1 Crónicas 12

₁Qaq so David co'ollaq ñaq naneltaxaatac, 'ettapeeguet so Saúl, som llalec so Cis, nache huo'o so alaataxaicpi maye ỹataqta 'añaxaicpi, nqo'ona co'ollaxa somaye co'ollaq netaña ye Siclag, da itauan da huo'o na alaataxac. ₂Qaq se'eso alaataxaicpi ỹachetac so lchecnecpi, qataq nataqa'en ishet da ipocnec na coma' ỹauota'a na lpocnaxanaxat, qataq da ỹaỹenec ana lchecna, da ỹauota'a na lhuaq aloiguishec, huo'otaq na ne'emaq.

Qaq 'ena na le'enaxatpi somayepi, som lauo' le'ecpi so Saúl, maye chegoxoguet so Benjamín: ₃Ajiezer, som nataxala' qataq so Joás, som llalqa so Semagá, maye lma' ye Gabaa, Jeziel qataq so Pelet, maye llalqa so Azmavet, Beraca qataq so Jehú, maye lma't ye Anatot, ₄Ismaías, som gabaoniita, maye ỹalectaigui so treinta 'añaxaicpi, qataq nache lataxala' somayepi, Jeremías, Jahaziel, Johanán, Jozabal maye lma't ye Gedera, ₅Eluzai, Jerimot, Bealías, Semarías, Sefatías, som harufiita, ₆Elcana, Isías, Azarel, Joezer qataq so Yasobeán, som coreiital, ₇qataq so Joelá qataq so Zebadías, som llalqa so Jeroán, maye lma' ye Gedor.

₈Nataqa'en huo'o so chegoxoguetpi so Gad, som huaxaiguet so David co'ollaq hueta'a so ñe'eguenaqa' maye huaña ye toolec 'alhua, qaq somayepi ỹataqta alaataxaicpi qataq 'añaxaicpi, lhuotta da huo'o na alaataxac, qataq ỹataqta na'atchiguiñi na lo'ogoxonaxatpi, lpaqtaxanaqtepi qataq ana lataquiaxaipi. Qaq da lashiguiỹaxac somayepi qalaq 'eeta'am na llon da lchec, qataq ỹataqta qayaqaicpi da chegaqañi, 'eeta'am ana ñi'imshe da quelec ana qasoxonaxapi. ₉Qaq 'ena na le'enaxatpi somayepi: Som la'auaxanec le'enaxat Ezer, qaq som ca'atalecpi somaye, Abdías, Eliab, ₁₀Mismaná, Jeremías, ₁₁Atay, Eliel, ₁₂Johanán, Elzabad, ₁₃Jeremías qataq so Macbanay. ₁₄Qaq se'esopi chegoxoguet so Gad, nacheso som lataxala'pi so alleppi. Qaq somayepi huo'o som lataxala' so cien alleppi, qataq huo'o som lataxala' so mil alleppi. ₁₅Qaq somayepi, nacheso som ỹa'axasoxoolec co'ollaxa so tala Jordán som la'auaxanec ca'agoxoic co'ollaq ipaxaalec se'eso tala, nache datauec naqa'en 'enauac som netaña so ca'ameguepi, som pa'aỹa'ague da yo'oxoñi qataq da avit. ₁₆Qaq nataqa'en huo'o som chegoxoguetpi so Benjamín qataq so Judá, nqo'ona da huaxaiguet so David maye hueta'a so lle'eguenaqa'. ₁₇Huaña nache so David ca'ata'aguet somayepi, nache 'enapega, 'eeta': «Da qananaquiitaigui da nlagaxayec, qataq da qauanaqui da aỹem qautauañi, nache ishet da qami' sasategueta, qalaxaye da qansheetaique da aỹem qaỹa'añiiguet da aỹem loxonec na ñepa'aguenaxauapi, na'aictaxa da qaica ca so'ot saỹaỹamaxañi, qalaxaye Ñim Natamnaxala' so qarta'alpi, qami' imeteeta'ape, nache ỹauo'o qome ca qanhuaxanaguiiqui.» ₁₈Qaq huaña nache so Amasay, maye lataxala' so treinta ỹalleppi, talec som Saqcha'a Na'añaxac, nache ỹataqta nlamaxaren 'eeta':

₁₉Qataq nataqa'en huo'o so chegoxoguetpi so Manasés da itauan so David, co'ollaq so David ỹalectaigui so filisteopi da nalaate' so Saúl. Qalaxaye saishet da ipaca'a da itauan somayepi, cha'aye som lataxala'pi so filisteopi co'ollaq ime da laỹona't da na'aqtaxana't, nache sa nasheneguet, cha'aye somayepi 'enapeco': «¡Dam David, ishet da huaxaiguet so lataxala' Saúl, nache qomi' ỹalaua't!» ₂₀Qaq 'ena na le'enaxatpi so ỹalleppi maye chegoxoguetpi so Manasés, maye ca'ategue so David co'ollaq taỹa ye Siclag: Adná, Jozabad, Jediael, Micael, Jozabad, Eliú, qataq so Siletay, maye lataxala'pi so alleppi maye chegoxoguetpi so Manasés. ₂₁Qaq se'esopi nacheso so itauan so David, co'ollaq dataỹa'aguet da delogui' som huotaique da huenoxotauopi, cha'aye 'enauac somayepi da ỹataqta alaataxaicpi, qataq 'añaxaicpi, ỹoqo'oye ivira'a da lataxala' so alleppi. ₂₂Qaq 'enauaque soua na'axa'te da nquictauec so itauan so David, nache ivitta'a da qalota so alleppi maye ỹataqta 'añaxaicpi.

