuana quena lauora 'aallipi, ca 'naaco' quen:
—¡'Uo' da ne'qaañi llaalec añi Noemí!
Ca' qoỹanegue leenaxat Obed. Ca' chaqaiso só'maq leta'a so Isaí chaqai lapi' so nashi David.
So 'au chigoxougui so leta'allipi so David
18-22Ca' najo ná'maq 'au chigoxougui so leta'allipi so David, chicqochi'ñi queso Fares: Hezrón, Ram, Aminadab, Naasón, Salmón, Booz, Obed, chaqai so Isaí só'maq leta'a so nashi David.
