Qaiuanalo saua cuatro nahoglena lauataxaqui'
1Ca' lotqai 'ue so liỹa iuanaxanaxac. Ca' seuane'talo saua cuatro nahoglena lauataxaqui' hueetañiguilo saua dos 'ec qari ladocai, qam bronce. 2Aso 'auaxai nahoglena letogaxaqa saua lo'ol shipga'; ca' aso co'uaataxanta, ca laueraxaqa saua shipga' lo'ol; 3ca' aso liỹa lalagaxaqa saua lo'ol shipga'; ca asó'maq paguec co'uaataxantam, ca' lecolaxaqa saua lo'ol shipga'.
4Ca' senat só'maq nelaatec piguim le'ec só'maq setaqata'pegue', ca' shinac: Qami' ỹa'gaxala', ¿negue' cá'maq reloqo'tegue dajo?
5Ca' so nelaatec piguim le'ec 'naac caỹim: Nauajo nauá'maq cuatro nonoochi', chicqosapegueu'a ñi la'gaxala' ná'ogue na 'laua. 6Ca asó'maq nahoglena laueraxaqa saua lo'ol ta'tegue da rapiguim; ca asó'maq lalagaxaqa saua lo'ol taỹa'a yi 'laua queda lauashiguim; chaqai asó'maq lo'ol saua shipga' lecolaxaqa taira'a yi 'laua queda 'guiñi.
7Ca' ỹaatqajam nasaptete' saua shipga' lecolaxaqa ma' ỹahosaque ỹouoxone' na 'laua. Ca' so nelaatec piguim le'ec 'naac quesaua'maxare: Mohi, quiilec ná'ogue na 'laua.
Ca saua'maxare chaqaida 'neetetegue.
8Ca na' ime dajo, ca' so nelaatec piguim le'ec ỹaualaq, ca' 'naac: ¡'Ajñi', sauá'maq taira'a yi 'laua queda rapiguim, nemanaxajñi da lonogoxonaxac ñi qara'gaxala' quiyijo 'laua!
Qoỹañigui aso nashi nado'o so Josué
9'Neetasa' da la'qaatec ñi qara'gaxala' caỹim: 10Lapooñireta' ana lapooneguese lam queda ỹoqa'a 'laua ná'maq mashic novi' chicqa'gue da Babilonia: Heldai, Tobías chaqai ñi Jedaías. Ca ma' ime queso na'xa'a, ca chaqa'ma' quirepegue' yi la'a' so Josías ñí'maq llaalec so Sofonías. 11'Xachite' acá'maq rapooñicshi'i' cana plata chaqai quena 'oro, ca 'viichi' caua nashi nado'ol, ca' ñi'rigui ca 'óna na lqahic ñi Josué ñí'maq lashi na netaxaỹaxanqajanqaipi, ñí'maq llaalec so Josadac. 12Ca 'ñiraco': Ñi qara'gaxala' sqaica lqalanec i'taxajñi quiyim ñaxatec cajo ỹale qaỹamata'gue dalaxaic llaxataxa chicqochi'ñalo saua chi lpa'yii, ca' liỹa no'xonshiguim ñi no'ueenaxanaxaqui quiñi qara'gaxala' quiyi Jerusalén. 13Liỹa no'xonshiguim ñi no'ueenaxanaxaqui quiñi qara'gaxala', ca ma'le, ca' ỹaatqajam 'ue da nemaqajnataxanaxac qohinta'gue ca nashi. Nqa'xanñigui ma'le añi nashi nqa'xanaxaqui, ca ná'ogue ỹoiquentac ma'le. Ca' huaqato ma'le añi nqa'xanaxaqui ñi netaxaỹaxanqajnec quena' qaretaxaỹa'pegue' ñi qota'olec. Ca' 'ue da neuagaxa ma'le quiyaua'maxare. 14Ca nauá'maq no'ueenata nashi nado'ol, ca chi no'leentaqate no'ueendaugui ñi no'ueenaxanaxaqui quiñi qara'gaxala' na' qaimaqachintac so Heldai, Tobías, Jedaías chaqai so Josías só'maq llaalec so Sofonías.
15Ca' 'ue na novi' ma'le qomyipi qoỹoqo'tegue na chicqa'gue, ca rotaanaxan quiyim liỹa qano'xonshiguim ñi no'ueenaxanaxaqui quiñi qara'gaxala'; ca ma'le, ca' qaigueme 'yiiñiỹa'a quiyim ñi qara'gaxala' sqaica lqalanec ñí'maq yila'. Ca' dajo ỹovirelec ma' qamiri 'xaiỹaque da lavillaxac ñi qara'gaxala' qota'olec, ca na'xaỹaxañii'ta cá'maq ỹa'xat.
(7.1—9.8 Ñi qara'gaxala' nouaxanaxaset nqai'en quiyim ỹoqa'a da qainaxague 'laua só'maq se na'xaỹaxan qomyipi, qam ñi'maxare ipacqajanchigui da la'qaatec quiyim nca'laxatec ná'maq na'xaỹaxanta.)