₂₃Qaq 'iye ye lcata da ima'a't so alleppi maye lhuotta da nalat maye itauan so David, co'ollaq somaye hueta'a ye Hebrón da yaqto' talec qanqa'en da lo'onataxanaxac so Saúl, cha'aye mashe la'aqtac co'ollaxa Ñim Nataxala'. ₂₄Qaq som nhuo' le'ecpi maye chegoxoguetpi so Judá, ivi' seis mil ochocientos ỹalleppi, maye huota'a aso lpaqtaxanaqtepi qataq aso lataquiaxaipi, nache lhuotta da nalat. ₂₅Qaq so nhuo' le'ecpi maye chegoxoguetpi so Simeón, ivi' siete mil cien som ỹalleppi alaataxaicpi, maye ỹataqta 'añaxaicpi, qataq lhuotta da nalat. ₂₆Qaq so nhuo' le'ecpi maye chegoxoguetpi so Leví, ivi' cuatro mil seiscientos, ₂₇qataq nataqa'en huaxaiguet so tres mil setecientos maye chegoxoguetpi so Aarón, qaq som Joyadá nache lataxala' somayepi, ₂₈qataq so nsoqolec Sadoc, maye alaataxaic qataq ỹataqta 'añaxaic, qataq nnaictague' so veintidós nataxala'pi maye chegoxoguetpi som lauo' le'ecpi. ₂₉Qaq so nhuo' le'ecpi maye chegoxoguetpi so Benjamín, maye maiche lauo' le'ecpi so Saúl, ivi' tres mil so ỹalleppi, cha'aye se'esoua na'axa'te qalota som saishet da ỹaxanec so Saúl. ₃₀Qaq so nhuo' le'ecpi maye chegoxoguetpi so Efraín, ivi' veinte mil ochocientos so ỹalleppi alaataxaicpi maye ỹataqta 'añaxaicpi, qataq ỹataqta ỹo'oxoraicpi da ỹalectaigui so maiche lauo' le'ecpi. ₃₁Qaq som laỹe so maiche nalamaxat nhuo' le'ecpi maye chegoxoguetpi so Manasés, ivi' dieciocho mil so ỹalleppi maye qoỹaneuo da taỹa so David, da yaqto' ỹaneuo da nta'a. ₃₂Qaq so nhuo' le'ecpi maye chegoxoguetpi so Isacar, ivi' doscientos so nataxala'pi maye ỹaỹateeta'aguelo naua na'axa'te, qataq ỹaỹateeta'a nam taỹa'a da ỹo'ot so Israel le'ecpi, qaq som lauo' le'ecpi ỹo'ottac nam damaxasoxoolecpi somayepi. ₃₃Qaq so nhuo' le'ecpi maye chegoxoguetpi so Zabulón, ivi' cincuenta mil alleppi maye lhuotta da nalat, qataq ỹaỹaten da do'ogoxona ca camachaqca nam no'ogoxonaxatpi, qataq lhuotta da lasataxac da nalat da itauan so David. ₃₄Qaq so nhuo' le'ecpi maye chegoxoguetpi so Neftalí, ivi' mil so nataxala'pi, nnaictague' so treinta y siete mil ỹalleppi maye ỹachetac aso lataquiaxaipi qataq aso lpaqtaxanaqtepi. ₃₅Qaq so nhuo' le'ecpi maye chegoxoguetpi so Dan, ivi' veintiocho mil seiscientos so alleppi maye lhuotta da nalat. ₃₆Qaq so nhuo' le'ecpi maye chegoxoguetpi so Aser, ivi' cuarenta mil so alleppi maye lhuotta da nalat. ₃₇Nataqa'en som hueta'atague da lỹa le'ego so tala Jordán, som lauo' le'ecpi so Rubén, Gad, qataq som laỹe so maiche nalamaxat nhuo' le'ecpi maye chegoxoguetpi so Manasés, ivi' ciento veinte mil so ỹalleppi maye ỹotta'a't so lo'ogoxonaxatpi da nalat. ₃₈Qaq 'enauac se'eso alaataxaicpi maye ỹataqta lhuotta da nalat taỹa ye Hebrón, cha'aye ỹataqta lhuennataxa da ỹaneuo so David, da lta'a 'enauac so Israel le'ecpi. Qaq nataqa'en 'enauac so laỹe Israel le'ecpi, ỹaỹamaxareeta da nacheso so David da nta'a. ₃₉Qaq tres soua na'axa'te da hueta'a ye netaña so David, da deque'etac qataq nỹomtac, cha'aye som lauo' le'ecpi somayepi, iqataxanai' co'ollaxa so aloq. ₄₀Qataq nataqa'en som lauoreuapi, qataq som lauo' le'ecpi so Isacar, Zabulón qataq so Neftalí, ira'a somayepi so nallec, dachoxoolec so 'ashenapi, cameellopi, molapi qataq so nauegaxanaxala' huacapi. Nache ỹachetac so 'ayiiña, nauole lalegue ana hiigo, qataq aso nqaxaỹaqta nañiguishe alapi, lataxa, aceite, huacapi qataq aso qaguetapi, nache ỹataqta qalota cha'aye ỹataqta huo'o da ntonaxac 'enauac se'eso Israel le'ecpi.