Qaiuana so ncoỹeraxanaxaqui chaqai saua olivo lichiiqui
1Ca' rapil só'maq nelaatec piguim le'ec só'maq retaqata'pegue' aỹim, ca' neloxotec aỹim 'ec nqai'en quena' qaneloxotec ca laqata. Ca' yinat: 2¿Negue' ná'maq rauanachiqui'?
Ca' ỹim shinac: Seuane'ta ñi ncoỹeraxanaxat imaañi 'oro, ca 'ue añi hueetagui na aceite pa'aatashiguim. Ca pa'aasashiguim ñaua siete lcoỹeraxanaxaqui', ca' ñaua'maxare ỹovirau'alo saua siete lligro na aceite. 3Ca' quiñi ncoỹeraxanaxaqui, ca' 'vii daua dos olivo lichiiqui, 'óna ada pa'aata'gue da loic chaqai ada liỹa pa'aata'gue da nemaq.
4Ca' senat só'maq setaqata'pegue' nelaatec piguim le'ec, shinac: Qami' ỹa'gaxala', ¿negue' cá'maq reloqo'tegue dá'maq dajo?
5Ca' so nelaatec 'naac caỹim: ¿Sqa 'yiiñi' cá'maq 'neeta?
Ca' ỹim shinac: 'E', se sa'den cá'maq 'neeta, qami' ỹa'gaxala'.
6Ca na'le, ca' so'maxare queetalec da letaxaỹaxac, 'naac: 'Neetasa' dá'maq letaxaỹaxac ñi qara'gaxala' taỹa'a so Zorobabel: Mesqai qaỹahote'e ca ỹalliripi nalauataxairipi chaqai da nquesaxanaxa, ta'ta'a quiyim qaỹahote'e so ñi'Espíritu, 'naac ñi qara'gaxala' sqaica lqalanec. 7¿Negue' aqami', qami' qa' ladocai late'ogue'? ¡Qami' ñigui nqohin ma'le ca no'ueenaxa quiñi Zorobabel! Ñi'maxare naqata'a ma'le cá'maq 'auñi qa', ca' na qom ỹaualqagui ma'le 'naac: ¡Chalego loyac! ¡Chalego loyac!
8Ime, ca' ñi qara'gaxala' nañan so liỹa la'qaatec: 9“Ñi Zorobabel ỹa'vii naua no'xonaxalate' najo no'ueenaxanaxaqui. Ca' chaqaiñi ñí'maq ỹomat ma'le.” Ca' qaigueme 'yiiñii qamiri ma'le chaqaiñi ñi qara'gaxala' sqaica ca lqalanec quiyim chaqaiñi ñí'maq yila'. 10“Ca ná'maq mesqai ỹaatqajam i'taxajñi dá'maq 'ec cocho'qui' dá'maq taachi'ñi, ca' nagui, ca netoon ma' iuana ñi Zorobabel ỹomat yí'maq ỹo'ueetetac.”
Ca na' ime dajo, ca' so nelaatec lotqai 'naac: Nauajo siete ncoỹeraxanaxaqui' chaqainaua nauá'maq nqote' ñi qara'gaxala', ca ñaua'maxare ỹa'ajansac ná'ogue na 'laua.
11Ca na'le, ca' senat: ¿Negue' dauá'maq olivo lashil huaqasaho 'óna quena lahil ñí'maq ncoỹeraxanaxat?
12Chaqai qai'neeta senataxan, shinac: ¿Negue' cá'maq 'neeta ca leloxoỹaxague' saua dos lasote aso olivo ỹoviresau'a saua lligro na aceite imerañi 'oro quesó'maq taỹau'a aso ncoỹeraxanaxaqui?
13Ca' so nelaatec piguim le'ec 'naac caỹim: ¿Sqa 'yiiñi' ca reloqo'teguelo?
Ca' ỹim shinac: Qami' ỹa'gaxala', ỹaatqajam se sa'den.
14Ca so'maxare 'naac caỹim: Dauajo dauá'maq dos nca'acse' quiyim ro'ueenataxantot ñí'maq qota'olec ỹoiquentac ná'ogue na 'laua.
